မန်စီးတီးနှင့် ချယ်လ်ဆီးတို့ထက် အဲဗာတန်ကို ပြစ်ဒဏ်ချရသည်မှာ ပိုလွယ်ကူကြောင်း အယ်လ်ဒရစ်ချ် ဝေဖန်

လီဗာပူးလ်ဂန္ထဝင် အယ်လ်ဒရစ်ချ်က ငွေကြေးချမ်းသာသည့် မန်စီးတီးနှင့် ချယ်လ်ဆီးအသင်းတို့ထက် အဲဗာတန်အသင်းကို ပြစ်ဒဏ်ချမှတ်ရသည်မှာ ပိုမိုလွယ်ကူကြောင်း ဝေဖန်ပြောကြားခဲ့သည်။

အဲဗာတန်အသင်းသည် ပရီးမီးယားလိဂ်ဘဏ္ဍာရေးစည်းမျဉ်းကို ချိုးဖောက်မှုဖြင့် နိုဝင်ဘာ (၁၇) ရက်တွင် (၁၀) မှတ်လျှော့ပြစ်ဒဏ်ချမှတ်ခံခဲ့ရသည်။ အဲဗာတန်အသင်း ပြစ်ဒဏ်ချမှတ်ခံရချိန်တွင် စွဲချက်ပေါင်း (၁၁၅) ချက်ဖြင့် စွဲချက်ခံထားရသည့် မန်စီးတီးနှင့် ပိုင်ရှင်ဟောင်း အေဘရာမိုဗစ်ချ်လက်ထက် ငွေကြေးအရှုပ်အထွေးများ ပြုလုပ်ခဲ့သည့် ချယ်လ်ဆီးအသင်းတို့မှာမူ ပြစ်ဒဏ်ချမှတ်ခံရခြင်း မရှိသေးသည့်အပေါ် ဝေဖန်မှုများ ပိုမိုမြင့်တက်လာခဲ့သည်။

ယခုအခါ လီဗာပူးလ်ဂန္ထဝင် အယ်လ်ဒရစ်ချ်က “အဲဗာတန်က ပြစ်ဒဏ်ချမှတ်ခံလိုက်ရပြီ။ အေဘရာမိုဗစ်ချ်လက်ထက်က အရှုပ်ထုပ်တွေအတွက် ချယ်လ်ဆီးနဲ့ စွဲချက်ပေါင်း (၁၁၅)ချက်နဲ့ စွဲချက်တင်ခံထားရတဲ့ မန်စီးတီးတို့ ဘယ်လိုပြစ်ဒဏ်ချမှတ်ခံရမလဲ ကျွန်တော် တို့ စောင့်ကြည့်ရမယ်။ အဲဗာတန်က ဘာလို့ဒီလောက်မြန်မြန် ပြစ်ဒဏ်ချမှတ်ခံရတာလဲ။ အဲဗာတန်က ငွေမထိုးလို့လား။ မန်စီးတီးနဲ့ ချယ်လ်ဆီးတို့က ငွေတွေသောက်သောက်လဲရှိနေလို့ မထိရဲကြတာလား။ မန်စီးတီးနဲ့ ချယ်လ်ဆီးရဲ့ ပြဿနာဆိုရင် ကြာနေပါပြီ။ ဒါပေမဲ့ အခုထိ ဘာပြစ်ဒဏ်မှ မချနိုင်သေးဘူး။ ပြစ်ဒဏ်ချဖို့ကို အချိန်တွေ ရွှေ့ပြီးရင်း ရွှေ့နေတယ်” ဟု ပြောကြားခဲ့သည်။