မန်ချက်စတာ ယူနိုက်တက် အသင်းရဲ့ ဂန္ဓဝင် ကစားသမားဟောင်း ဖြစ်သူ ပေါလ် စခိုးလ်က အင်္ဂလန် လက်ရွေးစင် အသင်းမှာ မန်ချက်စတာသား နှစ်ဦး ဖြစ်တဲ့ မေဆွန် ဂရင်းဝုဒ် နဲ့ ဖီးလ် ဖိုဒန် တို့ကို မရွေးချယ် ခဲ့တဲ့ အင်္ဂလန် နည်းပြ ဂါးရတ် ဆောက်ဂိတ်ရဲ့ ဆုံးဖြတ်ချက် အပေါ် ဝေဖန် သွားခဲ့လိုက် ပါတယ် ။
ယူနိုက်တက် ကြယ်ပွင့် ဂရင်းဝုဒ် နဲ့ မန်စီးတီး ကြယ်ပွင့် ဖီးလ် ဖိုဒန် တို့ဟာ ပြီးခဲ့တဲ့လ တုန်းက အင်္ဂလန် လက်ရွေးစင် အသင်းရဲ့ ကစားသမား စာရင်းမှာ ပါဝင် နိုင်ခဲ့ ကြသူတွေပဲ ဖြစ်ခဲ့ကြ ပါတယ် ။ ဒါ့အပြင် သူတို့ တွေဟာ အိုက်စလန်ကို အနိုင် ရရှိ ခဲ့တဲ့ ပွဲစဉ်မှာ ပွဲကစားချိန် မိနစ် တွေကို ပိုင်ဆိုင် နိုင်ခဲ့ ကြပါ သေးတယ် ။
ဒါပေမယ့် လက်ရွေးစင် အသင်းအတွက် ပထမဆုံး ကစားခွင့် ရရှိ ခဲ့တဲ့ အထိမ်းအမှတ် အဖြစ် သူတို့ နှစ်ဦးဟာ အိုက်စလန်မှ မော်ဒယ်ချောလေး တွေနဲ့ ပျော်ပါးခဲ့ ကြခြင်းက အိုက်စလန် နိုင်ငံမှ ထုတ်ပြန် ခဲ့တဲ့ ကိုဗစ် 19 စည်းကမ်းချက်ကို ဖောက်ဖျက်ရာ ရောက်ခဲ့တဲ့ အတွက် ဆောက်ဂိတ်က ဒိန်းမတ် နဲ့ ကစား ရမယ့် ပွဲစဉ်အတွက် ခေါ်မသွားခဲ့ပဲ အိမ်ပြန် စေလွှတ်ခဲ့ ပါတယ် ။
အခုတော့ အင်္ဂလန် နည်းပြကြီး ဂါးရတ် ဆောက်ဂိတ်က ဒီတစ်ကြိမ် ဆက်လက် ကစား ရမယ့် ဥရောပ နေးရှင်းလိဂ် ပွဲစဉ် အတွက် ပဏာမ ကစားသမား စာရင်း ထုတ်ပြန် ကြေငြာ လိုက်ခဲ့ရာ မှာတော့ ဂရင်းဝုဒ်ရော ဖီးလ် ဖိုဒန် ကိုပါ ထည့်သွင်း ရွေးချယ်ခြင်း မပြုလုပ်ခဲ့ ပါဘူး ။
အခြား တစ်ဖက် မှာတော့ မန်ချက်စတာသား လူငယ် နှစ်ဦးဟာ လူငယ် ပီပီ အမှား ကျူးလွန်ခဲ့ ကြတဲ့ အတွက် ဝေဖန်မှု တွေကို အတော်လေး ခံစားခဲ့ ကြရ ပါတယ် ။ အခုတော့ ပေါလ် စခိုးလ် က ထိုက်သင့်တဲ့ အပြစ်ဒဏ် ခံခဲ့ ကြပြီ ဖြစ်တဲ့ လူငယ်တွေ အပေါ် အခုလို ဆုံးဖြတ်ချက် ချမှတ်ခြင်းက သင့်တင့် မျှတမှု မရှိကြောင်း ဝေဖန် သွားခဲ့လိုက် ပါတယ် ။
” ဘောလုံး အားကစား လောကရဲ့ ပါရမီ အကောင်းဆုံးသော လူငယ် ကစားသမားတွေ ထဲက နှစ်ဦး ( ဂရင်းဝုဒ် ၊ ဖိုဒန် ) ဟာ အမှား ကိုယ်စီ ကျူးလွန် ထားခဲ့ ကြပြီး အဲ့ဒီ အတွက် သင့်တင့် မျှတတဲ့ အပြစ်ဒဏ် ခတ်မှု တွေကိုလည်း ကြုံတွေ့ ခံစား ပြီးခဲ့ကြ ပါပြီ ”
” အင်္ဂလန် လက်ရွေးစင် အသင်းက ဖန်တီး နိုင်မှု စွမ်းရည် ကောင်းမွန်တဲ့ ၊ ဂိုးသွင်း ကောင်းတဲ့ ကစားသမားလေး တွေကို ပိုင်ဆိုင်ခွင့် ရရှိ ထားနိုင်ခဲ့ ကြတာပါ ။ ဒါပေမယ့် သူတို့ တွေက ကစားသမား တွေကို ပဏာမ စာရင်းမှ ချန်လှပ် ထားခဲ့ ကြပြီး အပြစ် ထပ်ပေးခဲ့ကြ ပါတယ် ။ ဒါက မမျှတ ပါဘူး ” လို့ ပေါလ် စခိုးလ် က ဝေဖန် သွားခဲ့တာပဲ ဖြစ်ပါတယ် ။
အင်္ဂလန် နည်းပြ ဂါးရတ် ဆောက်ဂိတ် ကတော့ ဒီ တစ်ကြိမ်မှာ မန်ချက်စတာသား လူငယ် ကစားသမား နှစ်ဦးကို ရွေးချယ် သွားခြင်း မရှိခဲ့ ပေမယ့် စွမ်းဆောင်ရည် တွေကို ဆက်လက် အကဲခတ်ပြီး နိုဝင်ဘာလ မှာ ရွေးချယ် သွားဖွယ် ရှိနေတယ်လို့ သိရှိ ခဲ့ရ ပါတယ် ။
အင်္ဂလန် လက်ရွေးစင် အသင်းဟာ ဒီလ ထဲမှာတော့ ဝေးလ် လက်ရွေးစင် အသင်း နဲ့ ခြေစမ်းပွဲ အရင်ဆုံး ကစားသွား ကြဖို့ ရှိနေပြီး အဲ့ဒီနောက် မှာတော့ ဘယ်လ်ဂျီယံ ၊ ဒိန်းမတ် အသင်း တွေနဲ့ ဥရောပ နေးရှင်း လိဂ် ပွဲစဉ် တွေကို ဆက်လက် ကစားသွား ရမှာပဲ ဖြစ်ပါတယ် ။
