မန်စီးတီးနှင့် ရင်ဆိုင်ရမည့် ချန်ပီယံလိဂ်ကွာတားဖိုင်နယ်ပွဲစဉ်တွင် နော်ဝေတိုက်စစ်မှူး ဟာလန်းကို ဘိုင်ယန်အနေဖြင့် မည်သို့မျှ ကြောက်စရာအကြောင်းမရှိကြောင်း ဂျာမန်ကွင်းလယ်ကစားသမားဟောင်း လိုသာမားသီးယပ်စ်က ပြောဆိုလိုက်သည်။
ချန်ပီယံလိဂ်ကွာတားဖိုင်နယ်မဲခွဲရာတွင် ဂျာမန်ချန်ပီယံ ဘိုင်ယန်သည် ပရီးမီးယားလိဂ်ချန်ပီယံ မန်စီးတီးနှင့် ထိပ်တိုက်တွေ့နေသလို ဟာလန်းသည်လည်း ဂိုးသွင်းအားကောင်းနေသည်။ ဟာလန်းသည် လိုက်ပ်ဇစ်ဘက်သို့ နောက်ဆုံးကစားသည့် ချန်ပီယံလိဂ်ပွဲစဉ်တွင် ၅ ဂိုးသွင်းထားနိုင်သလို စနေနေ့ညက ကစားသည့် ပရီးမီးယားလိဂ်ပွဲစဉ်တွင် ဆောက်သမ်တန်ဘက်သို့လည်း ဟက်ထရစ်သွင်းထားနိုင်သည်။
ဟာလန်းသည် ဂျာမန်ဘွန်ဒက်စ်လီဂါကလပ် ဒေါ့မွန်တွင်ကစားစဉ်ကတည်းက ဘိုင်ယန်မြူးနစ်နှင့် အကြိမ်များစွာ ရင်ဆိုင်ခဲ့ရပြီး ဂျာမန်ချန်ပီယံအကြောင်းကို ကောင်စွာသိသူဖြစ်သည်။ လိုသာမားသီးယပ်စ်က “ဟာလန်းက ဘိုင်ယန်အသင်းကို ရင်ဆိုင်ရတဲ့ အကြိမ်တွေမှာ ဂိုးတွေ အများကြီး မသွင်းနိုင်တာကို တွေ့ရပါတယ်။ သူ့ကို ကြောက်နေစရာမလိုပါဘူး”ဟု ပြောကြားခဲ့သည်။
ဟာလန်းသည် ဘိုင်ယန်မြူးနစ်အသင်းနှင့်ပြိုင်ဘက်များအဖြစ် ၇ ပွဲရင်ဆိုင်တွေ့ခဲ့ပြီး ၅ ဂိုးသာသွင်းယူနိုင်ခဲ့သည်။ ထို့ပြင် ထိုသို့ပြိုင်ဘက်များအဖြစ် ရင်ဆိုင်ရတိုင်း ဟာလန်းသည် ဘိုင်ယန်ကို ရှုံးနိမ့်ခဲ့သည်။ သို့ရာတွင် မန်စီးတီးကို ကိုယ်စားပြု၍ ဘိုင်ယန်နှင့် ရင်ဆိုင်ရာတွင်မူ ဟာလန်းသည် ပို၍ ပြည့်စုံသော အသင်းဖော်များကြောင့် ယုံကြည်ချက်ပိုရှိလာပြီး အနိုင်ရသွားရန် အခွင့်အရေးပိုများကြောင်း သတင်းများကသုံးသပ်ဖော်ပြသည်။
