လာလီဂါထိပ်သီးကလပ် ရီးယဲလ်မက်ဒရစ်အသင်းသည် အသင်း၏ကာလရှည်ပစ်မှတ်ဖြစ်သော PSG အသင်းမှ ပြင်သစ်လက်ရွေးစင်တိုက်စစ်မှူး ဘာပေအတွက် လာမည့်ရက်သတ္တပတ်အတွင်း ပထမဆုံးအကြိမ်ကမ်းလှမ်းမှု ပြုလုပ်သွားမည်ဖြစ်ပြီး PSG အသင်းမှ လက်ခံသွားဖွယ်ရှိနေကြောင်း စပိန်အားကစားသတင်းစာ Football Espana ကဖော်ပြခဲ့သည်။
အသက် (၂၄)နှစ်အရွယ်ရှိ ပြင်သစ်ကြယ်ပွင့်တိုက်စစ်မှူး ဘာပေသည် အသင်း၏စာချုပ်သစ်ကမ်းလှမ်းမှုကို အကြိမ်ကြိမ်ငြင်းပယ်ထားပြီး ယခုနွေရာသီအပြောင်းအရွှေ့ကာလအတွင်း PSG အသင်းမှ ထွက်ခွာရန်သေချာနေသူ ဖြစ်သည်။ ဘာပေသည် PSG အသင်းနှင့် စာချုပ်သက် တမ်းတစ်နှစ်သာကျန်ရှိတော့သူဖြစ်ပြီး လာမည့် ၂၀၂၄ နွေရာသီတွင် အလွတ်ပြောင်းရွှေ့ကြေးဖြင့်ထွက်ခွာနိုင်မည်ဖြစ်သည်။ ထို့ကြောင့် PSG အသင်းအနေဖြင့် လက်ရှိဘောလုံးကမ္ဘာ၏ အကောင်းဆုံးကစားသမားများထဲမှ တစ်ဦးအဖြစ် သတ်မှတ်ခံထားရသူ ဘာပေအား အလွတ်ပြောင်းရွှေ့ကြေးဖြင့် မဆုံးရှုံးရစေရန်အတွက် ယခုနွေရာသီတွင် ရောင်းချရန်ဆုံးဖြတ်ထားကြောင်း ပြင်သစ်မီဒီယာများက အစောပိုင်ကတည်းကဖော်ပြခဲ့ကြသည်။ ဘာပေသည် ၂၀၁၇ နွေရာသီအပြောင်းအရွှေ့က မိုနာကိုအသင်းမှ PSG အသင်းသို့ ယူရိုသန်း (၁၈၀)ဖြင့်ပြောင်းရွှေ့ခဲ့သူူဖြစ်ပြီး (တစ်ရာသီအငှားဖြင့်ဦးစွာပြောင်းရွှေ့ခဲ့ခြင်းဖြစ်) နေမာ (၂၂၂ သန်း)၏နောက် ဘောလုံးလောက၏ ဒုတိယကြေးအကြီးဆုံး အပြောင်းအရွှေ့ဖြစ်ခဲ့သလို၊ ဆယ်ကျော် သက်ကစားသမားများထဲတွင် ကြေးအကြီးဆုံးအဖြစ်စံချိန်တင်ခဲ့သည်။
ရီးယဲလ်မက်ဒရစ်အသင်းသည် မူလက ဘာပေအား လာမည့်နွေရာသီအပြောင်းအရွှေ့တွင်မှ အလွတ်ပြောင်းရွှေ့ကြေးဖြင့်ခေါ်ယူရန် စီစဉ်ထားသော်လည်း ပြီးခဲ့သည့် ရက်သတ္တပတ်များအတွင်းက ဆော်ဒီအာရေဗျကလပ် အယ်လ်ဟီလာ၊ ပရီးမီးယားလိဂ်ကလပ် ချယ်လ်ဆီးအသင်းများနှင့် အပြောင်းအရွှေ့သတင်းများထွက်ပေါ်ခဲ့သည့်အတွက် အလျင်အမြန်လက်ဦးမှုရယူနိုင်ရန် ပြင်ဆင်နေခြင်း ဖြစ်ကြောင်းသိရသည်။ ထို့ပြင် ရီးယဲလ်အသင်းသည် ယခု နွေရာသီအပြောင်းအရွှေ့ကာလအတွင်း အသင်း၏အဓိကတိုက်စစ်မှူး ဘန်ဇီမာအားဆုံးရှုံးထားရသည့်အတွက် ထိပ်တန်းတိုက်စစ်မှူးတစ်ဦးမဖြစ်မနေအစားထိုးရန် လိုအပ်နေခြင်းကြောင့် ဘာပေအား ယခုနွေရာသီတွင်ပင် အရခေါ်ယူရန်စီစဉ်နေကြောင်း Football Espana ကဖော်ပြခဲ့သည်။
စပိန်အားကစားသတင်းစာ Mundo Deportivo ၏ ဖော်ပြချက်အရ ရီးယဲလ်အသင်းသည် လာမည့် သြဂုတ် လ (၁၅)ရက်နေ့မတိုင်မီ ဘာပေအတွက် ကမ်းလှမ်းမှုများ စတင်ပြုလုပ်သွားမည်ဖြစ်ပြီး PSG အသင်းအနေဖြင့်လည်း ယင်းကမ်းလှမ်းမှုအပေါ် ချက်ချင်းလက်ခံသွားဖွယ် ရှိနေကြောင်းသိရသည်။ PSG အသင်းသည် ဘာပေအတွက် အနည်းဆုံးယူရိုသန်း (၁၅၀)အလိုရှိနေပြီး ရီးယဲလ်အသင်း၏ ကမ်းလှမ်းမှုမှာ ၎င်းတို့အလိုရှိသည့်ပမာဏနှင့် များစွာကွာခြားမှုမရှိရန် မျှော်လင့်နေကြောင်းသိရသည်။ ရီးယဲလ်အသင်းသည် ယခုနွေရာသီအပြောင်းအရွှေ့ကာလအတွင်း ဘယ်လင်ဟမ်၊ ဖရန်ဂါစီယာ၊ အာဒါဂူလာနှင့် ဟိုဆေးလူ အစရှိသည့် ကစားသမားသစ် (၄)ဦးခေါ်ယူထားပြီး ပြောင်းရွှေ့ကြေး ယူရိုသန်း (၁၃၀)နီးပါး အသုံးပြုထားသည်။
