အင်္ဂလန်လက်ရွေးစင်အသင်း၏ တိုက်စစ်ကစားသမား ဆာကာက ပြင်သစ်တိုက်စစ် မှူး ဘာပေနှင့် နှိုင်းယှဉ်ချီးကျူးခြင်းအပေါ် ဘာပေ တစ်ယောက်တည်းရှိသလို၊ ဆာကာ တစ်ယောက်တည်းရှိသည်ဟု တုံ့ပြန်ပြောကြားခဲ့ကြောင်း သိရသည်။
ပြင်သစ်နှင့် အင်္ဂလန်အသင်းတို့သည် ၂၀၂၂ ကမ္ဘာ့ဖလားပြိုင်ပွဲ၏ ကွာတားဖိုင်နယ်အဆင့်တွင် ဆုံတွေ့ရမည်ဖြစ်ပြီး ဆာကာအနေဖြင့် ဘာပေနှင့် ထိပ်တိုက်ရင်ဆိုင်ရမည် ဖြစ်သည့်အပြင် နှစ်ဦးစလုံးက ခြေစွမ်းပြနေကြသည့်အတွက် နှိုင်းယှဉ်ချီးကျူးခံရခြင်းဖြစ်သည်။
ဆာကာက “ချီးကျူးမှုအတွက် ကျေးဇူးတင်ပါတယ်။ ဒါပေမဲ့ ဘာပေက တစ်ယောက်တည်းရှိသလို၊ တစ်ချိန်တည်းမှာ ဆာကာကလည်း တစ်ယောက်တည်းရှိပါတယ်။ ကျွန်တော်က ကျွန်တော်ပဲ ဖြစ်ချင်ပြီး ကျွန်တော့်အသင်းကို ကျွန်တော်တတ်နိုင်သလောက် အကောင်းဆုံးနည်းလမ်းနဲ့ပဲ ကူညီပေးချင်ပါတယ်။ ဒီပြိုင်ပွဲမှာ လူငယ်ကစားသမားတွေ အများကြီးရှိပါတယ်။ ကျွန်တော်တို့အသင်းမှာတောင် ဘယ်လင်ဟမ်လို မယုံနိုင်စရာကောင်းတဲ့ လူငယ်တွေ ရှိနေပါတယ်။ ကျွန်တော်ကတော့ ပြိုင်ပွဲရဲ့ အကောင်းဆုံးကစားသမားဆု ဒါမှမဟုတ် အကောင်းဆုံးလူငယ်ဆုရဖို့ထက် ချန်ပီယံဆုရရှိဖို့က ဦးစားပေးပါပဲ”ဟု ပြောကြားခဲ့သည်။
ဘာပေသည် ပြီးခဲ့သည့် ၂၀၁၈ ကမ္ဘာ့ဖလားပြိုင်ပွဲတွင် (၄)ဂိုးသွင်းယူကာ ပြိုင်ပွဲ၏ အကောင်းဆုံးလူငယ်ကစားသမားဆု ရရှိခဲ့သူဖြစ်သည်။ ထို့ပြင် ယခုပြိုင်ပွဲတွင်လည်း ဘာပေက (၅)ဂိုးသွင်းယူထားပြီး ဆာကာက (၃)ဂိုးသွင်းယူထားသည်။
