ဘာစီလိုနာအသင်းမှထွက်ခွာခွင့် တောင်းထားသည့် အာဂျင်တီးနားတိုက်စစ်မှူး မက်ဆီအနေဖြင့် မေဂျာလိဂ်သို့ ပြောင်းရွှေ့ကစားဖွယ်ရှိနေကြောင်း သတင်းများ ထွက်ပေါ်နေသည်။
အသက် (၃၃)နှစ်အရွယ်ရှိ မက်ဆီသည် အသင်းနည်းပြသစ် ရော်နယ်လ်ကိုးမင်းနှင့် အနာဂတ်အတွက် ဆွေးနွေးပြီးနောက် သြဂုတ်လ (၂၄)ရက်တွင် ၎င်းအား အသင်းမှထွက်ခွာခွင့်ပြုရန် တောင်းဆိုခဲ့ကြောင်း ဥရောပမီဒီယာများက ဖော်ပြခဲ့ကြသည်။
ဘာစီလိုနာအသင်းသည် အသင်းမှ မက်ဆီ ထွက်ခွာခွင့်တောင်းသည်ဆိုသောသတင်းမှာ မှန်ကန်သည်ဟု ESPN သတင်းဌာနကို အတည်ပြုပြောကြားခဲ့ကြောင်းလည်း သိရသည်။
မက်ဆီအနေဖြင့် ဘာစီလိုနာအသင်းနှင့် ချုပ်ဆိုထားသည့် စာချုပ်တွင် အသက် (၃၀)ကျော်လာပြီးနောက် ရာသီကုန်ချိန်တွင် အသင်းမှထွက်ခွာခွင့်ရှိသည်ဆိုသောအချက် ပါဝင်ကြောင်း သိရသည်။ သို့သော် ယင်းအချက်မှ ဇွန်လ (၁)ရက်အထိသာ အကျုံးဝင်ကြောင်း သိရသည်။
သို့သော် ကိုရိုနာဗိုင်းရပ်စ်ကပ်ဘေးကြောင့် ၂၀၁၉-၂၀ ဘောလုံးရာသီမှ ကမောက်ကမဖြစ်ခဲ့ပြီး မက်ဆီက ၎င်းကို အသင်းမှထွက်ခွာခွင့်ပေးရန် တောင်းဆိုခဲ့ခြင်းဖြစ်ကြောင်း စပိန်အားကစားသတင်းစာ Marca က ဖော်ပြခဲ့သည်။
လက်ရှိတွင် ဘာစီလိုနာအသင်းနှင့် မက်ဆီ၏ စာချုပ်မှာ ၂၀၂၁ ခုနှစ်၊ ဇွန်လ (၃၀)ရက်အထိ ရှိနေပြီး စာချုပ်လျော်ကြေးမှာ ယူရိုသန်း (၆၀၀)ဖြစ်ကြောင်း သိရသည်။
မက်ဆီကို ခေါ်ယူရန် ၎င်း၏ဆရာဟောင်းဖြစ်သည့် ဂွါဒီယိုလာ ကိုင်တွယ်နေသည့် မန်စီးတီးအသင်းက စိတ်ဝင်စားနေသော်လည်း မက်ဆီအနေဖြင့် အမေရိကန်မေဂျာလိဂ်သို့ ပြောင်းရွှေ့ဖွယ်ရှိနေကြောင်း မီဒီယာများက ဖော်ပြနေကြသည်။
