လီဗာပူး အိုင်ကွန် ဂျွန်ဘန်းက ဘာစီလိုနာ ကို ပြောင်းရွေ့ဖို့ သတင်းကြီး နေတဲ့ ဂျီနီဝိုင်နယ်ဒန်ဟာ အန်ဖီးမှာ အစားထိုး နိုင်တဲ့ ကစားသမား ဖြစ်တယ်လို့ ဆိုလိုက်ပေမယ့် သူ့အနေနဲ့ နယ်သာလန် ကွင်းလယ်လူကို ကလပ်မှာ ဆက်ရှိဖို့ မျှော်လင့် မိတယ်လို့ ဖြည့်စွက် ပြောကြား ခဲ့ပါတယ်။ ဝိုင်နယ်ဒန်ဟာ လာမည့် နွေရာသီမှာ လီဗာပူးနဲ့ စာချုပ်သက်တမ်း ကုန်ဆုံးတော့မှာ ဖြစ်ပြီး စာချုပ်သစ် ကိစ္စ ကလည်း တစ်စုံတစ်ရာ ထူးခြားမှု မရှိတာကြောင့် ကောလဟာလတွေ ထွက်ပေါ် နေပါတယ်။
![](https://sportsmyan.com/wp-content/uploads/2020/09/Liverpool-21-1024x536.jpg)
စပိန် က လာတဲ့ သတင်းများ အရ ဝိုင်နယ်ဒန်ဟာ ဘာစီလိုနာ နည်းပြသစ် ရော်နယ်ကိုးမန်းရဲ့ ပထမဦးဆုံး ခေါ်ယူမယ့် ကစားသမားလို့ ဖော်ပြ နေကြ ပေမယ့်လည်း အန်ဖီးနဲ့ နီးစပ်သူတွေ ကတော့ ကတ်တလန် ကလပ် ဘက်က တစ်စုံတစ်ရာ ဆက်သွယ်ခြင်း မရှိသေးဘူးလို့ ရှင်းလင်း ထားပါတယ်။ လီဗာပူး အသင်းဟာ အကယ်၍ ဝိုင်နယ်ဒန်ကို ဘာစီလိုနာထံ လက်လွှတ် ခဲ့ရမယ် ဆိုပါက ၎င်းရဲ့ နေရာကို ဥရောပ ချန်ပီယံ ဘိုင်ယန်မြူးနစ် အသင်းရဲ့ ကွင်းလယ်လူ သီယာဂို အယ်ကန်တာရာ နဲ့ ပြန်လည် အစားထိုးရန် ရည်မှန်း ထားပါတယ်။
ဘန်းက လီဗာပူးအသင်းဟာ ၎င်းရဲ့ နေရာ အတွက် ပြန်လည် အစားထိုး နိုင်မယ့် ကစားသမား ရှာတွေ့ ထားခဲ့မယ် ဆိုရင် နယ်သာလန် ကစားသမားကို ကလပ် ကနေ ထွက်ခွာခွင့် ပြုလိမ့်မယ်လို့ ဆိုလိုက်ပြီး အန်ဖီး ကလပ်ရဲ့ ကွင်းလယ်ပိုင်းကို upgrade လုပ်ရတာဟာ ရော်ဘတ်တိုဖာမီနို ၊ ဆာဒီယိုမာနေး ၊ မိုဟာမက်ဆာလား တို့ရဲ့ front three ကို upgrade လုပ်ရတာထက် ပိုမို လွယ်ကူတယ်လို့ သုံးသပ် သွားပါတယ်။
ဘန်းက “အမှန်ပါပဲ။ ကျွန်တော်တို့ ကတော့ လီဗာပူး အသင်းရဲ့ ပြီးခဲ့တဲ့ အောင်မြင်မှု တွေမှာ အဓိက အခန်းကဏ္ဍ ကနေ ပါဝင် ပေးခဲ့တဲ့ ကိုယ့်ရဲ့ အကောင်းဆုံး ကစားသမား တွေကို အသင်းမှာ ဆက်ရှိ စေချင်ပါတယ်။ ဒါပေမယ့် လီဗာပူးရဲ့ ကွင်းလယ် ကစားသမား တွေရဲ့ profile ကတော့ အနည်းငယ် ကွဲပြား ခြားနားပြီး သူတို့ဟာ အစားထိုးလို့ ရတဲ့ ကစားသမား တွေပါ။ ကျွန်တော် ကတော့ ၃ ဦးတွဲ တိုက်စစ်ရဲ့ နေရာကို အစားထိုးဖို့ ကသာ ပိုမို ခက်ခဲလိမ့်မယ်လို့ ထင်ပါတယ်။
![](https://sportsmyan.com/wp-content/uploads/2020/08/thiago-bayern-1024x536.jpg)
ပြောရမယ် ဆိုရင် ဂျီနီဝိုင်နယ်ဒန်ဟာ အရမ်းကို ကောင်းတဲ့ ကစားသမား တစ်ဦးပါ။ သူဟာ အလုပ်ကို အပြင်းအထန် ကြိုးစားတယ် ၊ ဝီရိယ ရှိတယ် ၊ ကြိုးစားချင်စိတ် ရှိပြီး အရည်အသွေးလည်း ကောင်းပါတယ်။ ဒါပေမယ့် သူ့ဘက်က လီဗာပူး တို့ ကမ်းလှမ်း ထားတာထက် အများကြီး ပိုမို တောင်းဆို နေမယ် ဆိုရင်တော့ လီဗာပူးဟာ သူ့ရဲ့ နေရာမှာ ပြန်လည် အစားထိုးဖို့ အတွက် ပိုမို အရည်အသွေး ကောင်းမွန်တဲ့ တစ်စုံတစ်ဦးကို ရှာဖွေ သွားပါလိမ့်မယ်။” လို့ ဆိုသွား ပါတယ်။
ဆက်လက်ပြီး ဘန်းက ပရီးမီးယားလိဂ် ချန်ပီယံ အသင်း အနေနဲ့ ဝိုင်နယ်ဒန်ကို ကလပ် အသင်းမှာ ဆက်ထိန်း ထားနိုင်ဖို့ နည်းလမ်း ရှာဖွေ တွေ့ရှိ လိမ့်မယ်လို့ သူ မျှော်လင့် ထားကြောင်း ပြောဆို သွားပါတယ်။
ဘန်းက “ကျွန်တော် ဝိုင်နယ်နယ်ကို လီဗာပူး အသင်းမှာ ဆက်ရှိ စေချင် ပါတယ်။ သူဟာ အရမ်းကို ကောင်းတဲ့ ကစားသမားပါ။ ဂျီနီ နဲ့ ကလပ် တို့ စာချုပ်သစ် အတွက် သဘောတူညီ နိုင်မယ့် နည်းလမ်း တစ်ခု ရှာဖွေ တွေ့ရှိလိမ့်မယ်လို့ ကျွန်တော် မျှော်လင့် မိပါတယ်။ ကျွန်တော့် အထင် လီဗာပူး ဘက်က ဂျီနီဟာ တောင်းဆိုမှု တအား များလွန်း တယ်လို့ ခံစား မိနေတာ ဖြစ်မှာပါ။ ကစားသမား ဘက်က ယုံကြည်မှု တအား များလွန်း နေရင်လည်း မျှော်လင့် ထားတာနဲ့ ဆန့်ကျင်ဘက် ဖြစ်သွား နိုင်ပါတယ်။ ဒါပေမယ့် ဆက်လက် စောင့်ကြည့် ကြတာပေါ့။
![](https://sportsmyan.com/wp-content/uploads/2020/09/harry-kane-1024x536.jpg)
သူဟာ ကလပ် အတွက် များစွာ အကျိုးပြု ခဲ့သူပါ။ ဒါ့ကြောင့် သူတို့ ဖြေရှင်းချက်ကို ရှာဖွေတဲ့ နေရာမှာ သဘောတူညီမှု ရရှိဖို့ပဲ မျှော်လင့်ပါတယ်။ အကယ်၍ သဘောတူညီမှု မရခဲ့ဘူး ဆိုရင် လီဗာပူး အသင်းဟာ ဈေးကွက်ထဲ ဝင်ပြီး အရည်အသွေး မြင့်မားတဲ့ ကွင်းလယ်လူ တစ်ဦးကို ခေါ်ယူ သွားနိုင်ပါတယ်။ ဒါဆိုရင်တော့ လီဗာပူး ကွင်းလယ်ဟာ အနည်းငယ် ခြားနားမှု ရှိသွား နိုင်ပါတယ်။ ဒါဟာ ကလပ် အတွက် အကောင်းဆုံး အရာလည်း ဖြစ်လာနိုင် ပါတယ်။” လို့ သုံးသပ် သွားပါတယ်။