လူစားဝင် ကစားသမား ဖြစ်သူ ဘရူနိုဖာနန်ဒက်စ်ရဲ့ လှပတဲ့ ဖရီးကစ် သွင်းဂိုးနဲ့ အတူ မန်ချက်စတာယူနိုက်တက်ဟာ ခါးသီးပြိုင်ဘက် လီဗာပူးကို အနိုင်ယူကာ အက်ဖ်အေဖလား ပြိုင်ပွဲရဲ့ နောက်တဆင့်ကို တက်ရောက် သွားခဲ့ပါတယ်။ ဆာလားဟာ လီဗာပူး အတွက် အဖွင့်ဂိုးကို လှလှပပ ကန်သွင်းယူ ခဲ့ပေမယ့်လည်း သိပ်မကြာမီမှာပဲ ရပ်ဖို့ဒ်ရဲ့ ဖန်တီးပေးပို့မှုကို ဂရင်းဝုဒ်က အဆုံးသတ် ကန်သွင်းယူ ခဲ့တာ ဖြစ်ပါတယ်။
အဲဒီနောက် ဒုတိယပိုင်းမှာ ရီးစ်ဝီလီယံရဲ့ အမှားကနေ တဆင့် ရပ်ဖို့ဒ်က ဂိုးသမားနဲ့ တစ်ဦးချင်း ရင်ဆိုင် အတွေ့မှာ အပိုင် သွင်းယူ ခဲ့ပါတယ်။ ဒါပေမယ့်လည်း လီဗာပူး အတွက် ဆာလားက ပြန်လည် ချေပဂိုး သွင်းယူ ခဲ့တာကြောင့် ၂ ဂိုးစီ သရေ ဖြစ်နေ ခဲ့ပေမယ့်လည်း လူစားဝင်လာ ခဲ့တဲ့ ဘရူနိုဖာနန်ဒက်စ်ဟာ ဖရီးကစ် ကနေ တဆင့် တိုက်ရိုက် ကန်သွင်းယူကာ အိုးထရပ်ဖို့ဒ်မှာ ရလဒ် အဆုံးအဖြတ်ကို ပေးသွား ခဲ့ပါတယ်။
ဒီပွဲစဉ်မှ ထူးထူးခြားခြား ပြောစရာတွေ ကတော့
၁~ဂိုးမိုးခေါင်နေမှုကို အဆုံးသတ်ခဲ့တဲ့ ဂရင်းဝုဒ်
ဒီပွဲစဉ်မတိုင်မီ လူပြောများ ခဲ့တာကတော့ လီဗာပူးတို့ တိုက်စစ်ပိုင်းမှာ ဂိုးမိုးခေါင်နေမှုပဲ ဖြစ်ပါတယ်။ မန်ယူနိုက်တက်တို့ ပုံစံကောင်း ရနေ ခဲ့ပေမယ့်လည်း ဂရင်းဝုဒ် ကတော့ သူ့ကိုယ်ပိုင် ဂိုးမိုးခေါင်မှု ကာလကို ဖြတ်သန်း ခဲ့ရပါတယ်။ အင်္ဂလန် တိုက်စစ်မှုးဟာ ၁၀ ပွဲဆက် ဂိုးပေါက် ပျောက်နေခဲ့တာ ဖြစ်ပြီး ဒါဟာ ၎င်းရဲ့ ကစားသမား ဘဝမှာ အဆိုးဆုံး ဂိုးမိုးခေါင်မှု ဖြစ်ပါတယ်။
ဒါပေမယ့် အိုလီဟာ ဂရင်းဝုဒ်ကို ဒီပွဲစဉ်မှာ ပွဲထွက် ကစားခွင့် ပေးခဲ့ပြီး ၎င်းကလည်း မန်နေဂျာရဲ့ ယုံကြည်မှုကို ပြန်လည် ပေးဆပ် ခဲ့ပါတယ်။ အဓိက ပြောရမှာ ကတော့ ရပ်ဖို့ဒ်ရဲ့ တိကျလှတဲ့ အဝေးဘော ပေးပို့မှု ဖြစ်ပြီး ဂရင်းဝုဒ်ဟာ ဒီဘောလုံးကို သပ်ရပ်စွာ ထိန်းကာ အလီဆွန်ရဲ့ တစ်ဦးချင်း အတွေ့မှာ အပိုင် ကန်သွင်းယူ ခဲ့တာ ဖြစ်ပါတယ်။ နောက်ကနေ ရောဘတ်ဆန်ရဲ့ ဖိအားပေးမှု ခံရပေမယ့်လည်း ခေါင်းအေးအေးနဲ့ သွင်းယူကာ ဂိုးမိုးခေါင်နေမှုကို အဆုံးသတ် နိုင်ခဲ့ပါတယ်။
၂~ပြန်လည် အသက်ဝင်လာခဲ့တဲ့ လီဗာပူးရဲ့ တိုက်စစ် ကစားပုံ
ပြီးခဲ့တဲ့ ပွဲစဉ်တွေမှာ ခံစစ်ကို အထိုင်ကျ ကစားတဲ့ ဗျူဟာကို ကျော်လွှား နိုင်ခဲ့ခြင်း မရှိတဲ့ အပြင် တိုက်စစ် ကစားဟန်တွေ ထက်မြက်မှု ပျောက်ဆုံးနေခဲ့တဲ့ လီဗာပူးဟာ ဒီညမှာတော့ ၎င်းတို့ရဲ့ ထက်မြက်တဲ့ ကစားဟန်ကို ပြသ နိုင်ခဲ့ပါတယ်။ ပထမသွင်းဂိုးမှာ ဆိုရင် နောက်တန်း အစွန်လူတွေ တိုက်စစ်ကို လိုက်ပါနေချိန်မှာ ဖာမီနိုဟာ နောက်ကို အနည်းငယ် ဆင်းကာ ဘောလုံး လက်ခံ ရယူခဲ့ပြီး ဆာလားရဲ့ ပြေးလမ်းကြောင်းထဲကို တိကျစွာ ပေးပို့ ခဲ့တာ ဖြစ်ပါတယ်။ ကလော့ရဲ့ အသင်းဟာ ပြီးခဲ့တဲ့ ပွဲစဉ်တွေမှာ ဒီလို တိုက်စစ် ကစားဟန်မျိုး လိုအပ်နေတာ ဖြစ်ပြီး ဒီပွဲစဉ်မှာ အခွင့်အရေးကောင်းတွေ ဖန်တီး ကစားနိုင်ခဲ့ပါတယ်။
ဆာလားရဲ့ ဒုတိယဂိုး ကလည်း နားလည်မှု ရှိတဲ့ တိုက်စစ် ကစားဟန် ဖြစ်ပြီး လီဗာပူးဟာ ဘယ်လို ဂိုးတွေ သွင်းယူ ရမလဲ ဆိုတာ မမေ့သေးဘူး ဆိုတာကို ပြသ ခဲ့ပါတယ်။ ဒီပွဲစဉ်မှာ ရှုံးနိမ့် ခဲ့ပေမယ့်လည်း လီဗာပူးရဲ့ ပြန်လည် အသက်ဝင် လာခဲ့တဲ့ တိုက်စစ် ကစားဟန် ကတော့ လာမည့် ပွဲစဉ်တွေ အတွက် အားတက်စရာ ဖြစ်ပါတယ်။
၃~ဗဟိုနောက်ခံလူ တစ်ဦး မဖြစ်မနေ ခေါ်ယူပေးသင့်တဲ့ လီဗာပူးအသင်းပိုင်ရှင်
လီဗာပူးတို့ ယခုလမှာ ဗဟိုနောက်ခံလူတစ်ဦး မဖြစ်မနေ ဝယ်ယူသင့်တယ် ဆိုတာကို ဒီပွဲကို ကြည့်ရင် အားလုံး သိကြမှာပါ။ နောက်တန်း ဒဏ်ရာ ပြသနာတွေဟာ ဒီရာသီ လီဗာပူးရဲ့ form ကို များစွာ သက်ရောက်မှု ရှိစေခဲ့ပြီး ဗန်ဒိုက်လို ကမ္ဘာ့အကောင်းဆုံး ဗဟိုနောက်ခံလူကို ဆုံးရှုံးရတဲ့ ဘယ်အသင်းမဆို သေချာပေါက် ရုန်းကန် ရမှာ ဖြစ်ပါတယ်။ ဒါ့အပြင် လီဗာပူးဟာ ဂိုးမက်ဇ်ကိုပါ ကာလရှည် လက်လွှတ် ထားခဲ့ရပြီး မာတစ် ကလည်း ၃ ရက် တစ်ပွဲ ကစားနိုင်လောက်တဲ့ ကြံ့ခိုင်မှု အခြေအနေမှာ ရှိမနေပါဘူး။
ကလော့ဟာ ဒီပွဲစဉ်မတိုင်မီ ဗဟိုနောက်ခံလူ တစ်ဦး မဝယ်ယူပေးခဲ့တဲ့ အသင်းပိုင်ရှင်တွေရဲ့ ဆုံးဖြတ်ချက်ကို စိတ်ပျက်နေဟန် ပြောဆို သွားခဲ့ပြီး ဒီပွဲစဉ်မှာလည်း လီဗာပူး ခံစစ်ဟာ ပေါက်ထွက် နေခဲ့ပါတယ်။ အသက် ၁၉ နှစ်အရွယ် ရီးစ်ဝီလီယံဟာ ပွဲချိန်တစ်လျှောက်လုံး ရပ်ဖို့ဒ်ကို ထိန်းချုပ် ကစားဖို့ ရုန်းကန် ခဲ့ရတဲ့ အပြင် ယူနိုက်တက်ကို ၂-၁ ဖြစ်စေခဲ့တဲ့ အမှားကိုပါ ကျူးလွန်ခဲ့ပါတယ်။ ရီးစ်ဝီလီယံနဲ့ နက်ဖီးလစ် တို့ဟာ အသင်းကြီး အတွက် ကစားပေးရန် လုံလောက်တဲ့ အခြေအနေမှာ မရှိကြတာကြောင့် ကလော့ဟာ ပြီးခဲ့တဲ့ ပွဲစဉ် တစ်ချို့မှာ ဟန်ဒါဆန် နဲ့ ဖာဘင်ညို တို့ကို ဗဟိုခံစစ်မှာ တွဲကစား စေခဲ့ရတာ ဖြစ်ပါတယ်။ အန်ဖီး တာဝန်ရှိသူတွေ အနေနဲ့ တစ်ပတ်သာ ကျန်တော့တဲ့ အပြောင်းအရွေ့ ဈေးကွက်မှာ ဘာတွေ လုပ်ပေးမလဲ ဆိုတာ စောင့်ကြည့် သွားရမှာပါ။
၄~ပြိုင်ဘက်ရဲ့ ခံစစ်အားနည်းမှုကို အပိုင်အသုံးချခဲ့တဲ့ ရပ်ဖို့ဒ်
ရီးစ်ဝီလီယံလို လှုပ်ရှားမှု နှေးကွေးတဲ့ ဗဟိုနောက်ခံလူ အနေနဲ့ ရပ်ဖို့ဒ်လို တိုက်စစ်မှုးနဲ့ ထိပ်တိုက် ရင်ဆိုင် ကစားရတာ ကံဆိုးလှပါတယ်။ လီဗာပူးတို့ အဖွင့်ဂိုး ရရှိခဲ့ပြီးနောက် ရပ်ဖို့ဒ်ဟာ မေဆင်ဂရင်းဝုဒ် ဆီကို တအားကို ကောင်းလှတဲ့ ဘောလုံးပေးပို့မှု လုပ်ပေးခဲ့တဲ့ အပြင် ပထမပိုင်း တစ်ပိုင်းလုံး လီဗာပူးရဲ့ ညာခြမ်းခံစစ်ကို ဒုက္ခပေးကစား ခဲ့ပါတယ်။
အဲဒီနောက် ဒုတိယပိုင်းမှာလည်း ရီးစ်ဝီလီယံရဲ့ အမှားကို အခွင့်ကောင်းယူကာ အလီဆွန်နဲ့ တစ်ဦးချင်း အတွေ့မှာ တိကျတဲ့ အဆုံးသတ်နဲ့ ဦးဆောင်ဂိုး သွင်းယူ ပေးခဲ့ပါတယ်။ ယူနိုက်တက် ပရိတ်သတ်တွေ ကတော့ ခါးသီးပြိုင်ဘက်ကို ကောင်းကောင်း ဒုက္ခပေး ကစားသွားခဲ့တဲ့ ရပ်ဖို့ဒ် အပေါ် ချီးကျူးမှုတွေ ညံနေကြမှာပါ။ ဒါပေမယ့် ပွဲပြီးခါနီးမှာ ရပ်ဖို့ဒ်ဟာ ဒဏ်ရာ ရသွားတဲ့ပုံ ရှိနေပြီး လာမည့် အရေးကြီး ပွဲတွေမတိုင်မီ ပွဲတွေ အများကြီး မလွဲချော်ဖို့ မျှော်လင့် နေရမှာ ဖြစ်ပါတယ်။
၅~ပွဲကြီးတွေမှာ ဘာမှမလုပ်နိုင်ဘူးဆိုတဲ့ ဝေဖန်သံတွေကို တိတ်ဆိတ်စေခဲ့တဲ့ ဘရူနို
ဘရူနိုဖာနန်ဒက်စ်သာ အိုးထရပ်ဖို့ဒ်ကို ရောက်မလာခဲ့ဘူး ဆိုရင် မန်ယူနိုက်တက်ရဲ့ အနာဂတ်ဟာ သိပ်ပြီး အလားအလာ ကောင်းဖို့ မရှိနိုင်ပါဘူး။ ပေါ်တူဂီ စတားဟာ အိုးထရပ်ဖို့ဒ်ကို ရောက်ရှိ လာခဲ့ပြီးနောက် ရုန်းကန် နေရတဲ့ အသင်းကို တစ်ဦးတည်
၅~ပွဲကြီးတွေမှာ ဘာမှမလုပ်နိုင်ဘူးဆိုတဲ့ ဝေဖန်သံတွေကို တိတ်ဆိတ်စေခဲ့တဲ့ ဘရူနို
ဘရူနိုဖာနန်ဒက်စ်သာ အိုးထရပ်ဖို့ဒ်ကို ရောက်မလာခဲ့ဘူး ဆိုရင် မန်ယူနိုက်တက်ရဲ့ အနာဂတ်ဟာ သိပ်ပြီး အလားအလာ ကောင်းဖို့ မရှိနိုင်ပါဘူး။ ပေါ်တူဂီ စတားဟာ အိုးထရပ်ဖို့ဒ်ကို ရောက်ရှိ လာခဲ့ပြီးနောက် ရုန်းကန် နေရတဲ့ အသင်းကို တစ်ဦးတည်း ဆွဲတင် ပေးခဲ့သူ ဖြစ်ပါတယ်။ ပြီးခဲ့တဲ့ ရာသီက ယူနိုက်တက်တို့ အဆင့် ၃ နဲ့ အဆုံးသတ်နိုင်အောင် ကူညီပေးခဲ့တဲ့ အပြင် ဒီရာသီ ပရီးမီးယားလိဂ် ဖလား စိန်ခေါ်သူ ဖြစ်နေတာ ကလည်း ဘရူနိုကြောင့် ပါပဲ။
ဒီရာသီ ယူနိုက်တက် အတွက် အရေးပါတဲ့ ဂိုးတွေ ၊ ဖန်တီးမှုတွေ လုပ်ပေးခဲ့တဲ့ ဘရူနိုဟာ လီဗာပူးကို အက်ဖ်အေဖလား ပြိုင်ပွဲကနေ ထွက်ခွာ စေခဲ့ရာမှာလည်း အဆုံးအဖြတ် ပေးခဲ့သူ ဖြစ်ပါတယ်။ ဖာဘင်ညိုဟာ ကာဗာနီကို ပင်နယ်တီ ဧရိယာ အစပ်မှာ ပြစ်ဒဏ် ကျူးလွန် ခဲ့တာကြောင့် ယူနိုက်တက်တို့ ဖရီးကစ် ရခဲ့ပါတယ်။ လူစားဝင် ကစားသမား ဘရူနိုဟာ ဂိုးသမား မထင်မှတ်ထားတဲ့ ထောင့်ထဲကို တိကျစွာ ကန်သွင်းယူကာ ယူနိုက်တက်ရဲ့ အက်ဖ်အေဖလား အိမ်မက်ကို ဆက်လက် အသက်သွင်း ပေးခဲ့ပါတယ်။
