ယူရို-၂၀၂၀ ပြိုင်ပွဲဗိုလ်လုပွဲတွင် အီတလီအသင်းကို ပယ်နယ်တီဖြင့်အရေးနိမ့်ပြီးနောက် ယင်းရှုံးပွဲအတွက် မိမိတွင်သာတာဝန်ရှိကြောင်း အင်္ဂလန်အသင်းနည်းပြ ဆောက်ဂိတ်က ပြောကြားခဲ့သည်။
အင်္ဂလန်အသင်းသည် ၁၉၆၆ ကမ္ဘာ့ဖလားပြိုင်ပွဲနောက်ပိုင်း ပထမဆုံးဆုဖလားဆွတ်ခူးရန် အနီးစပ်ဆုံးအခြေအနေသို့ ရောက်ရှိခဲ့သော်လည်း အင်္ဂလန်လူငယ်ကြယ်ပွင့်များဖြစ်သည့် ရပ်ရှ်ဖို့ဒ်၊ ဆန်ချိုနှင့် ဆာကာတို့၏ပယ်နယ်တီ(၃)ဂိုးဆက် လွဲချော်မှုကြောင့် ဆုဖလားနှင့် လွဲချော်ခဲ့ရသည်။
”ဒီရှုံးပွဲအတွက် ကျွန်တော့်မှာပဲ တာဝန်ရှိပါတယ်။ ပယ်နယ်တီကန်မယ့်ကစားသမားတွေကို ကျွန်တော်က ရွေးချယ်ရတာပါ။ အခုလိုအခြေအနေမျိုးမှာ ဘယ်သူမှ သာတဲ့အနေအထားမရှိဘူးလို့တော့ ကျွန်တော် ပြောခဲ့ပါတယ်။ ဆာကာကို ပယ်နယ်တီကန်ခွင့်ပေးတာကလည်း ကျွန်တော့်ဆုံးဖြတ်ချက်ပါ။ ဒီအတွက် ကျွန်တော် လုံးဝတာဝန်ယူပါတယ်။ သူမှ မဟုတ်ပါဘူး။ မားကပ်စ်(ရပ်ရှ်ဖို့ဒ်)ပဲဖြစ်ဖြစ်၊ ဂျေဒန်(ဆန်ချို)ပဲဖြစ်ဖြစ်ပေါ့။ မားကပ်စ် နဲ့ ဂျေဒန်ကို အသင့်တော်ဆုံးအချိန်မှာ လူစားလဲကစားစေခဲ့တာပါ။ ဒါဟာ အလောင်းအစားတစ်ခု လုပ်လိုက်တာ လည်းဖြစ်ပါတယ်။ ဒါပေမဲ့ ဒီလူစားလဲတဲ့အလောင်းအစားကိုပဲ ကျွန်တော်တို့ စောစောစီးစီးပြုလုပ်ခဲ့ရင် အချိန်ပိုမှာပဲ အရေးနိမ့်သွားနိုင်ပါတယ်”ဟု ဆောက်ဂိတ်က ပြောကြားခဲ့သည်။
နည်းပြ ဆောက်ဂိတ်သည် ပယ်နယ်တီကန်ရန်ဆုံးဖြတ်ချက်အတွက် ရပ်ရှ်ဖို့ဒ်နှင့် ဆန်ချိုကို အချိန်ပိုနှောင်းပိုင်းတွင်မှ လူစားဝင်ကစားစေခဲ့ပြီး တိုက်ဆိုင်စွာပင် ၎င်းလူစားလဲခဲ့သည့် ကစားသမား (၂)ဦးစလုံးမှာ ပယ်နယ်တီဝင်အောင် ကန်သွင်းနိုင်ခြင်းမရှိ ဖြစ်ခဲ့ရသည်။
အင်္ဂလန်အသင်းသည် မေဂျာပြိုင်ပွဲများ (ကမ္ဘာ့ဖလားနှင့် ယူရို)၌ ပယ်နယ်တီကန်သွင်းမှု(၉)ကြိမ်တွင် (၂) ကြိမ်သာ အနိုင်ရရှိထားကြောင်း သိရသည်။
သို့သော် ယင်းအနိုင်ရသည့် (၂)ကြိမ်စလုံးမှာ အင်္ဂလန်အသင်း နည်းပြအဖြစ် ဆောက်ဂိတ် တာဝန်ယူသည့်ကာလအတွင်းတွင်ဖြစ်ပြီး ၂၀၁၈ ကမ္ဘာ့ဖလားပြိုင်ပွဲ ကိုလံဘီယာနှင့် ရှုံး ထွက်(၁၆)သင်းအဆင့်ပွဲစဉ်နှင့် ၂၀၁၉ UEFA Nations League ပြိုင်ပွဲ ဆွစ်ဇာလန်အသင်းနှင့် တတိယနေရာလုပွဲများတွင် ဖြစ်သည်။
ဆောက်ဂိတ်သည် ယင်းအနိုင်ရသည့်ပွဲအစီအစဉ်အတိုင်း ယခုပွဲတွင်လည်းပြုလုပ်ခဲ့ခြင်းဖြစ်သည်ဟု အကြောင်းပြချက်ပေးခဲ့သည်။
