ဖူလ်ဟမ်အသင်းတိုက်စစ်မှူး မီထရိုဗစ်သည် ယခုရာသီ လိဂ်ချန်ပီယံရှစ်ပြိုင်ပွဲတွင် သွင်းဂိုး ၃၃ ဂိုးရှိလာပြီး ပြိုင်ပွဲသမိုင်းတစ်လျှောက် တစ်ရာသီအတွင်း ဂိုးအများဆုံးစံချိန်တင်ခဲ့ကြောင်း သိရသည်။
အသက် ၂၇ နှစ်အရွယ် ဆားဘီးယားတိုက်စစ်မှူး မီထရိုဗစ်သည် ဗုဒ္ဓဟူးနေ့က ပီတာဘရော့အသင်းအား (၂-၁) ဂိုးဖြင့် အနိုင်ရသည့်ပွဲတွင် နှစ်ဂိုးစလုံး သွင်းယူပေးခဲ့သည်။
ယင်းပွဲအပြီးတွင် မီထရိုဗစ်၏သွင်းဂိုးမှာ ၃၃ ဂိုးရှိလာပြီး ပွဲစဉ် ၃၂ အပြီးမှာပင် တစ်ရာသီအတွင်း ဂိုးအများဆုံး စံချိန်သစ်တင်ခဲ့ခြင်း ဖြစ်သည်။
လိဂ်ချန်ပီယံရှစ်တွင် တစ်ရာသီအတွင်း ဂိုးအများဆုံးစံချိန်ကို ဘရန့်ဖို့ဒ်အသင်းတိုက်စစ်မှူး အီဗန်တိုနေးက ပြီးခဲ့သည့် ၂၀၂၀-၂၀၂၁ ရာသီတွင် ၃၁ ဂိုးဖြင့် တင်ရှိထားခြင်းဖြစ်ပြီး မီထရိုဗစ်က လက်ကျန် ၁၄ ပွဲအလိုမှာပင် စံချိန်တင်ခဲ့ခြင်းဖြစ်သည်။
