မက်ဂွိုင်းရားသည် ဆိုင်းငံ့ထောင်ဒဏ် ချမှတ်ခံရသည့်ဖြစ်ရပ်နှင့်ပတ်သက်၍ BBC Sports ၏ အယ်ဒီတာ ဒန်ရိုအန်နှင့်အင်တာဗျူးတွင် ပထမဆုံးအကြိမ် ထုတ်ဖော်ပြောကြားခဲ့ပြီး အရပ်ဝတ်ရဲများက ခြေထောက်များကို ရိုက်နှက်သဖြင့် ပြန်ပေးဆွဲခံရပြီဟု ထင်ခဲ့မိကြောင်း၊ အသက်အန္တရာယ်အတွက် စိုးရိမ်ခဲ့ရပြီး ထွက်ပြေးရန် ကြိုးပမ်းခဲ့ကြောင်း၊ လာဘ်ပေးရန် ကြိုးပမ်းသည် ဆိုသည့်စွပ်စွဲချက်မှာ ရယ်စရာဖြစ်ကြောင်း၊ အမှားကျူးလွန်ခဲ့ခြင်းမရှိသဖြင့် မည်သူ့ကိုမျှ တောင်းပန်မည်မဟုတ်ကြောင်း ပြောကြားခဲ့သည်။
ဂရိနိုင်ငံ မိုင်ကိုနော့စ်ကျွန်း၌ ဖမ်းဆီးခံရစဉ် အရပ်ဝတ်ရဲများ၏ ရိုက်နှက်မှုကြောင့် ပြန်ပေးဆွဲခံရပြီဟု ထင်ခဲ့မိကြောင်း မန်ယူအသင်းခေါင်းဆောင် မက်ဂွိုင်းရား၏ပြောကြားမှုကို ဂရိအစိုးရရှေ့နေ ပါရာဒစ်ဆစ်က တုံ့ပြန်ဝေဖန်ခဲ့ကြောင်း သိရသည်။
မက်ဂွိုင်းရားသည် ဆိုင်းငံ့ထောင်ဒဏ် ချမှတ်ခံရသည့်ဖြစ်ရပ်နှင့်ပတ်သက်၍ BBC Sports ၏ အယ်ဒီတာ ဒန်ရိုအန်နှင့်အင်တာဗျူးတွင် ပထမဆုံးအကြိမ် ထုတ်ဖော်ပြောကြားခဲ့ပြီး အရပ်ဝတ်ရဲများက ခြေထောက်များကို ရိုက်နှက်သဖြင့် ပြန်ပေးဆွဲခံရပြီဟု ထင်ခဲ့မိကြောင်း၊ အသက်အန္တရာယ်အတွက် စိုးရိမ်ခဲ့ရပြီး ထွက်ပြေးရန် ကြိုးပမ်းခဲ့ကြောင်း၊ လာဘ်ပေးရန် ကြိုးပမ်းသည် ဆိုသည့်စွပ်စွဲချက်မှာ ရယ်စရာဖြစ်ကြောင်း၊ အမှားကျူးလွန်ခဲ့ခြင်းမရှိသဖြင့် မည်သူ့ကိုမျှ တောင်းပန်မည်မဟုတ်ကြောင်း ပြောကြားခဲ့သည်။ သို့ဖြစ်ရာ ၎င်းတို့ကို တရားစွဲဆိုခဲ့သည့် အစိုးရရှေ့နေ ပါရာဒစ်ဆစ်က Mail Online သတင်းဌာနနှင့်တွေ့ဆုံ၍ ပြန်လည် တုံ့ပြန်ခဲ့ခြင်းဖြစ်သည်။
“မက်ဂွိုင်းရားပြောသွားတာတွေကို ဖတ်လိုက်ရသလို ကြည့်လည်းကြည့်လိုက်ပါတယ်။ ရယ်စရာလည်းကောင်းပါတယ်။ ထပ်ပြီးဖြည့်စွက်ပြောစရာကတော့ သူက ရဲအရာရှိတွေကို တိုက်ခိုက်ခဲ့ရုံတင်မဟုတ်ဘဲ ဂရိတရားရေး စနစ်တစ်ခုလုံးကိုပါ စော်ကားခဲ့တယ်ဆိုတာပါပဲ။ ပြန်ပေးဆွဲခံရတယ်ထင်လို့ ထွက်ပြေးပြီးတော့ အေးဂျင့်ဆီဖုန်းခေါ်ဖို့ ကြိုးစားခဲ့တယ်လို့ မက်ဂွိုင်းရားက ပြောသွားတယ်။ သူက ကိုယ့်ချစ်သူ၊ ညီ၊ ညီမတွေနဲ့ ငယ်သူငယ်ချင်းကိုပါ ထားသွားတာပါ။ ဒါတွေက အမှန်တွေပဲလို့ ခင်ဗျားတို့လက်ခံရင်တောင် ကျွန်တော်ကတော့ လက်မခံနိုင်ပါဘူး။ ဒါက ဂုဏ်ပြုခံရလောက်တဲ့ အမျိုးသားတစ်ယောက်ရဲ့အပြုအမူ မဟုတ်ပါဘူး။ ကျွန်တော်သာ သူ့ချစ်သူ ဒါမှမဟုတ် အဲဒီအဖွဲ့ထဲက တစ်ယောက်ဆိုရင် အားလုံးကိုထားသွားတဲ့အတွက် အရမ်း ဒေါသထွက်မိမှာပါ။ သူ့ဆီက ဖြေရှင်းချက် တစ်ခုခုလည်း တောင်းမှာပါ။ မီနီဘတ်စ်ရပ်လိုက်ချိန်မှာ အဲဒီနေရာက ရဲစခန်းအပြင်ဘက်ဆိုတာ မသိဘူးလို့လည်း မက်ဂွိုင်းရားက ပြောပါတယ်။ မိုင်ကိုနော့စ်ရဲစခန်းကို လာကြည့်ကြပါလို့ အားလုံးကို ပြောချင်ပါတယ်။ နေ့ဘက်ဖြစ်ဖြစ် ညဘက်ဖြစ်ဖြစ် ဒီနေရာက ဘယ်နေရာလဲဆိုတာ အသိသာကြီးပါ။ ညပိုင်းဖြစ်လို့ အပြင်ဘက်မှာ ရဲကားတွေအများကြီးရပ်ထားပြီး ရဲအရာရှိတွေကလည်း အဝင်အထွက်လုပ်နေကြပါတယ်။ အဲဒီနေရာက ရဲစခန်းမဟုတ်ဘူးလို့ မပြောနိုင်ဘူးဆိုရင်တော့ အမူးလွန်နေလို့ပဲ ဖြစ်လိမ့်မယ်။ ဒါပေမဲ့ သူက အမူးလွန်မနေဘူးဆိုတာ သေချာပါတယ်။ ဘာဖြစ်လို့လဲဆိုတော့ ပြန်ပေးဆွဲခံရ ပြီထင်ပြီး လူတစ်စုကို တိုက်ခိုက်ပြီးတော့ ထွက်ပြေးဖို့ ကြိုးစားခဲ့တယ်လို့ သူပြောခဲ့တာကြောင့်ပါ” ဟု ၎င်းက ဆိုသည်။
မက်ဂွိုင်းရားအပါအဝင် သုံးဦးသည် ဆိုင်းငံ့ထောင်ဒဏ်များ ချမှတ်ခံရခြင်းအတွက် အယူခံဝင်ထားကြောင်း သိရသည်။
