ရီးယဲလ်မက်ဒရစ်အသင်း၏ အီတလီလူမျိုးဝါရင့်နည်းပြ အန်ဆယ်လော့တီက အယ်လ်ချီအသင်းအား အဝေးကွင်းတွင် (၂-၁)ဂိုးဖြင့် အနိုင်ရခဲ့သော လာလီဂါပွဲစဉ်၌ မိမိတို့အသင်းအနေဖြင့် ပွဲကို ထိန်းချုပ်ကစားနိုင်ခဲ့သော်လည်း ပွဲပြီးဆုံးခါနီးတွင် ပေါ့ဆခဲ့ကြောင်း ပွဲပြီးသတင်းစာရှင်းလင်းပွဲ၌ ပြောကြားခဲ့သည်။
ရီးယဲလ်မက်ဒရစ်အသင်းသည် အယ်လ်ချီအသင်းနှင့်ပွဲစဉ်တွင် ပွဲချိန် (၂၂)မိနစ်နှင့် (၇၃)မိနစ်တို့၌ ဘရာဇီးလ်တိုက်စစ်ကစားသမား ဗင်နီစီယပ်စ် သွင်းယူသော သွင်းဂိုး (၂)ဂိုးဖြင့် ဦးဆောင်နိုင်ခဲ့သော်လည်း ပွဲချိန် (၈၆)မိနစ်တွင် ပြိုင်ဘက်အသင်းအား ချေပဂိုး (၁)ဂိုး ပြန်ပေးခဲ့ရကာ လက်ကျန်မိနစ်များတွင် အမှတ်ပြည့်ရရှိရန်အတွက် သတိကြီးစွာကစားခဲ့ရခြင်းဖြစ်သည်။
ယင်းအခြေအနေနှင့်ပတ်သက်ပြီး အန်ဆယ်လော့တီက ”ကျွန်တော်တို့အသင်းဟာ ပွဲကို အကောင်းဆုံးထိန်းချုပ်ကစားနိုင်ခဲ့ပါတယ်။ ဒါပေမဲ့ ပွဲချိန်ရဲ့ နောက်ဆုံးမိနစ်တွေတော့မပါခဲ့ပါဘူး။ အဲဒီအချိန်မှာ ကျွန်တော်တို့ ပေါ့ဆခဲ့ပါတယ်။ လူတိုင်းကတော့ (၂-၀)ဂိုးရလဒ်နဲ့ ပွဲပြီးဆုံးမယ်လို့ထင်ခဲ့ကြပေမဲ့ အမှန်တကယ်တော့ ကွင်းလယ်ဒိုင်က ပွဲသိမ်းခရာမမှုတ်မချင်း အရာရာမပြီးဆုံးသေးတာကို သိထားရပါမယ်” ဟု ပြောကြားခဲ့သည်။
ရီးယဲလ်အသင်းအား တစ်ကျော့ပြန်ကိုင်တွယ်ခဲ့သည့် အန်ဆယ်လော့တီသည် ယခုရာသီ လာလီဂါပြိုင်ပွဲတွင် အသင်းအား ရလဒ်ကောင်းများရရှိစေရန် စွမ်းဆောင်ပေးထားနိုင်သူဖြစ်သည်။
အသက် (၆၂)နှစ်အရွယ်ရှိ အန်ဆယ်လော့တီသည် ရီးယဲလ်မက်ဒရစ်အသင်းအား ၂၀၁၃ ခုနှစ်မှ ၂၀၁၅ ခုနှစ်အထိ ပထမအကြိမ်ကိုင်တွယ်ခဲ့ရာ၌ ချန်ပီယံလိဂ်ဆုဖလား (၁)ကြိမ်အပါဝင် စပိန်ဘုရင့်ဖလား၊ စပိန်စူပါဖလားနှင့် ကလပ်ကမ္ဘာ့ဖလား တို့ကိုလည်း တစ်ကြိမ်စီဆွတ်ခူးနိုင်ခဲ့သည့် နည်းပြတစ်ဦးဖြစ်သည်။
