ကွင်းလယ်လူ ဖရက်ဒ်၏ အပြောင်းအရွှေ့နှင့်ပတ်သက်၍ တူရကီကလပ် ဖီနာဘာချီနှင့် မန်ယူတို့ အကြားတွင် သဘောတူညီမှု ရရှိသွားပြီဖြစ်ပြီး ဖရက်ဒ်၏အပြောင်းအရွှေ့သည် လျင်လျင်မြန်မြန် ပြီးစီးဖွယ်ရှိနေကြောင်း သတင်းများက ဖော်ပြသည်။
မန်ယူကွင်းလယ်တွင် အရန်ကစားသမားဖြစ်နေသော ဖရက်ဒ်သည် ပြီးခဲ့သည့် ဘောလုံးရာသီတွင် စုစုပေါင်း ၅၆ ပွဲပါဝင်ကစားခွင့်ရခဲ့သော်လည်း ပရီးမီးယားလိဂ် ၁၂ ပွဲသာ ပွဲထွက်ကစားသမားအဖြစ်ပါဝင်ခွင့်ရရှိခဲ့သည်။ မန်ယူတွင် ကွင်းလယ်လူ မောင့်ကို ထပ်မံခေါ်ယူပြီးနောက် ဖရက်ဒ်၏ပွဲထွက်ခွင့်မှာ ပိုမိုနည်းပါးလာဖွယ်ရှိနေသည်။
၂၀၁၈ နွေရာသီတွင် ရှက်တာဒွန်းညက်မှ မန်ယူသို့ပေါင်သန်း ၅၀ ဖြင့်ပြောင်းရွှေ့ခဲ့သော ဖရက်ဒ်ကို ခေါ်ယူရန် ပရီးမီးယားလိဂ်ပြိုင်ဘက် ဖူလ်ဟမ်ကလည်း စိတ်ဝင်စားခဲ့သည်။ နော်တင်ဂမ်ဖောရက်စ်နှင့် ရိုမာတို့ကလည်း ဖရက်ဒ်နှင့်ပတ်သက်၍ စိတ်ဝင်စားမှုများ ရှိခဲ့သော်လည်း နောက်ဆုံးတွင် ဖီနာဘာချီနှင့် မန်ယူအကြား ပြောင်းရွှေ့ကြေးသဘောတူညီမှု ရရှိခဲ့ခြင်း ဖြစ်သည်။ ဖီနာဘာချီနှင့် မန်ယူတို့အကြားသဘောတူညီခဲ့သော ပြောင်းရွှေ့ကြေးမှာ ပေါင် ၁၃ သန်းခန့်ရှိမည်ဖြစ်ကြောင်းလည်း သတင်းများက ဖော်ပြသည်။
ဖရက်ဒ်အသင်းပြောင်းသွားပြီးလျှင် ၎င်းဝတ်ဆင်ခဲ့သော ကျောနံပါတ် ၁၇ ဂျာဆီကို ဒိန်းမတ်တိုက်စစ်မှူးသစ် ဟွိုက်ချ်လန်း က ဝတ်ဆင်ကစားသွားဖွယ်ရှိသည်။ ဟွိုက်ချ်လန်းသည် အသင်းဟောင်း အတ်တလန်တာတွင် ကျောနံပါတ် ၁၇ ကိုဝတ်ဆင်ခဲ့သည်။ ဟွိုက်ချ်လန်းသည် လတ်တလောတွင် ဒဏ်ရာရရှိနေခြင်းကြောင့် မန်ယူအတွက် မည်သည့်အချိန်တွင် စတင်ပါဝင်ကစားမည်ကို အတိအကျ မဆုံးဖြတ်နိင်ဖြစ်နေသည်။
