စပါးအသင်းသည် မန်နေဂျာအဖြစ် ဆဲလ်တစ်အသင်းကို ကိုင်တွယ်သော အန်ဂျီပေါ်စတီကော့လူကို ခန့်အပ်လိုက်ပြီဖြစ်သည်။ ထို့ပြင် စပါးအသင်းအကြီးအကဲ လဗ်ဗီသည် ဟယ်ရီကိန်းကို အသင်းမပြောင်းရေးအတွက် ဆက်လက်ကြိုးစားနေကြောင်းလည်း သတင်းများက ဖော်ပြသည်။
ပေါ်စတီကော့လူသည် စပါးအသင်းမန်နေဂျာရာထူးကို ရယူရန်အတွက် သဘောတူညီထားပြီးဖြစ်ကာ တရားဝင်ကြေညာနိုင်ရန်အတွက် အပြီးသတ်လုပ်ဆောင်စရာရှိသည်များကို ဆောင်ရွက်နေကြောင်းလည်း သတင်းများက ဖော်ပြသည်။
ပေါ်စတီကော့လူသည်စပါးအသင်းကို ၃ နှစ်စာချုပ်ဖြင့် မန်နေဂျာအဖြစ်ကိုင်တွယ်မည်ဖြစ်ပြီး ၎င်းကို စပါးမန်နေဂျာအဖြစ်လာမည့် ၄၈ နာရီအတွင်း ကြေညာဖွယ်ရှိသည်။ ပေါ်စတီကော့လူသည် ပြီးခဲ့သည့် ဘောလုံးရာသီတွင် ဆဲလ်တစ်အသင်းနှင့်အတူ ပြည်တွင်းဖလားသုံးလုံးကို အရယူနိုင်ခဲ့သည်။
အသက် ၅၇ နှစ်အရွယ်ရှိ ပေါ်စတီကော့လူသည် အသင်းကို စတင်ရောက်ရှိသည်နှင့် တိုက်စစ်မှူးကိန်း၏ ကိစ္စကို ဖြေရှင်းရရန်ရှိနေကြောင်းမီဒီယာများက ဖော်ပြသည်။ ကိန်းသည် စာချုပ်သက်တမ်း ၁၂ လသာကျန်ရှိတော့ပြီး မန်ယူနှင့် ရီးရဲမက်ဒရစ်တို့က ၎င်းကို လိုချင်နေသည်။ စာချုပ်သက်တမ်းမတိုးနိုင်ပါက အသက် ၂၉ နှစ်အရွယ်ရှိ ကိန်းကိုလာမည့် တစ်နှစ်တွင် အလွတ်ပြောင်းရွှေ့ကြေးဖြင့် လက်လွှတ်ရနိုင်သည့် အန္တရာယ်ရှိနေသော်လည်း စပါးအသင်းအကြီးအကဲ လက်ဗီသည် ကိန်းကို လွယ်လွယ်ဖြင့် အသင်းပြောင်းခွင့်ပေးရန် မရှိကြောင်း အသင်းတွင် ဆက်ထိန်းထားနိုင်ရန် ကြိုးစားသွားမည်ဖြစ်ကြောင်းလည်း သတင်းများထွက်ပေါ်လာသည်။
