ပေါ့ဘာ၏ ဒူးဒဏ်ရာကို နည်းလမ်း (၃)မျိုးဖြင့် ကုသရန်လျာထားပြီး ဂျူဗင်တပ်စ်အသင်း ကွင်းလယ်လူတစ်ဦး ထပ်မံရှာဖွေနေ

အမေရိကန်နိုင်ငံသို့ ရာသီကြိုခြေစမ်းခရီးစဉ်သွားရောက်ချိန်တွင် လေ့ကျင့်ခန်းအစီအစဉ်၌ ဒူးဒဏ်ရာရရှိခဲ့သည့် ဂျူဗင်တပ်စ်အသင်းကွင်းလယ်လူ ပေါ့ဘာ၏အခြေအနေမှာ ဆက်လက်စောင့်ကြည့်နေရဆဲဖြစ်ပြီး နည်းလမ်း (၃)မျိုးလျာထား၍ ကုသမှုပြုလုပ်သွားဖွယ်ရှိကြောင်း သိရသည်။

ပေ့ါဘာသည် ပြီးခဲ့သည့်စနေနေ့တွင် ပြင်သစ်နိုင်ငံ၊ လိုင်ယွန်မြို့တွင် သမားတော် ဆိုနာရီကိုတက်ဘာထရန်နှင့် ဆုံတွေ့ရန်စီစဉ်ခဲ့သော်လည်း ပျက်ပြယ်ခဲ့ပြီး လာမည့်ရက်သတ္တပတ်အတွင်း ထပ်မံဆုံတွေ့ရန် ရက်ချိန်းယူထားရကြောင်း Calciomercato က ဖော်ပြခဲ့သည်။

ထို့ပြင် Calciomercato က ပေါ့ဘာအနေဖြင့် သူ၏ ဒူးဒဏ်ရာကိုကုသရန် နည်းလမ်း (၃)မျိုးထဲမှ (၁)မျိုးဖြင့် ရွေးချယ်ကုသနိုင်ကြောင်း ဖော်ပြခဲ့သည်။ ပထမနည်းလမ်းမှာ ဒူးဒဏ်ရာကို အရှင်းပျောက်ကင်းစေရန် ဒဏ်ရာအခြေအား အရှင်းဖယ်ထုတ်ခြင်းဖြစ်ပြီး ယင်းကဲ့သို့ ကုသခြင်းမှာ အကောင်းဆုံးနည်းလမ်းဖြစ်သော်လည်း ပေါ့ဘာအနေဖြင့် လာမည့် ၂၀၂၂ ကမ္ဘာ့ဖလားပြီးဆုံးချိန်အထိ အနားယူရမည်ဖြစ်ကြောင်း သိရသည်။

ဒုတိယ နည်းလမ်းမှာလည်း ခွဲစိတ်ကုသခြင်းဖြစ်ပြီး အပိုင်းအစအချို့သာဖယ်ထုတ်ကာ ကုသမည်ဖြစ်သည်။ ယင်းကဲ့သို့ ကုသပါက ပေါ့ဘာအနေဖြင့် (၂)လအတွင်း ဘောလုံးပြန်လည်ကစားနိုင်မည်ဖြစ်ကြောင်း သိရသည်။

တတိယနည်းလမ်းမှာမူ ခွဲစိတ်ကုသခြင်းကို ရှောင်ရှားမည်ဖြစ်ပြီး ကုထုံးဖြင့်သာ ကုသသွားမည်ဖြစ်သည်။ ယင်းကဲ့သို့ ကုသပါက ပေါ့ဘာအနေဖြင့် အလျင်မြန်ဆုံးသက်သာလာမည်ဖြစ်သော်လည်း ဒဏ်ရာပြန်လည်ရရှိနိုင်ရန် အခြေအနေများကြောင်း သိရသည်။ လာမည့်ရက်ပိုင်းအတွင်း ပေါ့ဘာ၏ ဒူးဒဏ်ရာအခြေအနေနှင့်ပတ်သက်၍ ဂျူဗင်တပ်စ်အသင်းက အပြီးသတ်ဆုံးဖြတ်ချက်ချမှတ်သွားဖွယ်ရှိသည်။

အီတလီမီဒီယာများကမူ ပေါ့ဘာ၏ ဒူးဒဏ်ရာအခြေအနေကြောင့် ဂျူဗင်တပ်စ်အသင်းသည် အပြောင်းအရွှေ့ ဈေးကွက်အတွင်း၌ ကွင်းလယ်လူတစ်ဦး ထပ်မံရှာဖွေနေကြောင်း ဖော်ပြခဲ့သည်။ လက်ရှိအချိန်တွင် ဂျူဗင်တပ်စ်အသင်းသည် လာဇီယိုအသင်းမှ မီလင်ကိုဗစ်နှင့် ရိုးမားအသင်းမှ ဗယ်ရီတူတို့ကို ပစ်မှတ်ထားနေသည်။

မီလင်ကိုဗစ်ကို ခေါ်ယူရန် မန်ယူအသင်းအပါအဝင် ဥရောပထိပ်သီးအသင်းအချို့က စိတ်ဝင်စားနေကြောင်း သတင်းများထွက်ပေါ်နေသလို၊ ဗယ်ရီတူကိုလည်း ရိုးမားအသင်းနည်းပြ မော်ရင်ဟိုက လက်လွှတ်မခံလိုကြောင်း သိရသည်။

ထို့ ပြင် ဂျူဗင်တပ်စ်အသင်းသည် ကွင်းလယ်လူအသစ်ခေါ် ယူရန် အတွက် ပြောင်းရွှေ့ကြေးအများအပြားမသုံးချင်ဘဲ မီလင်ကိုဗစ်အတွက် အနည်းဆုံးယူရိုသန်း (၆၀)သုံးရ မည့်အချက်မှာ အခက်အခဲဖြစ်နေသည်။ ဂျူဗင်တပ်စ်အသင်းက မီလင်ကိုဗစ်အတွက် အသင်းမှ အာသာမယ်လိုနှင့် ရာဘီယူတို့ အလိုက်ပေး၍ ကမ်းလှမ်းသွားရန် ပြင်ဆင်နေပြီး ဗယ်ရီတူကိုမူ အငှားစာချုပ်ဖြင့် ခေါ်ယူရန်အတွက် ကမ်းလှမ်းထားကြောင်း သိရသည်။