ဘာစီလိုနာအသင်းသည် လီဗာပူးလ်အသင်းထံမှ ပေါင်သန်း (၁၂၀)ကျော်ဖြင့် ခေါ်ယူထားသည့် ဘရာဇီးလ်ကွင်းလယ်လူ ကော်တင်ဟိုအား ယခုအချိန်တွင် ဘဏ္ဍာရေးအကျပ်အတည်းကြောင့် ပေါင် (၂၁)သန်းဖြင့် ပြန်လည်ရောင်းထုတ်ရန် စီစဉ်နေကြောင်း သိရှိရသည်။
ကော်တင်ဟိုသည် ဘာစီလိုနာအသင်းထံသို့ ပြောင်းရွှေ့လာခဲ့ပြီးကတည်းက ခြေစွမ်းပြကစားနိုင်ခြင်းမရှိသလို၊ ၎င်း၏ လစာငွေမှာလည်း အလွန်မြင့်မားသဖြင့် ဘာစီလိုနာအသင်းသည် ဆက်လက်ထိန်းထားနိုင်ရန် ခက်ခဲနေသည်။
ကော်တင်ဟိုအား ခေါ်ယူလိုသည့် အသင်းများရှိနိုင်သော်လည်း သူ၏ အလွန်မြင့်မားသည့် လစာငွေကြောင့် တရားဝင်ကမ်းလှမ်းမှုလည်း မရှိရာ ဘာစီလိုနာအသင်းသည် အသင်းလူစာရင်းမှ ကော်တင်ဟိုကို မဖြစ်မနေလျှော့ချရန်အ တွက် ပြောင်းရွှေ့ကြေးငွေကို ပေါင် (၂၁)သန်းအထိ လျှော့ချပေးခဲ့ခြင်းဖြစ်ပြီး ယင်းပမာဏဖြင့် ခေါ်ယူရန်အတွက် အေစီမီလန်အသင်းကို မေးမြန်းခဲ့သည်ဟုလည်း စပိန်နှင့် အီတလီသတင်းစာများက ဖော်ပြခဲ့ကြသည်။
Mundo Deportivo သတင်းစာက ဘာစီလိုနာအသင်းသည် ကော်တင်ဟိုအတွက် အလွန်စျေးလျှော့ရောင်းထုတ်ရသည်မှာ မှန်သော်လည်း ကော်တင်ဟို၏ လစာငွေကြောင့် ခေါ်ယူမည့်အသင်းမရှိပါက စာချုပ်ဖျက်သိမ်းပြီး အလွတ်ပြောင်းရွှေ့ကြေးဖြင့် ထွက်ခွင့်ပြုရမည့် အခြေအနေအထိ ဆိုးရွားနေသည်ဟု ဖော်ပြခဲ့သည်။
အဓိကပြဿနာမှာ အသင်း၏ လစာငွေကို မဖြစ်မနေလျှော့ချရန် လိုအပ်နေခြင်းဖြစ်ပြီး တစ်သင်းလုံး၏ လစာငွေမှာ ပေါင် (၁၇၁) သန်းသို့ ရောက်ရှိရန် လိုအပ်နေကြောင်းလည်း သိရှိရသည်။
ဘာစီလိိုနာအသင်းသည် ကော်တင်ဟိုအား ရောင်းထုတ်ရန် စီစဉ်နေသလို ကစားသမားသစ်များခေါ်ယူထားခြင်းကြောင့် နောက်ထပ်ကစားသမားအများအပြားကိုလည်း လျှော့ချရမည့်အနေအထားဖြစ်နေသည်ဟု Football Espana က ဖော်ပြခဲ့သည်။
