ဘောလုံးဝေဖန်သူအဖြစ် လုပ်ကိုင်နေသည့် မန်ယူဂန္ထဝင်ကွင်းလယ်လူဟောင်း ရွိုင်ကင်းက မန်ယူအသင်းအနေဖြင့် ပရီးမီးယားလိဂ်ချန်ပီယံဆုကို စိန်ခေါ်နိုင်ရန်အတွက် ကစားသမားသစ် (၁)ဦး သို့မဟုတ် (၂)ဦးခန့် ခေါ်ယူရဦးမည်ဟု သုံးသပ်ပြောကြားခဲ့သည်။
မန်ယူအသင်းသည် ယခုနွေရာသီအပြောင်းအရွှေ့ကာလတွင် ဒေါ့မွန်အသင်းမှ အင်္ဂလန်တောင်ပံကစားသမား ဆန်ချိုကို ပေါင် (၇၃)သန်း၊ ရီးယဲလ်အသင်းမှ ပြင်သစ်နောက်ခံလူ ဗာရန်းကို ပေါင် (၃၄)သန်း၊ အက်စတွန်ဗီလာအသင်းမှ အင်္ဂလန်ဂိုးသမား ဟီတန်ကို ပြောင်းရွှေ့ကြေးအလွတ်ဖြင့် ခေါ်ယူထားသည်။
သို့သော် ရွိုင်ကင်းက မန်ယူအသင်းအနေဖြင့် ပရီးမီးယားလိဂ်တွင် မန်စီးတီးနှင့် ချယ်လ်ဆီးတို့နောက်တွင်သာ ရှိသေးကြောင်း ပြောကြားခဲ့ခြင်းဖြစ်သည်။
ရွိုင်ကင်းက ”အခုနွေရာသီမှာ မန်ယူအသင်း ပြုလုပ်ထားတဲ့အပြောင်းအရွှေ့တွေက အရမ်းကောင်းပါတယ်။ အထူးသဖြင့် အတွေ့အကြုံရင့်ကျက်တဲ့ ဗာရန်းက အသင်းရဲ့ခံစစ်ပြဿနာကို ဖြေရှင်းပေးနိုင်ပါလိမ့်မယ်။ ဆန်ချိုကလည်း ပါရမီရှင်လူငယ်ကစားသ မားတစ်ဦးဖြစ်ပြီး ဂျာမနီမှာလည်း ခြေစွမ်းပြခဲ့သူပါ။ ဒါပေမဲ့ မန်ယူအနေနဲ့ မန်စီးတီး၊ ချယ်လ်ဆီးတို့နောက်မှာပဲ ရှိသေးပြီး ကစားသမားတစ်ဦး (သို့) နှစ်ဦး ခေါ်ယူဖို့လိုတယ်လို့ထင်ပါတယ်”ဟု ဆိုခဲ့သည်။
မန်ယူအသင်းသည် အက်သလက်တီကိုနောက်ခံလူ ထရစ်ပီယာကို ခေါ်ယူရန်စီစဉ်နေ သည်ဟု သတင်းထွက်နေသည်။
ပရီးမီးယားလိဂ်ချန်ပီယံ အလေးပေးချက်တွင် မန်ယူအသင်းမှာ မန်စီးတီး၊ ချယ်လ်ဆီး၊ လီဗာပူးလ်အသင်းများနောက်တွင်သာ ရေပန်းစားနေကြောင်း သိရသည်။
