ရီးယဲလ်နည်းပြ အန်ဆယ်လော့တီက ပရီးမီးယားလိဂ်ကလပ်အသင်းများအနေဖြင့် ဇန်နဝါရီအပြောင်းအရွှေ့ဈေးကွက်တွင် စံချိန်တင်သုံးစွဲခဲ့သော်လည်း ဥရောပပြိုင်ပွဲများတွင် ယခင်ရှိနေသည့်ပြိုင်ဆိုင်မှုကို လျော့ကျစေမည်မဟုတ်ကြောင်း ပြောကြားခဲ့သည်။
ပရီးမီးယားလိဂ်အသင်းများသည် ပြီးခဲ့သည့်ဇန်နဝါရီတွင် ကစားသမားခေါ်ယူမှုအတွက် ပေါင် (၈၁၅)သန်းအထိ စံချိန်တင်သုံးစွဲခဲ့ပြီး ပေါင်(၂၅)သန်းသာ အသုံးပြုခဲ့သည့် လာလီဂါထက် (၃၃)ဆနီးပါး ပိုများနေသည်။
သို့သော် ပြီးခဲ့သည့် ၂၀၂၁-၂၂ ရာသီတွင် ချန်ပီယံလိဂ်ဖလားကို (၁၄)ကြိမ်မြောက်ရယူခဲ့သည့် ရီးယဲလ်အသင်းနည်းပြ အန်ဆယ်လော့တီက ဇန်နဝါရီတွင် ပရီးမီးယားလိဂ်ကလပ်များအနေဖြင့် ငွေကြေးများစွာသုံးစွဲသော်လည်း ဥရောပတွင် အလွယ်တကူဗိုလ်စွဲမည်မဟုတ်ကြောင်း ဆိုခဲ့ခြင်းဖြစ်သည်။
၎င်းက “ပရီးမီးယားလိဂ်ရဲ့ ရုပ်သံထုတ်လွှင့်ခွင့်က တခြားလိဂ်တွေထက်ပိုမြင့်ပါတယ်။ ချမ်းသာတဲ့ လိဂ်တစ်ခုအနေနဲ့ အခုလိုငွေသုံးတာ မဆန်းပါဘူး။ ဒါပေမဲ့ ဒါက ဥရောပပြိုင်ပွဲတွေရဲ့ ပင်ကိုရှိရင်းစွဲပြိုင်ဆိုင်မှုကို လျော့ကျစေမှာ မဟုတ်ပါဘူး။ ပြီးခဲ့တဲ့ရာသီက ချန်ပီယံလိဂ်ရော ယူရိုပါလိဂ်မှာဗိုလ်စွဲခဲ့တာ အင်္ဂလိပ်ကလပ် မဟုတ်ပါဘူး။ သူတို့ရဲ့ ပြည်တွင်းပြိုင် ဆိုင်မှုကတော့ ပိုကောင်းလာမှာပေါ့” ဟု ဆိုခဲ့သည်။
