အဲဗာတန် ၀-၂ မန်ယူ
ဒီရာသီမှာ မန်ယူအသင်းအတွက် ထူးခြားတာ က အဝေးကွင်းမှတ်တမ်းပဲဖြစ်ပြီး ပြည်တွင်းပွဲတွေ မှာ အဝေးကွင်း(၉)ပွဲစလုံးကို အနိုင်ကစားထားခဲ့ပါတယ်။ မန်ယူနည်းပြ ဆိုးလ်ရှားက လိဒ်စ်နဲ့ပွဲ ပွဲထွက်စာရင်းကို အပြောင်းအလဲများစွာ ပြုလုပ်ခဲ့ပြီး ဘရူနိုဖာနန်ဒက်စ်နဲ့ မက်ဂွိုင်းရားတို့ကိုပဲ ပြန်အသုံးပြုခဲ့တာပါ။ အန်ဆယ်လော့တီရဲ့အဲဗာတန်ကတော့ လူစုံနီးပါး ပွဲထွက်လာခဲ့တာဖြစ်တယ်။ ပထမပိုင်းမှာ မန်ယူအသင်းကစားပုံက ပွဲကို လွှမ်းမိုးမှုရှိပြီး အခွင့်အရေးတွေလည်း ရခဲ့ပါတယ်။
ဗန်ဒယ်ဘိခ် အပိုင်ကန်သွင်းမှု ကိုးလ်မန်းနဲ့ထိထွက်ခဲ့တာ၊ ကာဗာနီရဲ့ နှစ်ဆင့်ကန်ချက် အဲဗာတန်ဂိုးသမား အော်လ်ဆန် တားဆီးနိုင်ခဲ့သလို၊ ပေါ့ဘာကလည်း အပိုင်ခေါင်း တိုက်ခွင့်ရပေမဲ့ ဂိုးသမားတည့်တည့် တိုက်မိခဲ့ပါတယ်။ အဲဗာတန်ကတော့ ဆီဂတ်ဒ်ဆန်ရဲ့ဖရီးကစ်ကန်ချက်ကို ဟန်ဒါဆန် ပုတ်ထုတ်ခဲ့ရတဲ့ တစ်ကြိမ်ပဲ ဂိုးရဖို့ အနီးစပ်ဆုံးဖြစ်ခဲ့ပါတယ်။ အဲဗာတန်နောက်ခံလူ မီနာရဲ့လည်ပင်းကို ကာဗာနီ ဖမ်းဆုပ်ကိုင်ခဲ့ပေမဲ့ အရေးယူမခံရတာတော့ အတော်လေးကံကောင်းပါတယ်။ ကွင်းတွင်းခြေစွမ်းကတော့ ကာဗာနီရဲ့အားထုတ်မှုကို အသိအမှတ်ပြုရမှာဖြစ်ပါတယ်။
အဲဗာတန်အသင်းမှာတော့ ရစ်ချာလီဆန် ဒဏ်ရာကြောင့် ထွက်သွားချိန်မှာ အသင်းတိုက်စစ်က ပိုငြိမ်သက်သွားခဲ့ရပါတယ်။ အဲဗာတန်တိုက်စစ်က ကယ်လ်ဗတ်လူဝင်လည်း တစ်ပွဲလုံးမှာ ဘောလုံးထိချက် အကြိမ်(၃၀)ပဲရှိခဲ့တဲ့အထိ ခြေစွမ်းပျောက်ဆုံးခဲ့ရပါတယ်။ ပွဲက ပယ်နယ်တီကန်ရဖို့ နီးစပ်လာချိန်မှာ ကာဗာနီက (၈၈)မိနစ်မှာ ဂိုးသမားရဲ့ အဝေးထောင့်ထဲကိုကန်သာ အဖွင့်ဂိုးသွင်းယူခဲ့ပြီး မာစီယဲလ်က (၉၆)မိနစ်မှာ ဒုတိယဂိုးထပ်သွင်းခဲ့ပါတယ်။ ဒုတိယဂိုးမရမီ မန်ယူအသင်း သေချာပေါက်ဂိုးရနိုင်တဲ့ (၂)ကြိမ်လောက် ရှိခဲ့ပါတယ်။
