နယူးကာဆယ်၊ အယ်လ်နာဆာအသင်းများနှင့် စီရော်နယ်လ်ဒို သတင်းထွက်နေ

ဆော်ဒီအာရေဗျ ရင်းနှီးမြှုပ်နှံမှုအောက် ရောက်ရှိနေသည့် နယူးကာဆယ်အသင်းနှင့် ဆော်ဒီကလပ် အယ်လ်နာဆာအသင်းများက အသင်းလက်မဲ့ဖြစ်နေသည့် စီရော်နယ်လ်ဒိုကို ခေါ်ယူရန်စိတ်ဝင်စားနေကြောင်း သိရသည်။

စပိန်အားကစားသတင်းစာ Marca က ယင်းနှစ်သင်းထဲမှ တစ်သင်းသင်းနှင့် လက်မှတ်ရေးထိုးဖွယ်ရှိသည်ဟု အတိအလင်းရေးသားခဲ့သည်။

အင်တာဗျူးတွင် စီရော်နယ်လ်ဒိုက နွေရာသီကာလအတွင်း ဆော်ဒီအာရေဗျကလပ်အသင်းတစ်သင်းမှ တစ်ပတ်လစာ ပေါင် (၃)သန်းဖြင့် ကမ်းလှမ်းမှုရရှိခဲ့သည်ဟု အတိအလင်းဝန်ခံပြောကြားထားသည်။

နယူးကာဆယ်အသင်းနည်းပြ အက်ဒီဟောင်းကမူ သက်ကြီးကစားသမားများထက် လူငယ်များပေါ်တွင်သာ ရင်းနှီးမြှုပ်နှံရန် အလိုရှိကြောင်း ပြီးခဲ့သည့်အောက်တိုဘာလအတွင်းက အတည်ပြုပြောကြားခဲ့သည်။

Betfair လောင်းကစားကုမ္ပဏီ၏အလေးပေးချက်တွင် စီရော်နယ်လ်ဒိုသည် ပရိုကစားသမားဘဝစတင်ရာ ကလပ်အသင်းဖြစ်သည့် စပို့တင်းလစ္စဘွန်းအသင်းသို့ ပြန်လည်သွားရောက်ကစားရန် ရေပန်းအစားဆုံးဖြစ်နေကြောင်း သိရသည်။

ယင်းအလေးပေးချက်များတွင် မန်ယူအသင်း၏အဓိကပြိုင်ဘက်ဖြစ်သည့် ချယ်လ်ဆီးအသင်းအပြင် မေဂျာလိဂ်အသင်းတစ်သင်း၊ ဘိုင်ယန်မြူးနစ်နှင့် PSG အသင်းများလည်း ပါဝင်လျက် ရှိသည်။