နယူးကာဆယ်နည်းပြရာထူးအတွက် လောင်းကစားကုမ္ပဏီများ၏ နောက်ဆုံးအလေးပေးမှုတွင် လက်ရှိ ဗီလာရီးယဲလ်နည်းပြ အူနိုင်းအမ်မရီက ရေပန်းအစားဆုံးဖြစ်လာကြောင်း သိရသည်။
အူနိုင်းအမ်မရီသည် PSG နှင့် အာဆင်နယ်အသင်းတို့ကို ကိုင်တွယ်ခဲ့ဖူးသူဖြစ်ပြီး ဆီဗီလာနှင့် ယူရိုပါလိဂ်ချန်ပီယံဆု (၃)ကြိမ်၊ ဗီလာရီးယဲလ်နှင့် ယူရိုပါလိဂ်ချန်ပီယံ ဆု(၁)ကြိမ် ရယူထားသူလည်းဖြစ်သည်။
ဗီလာရီးယဲလ်အသင်းနှင့် ၂၀၂၃ ခုနှစ်အထိ စာချုပ်ချုပ်ဆိုထားသော်လည်း နယူးကာဆယ်အသင်းတာဝန်ရှိသူများက ကစားသမားသစ်ခေါ်ယူရန် ငွေကြေးများစွာသုံးစွဲခွင့်ပြုမည်ဟူသော မက်လုံးဖြင့် ကမ်းလှမ်းရန် စီစဉ်နေကြောင်း သိရသည်။
နယူးကာဆယ်အသင်းသည် အခြားထိပ်တန်းနည်းပြများကို ကမ်းလှမ်းမှု အဆင်မပြေသောကြောင့် အူနိုင်းအမ်မရီကို အရခေါ်ယူရန် စီစဉ်လာခြင်းဖြစ်ပြီး နည်းပြသစ်ကို ယခုတစ်ပတ်အတွင်း ခန့်အပ်နိုင်ရန် လိုလားနေကြောင်းလည်း သိရသည်။
