ဘာစီလိုနာအသင်း၏ ဒိန်းမတ်လက်ရွေးစင်တိုက်စစ်မှူး ဘရေ့ဝိတ်သည် ဂီတာဖေးအသင်းနှင့်ပွဲစဉ်တွင်ရရှိခဲ့သည့် ဒူးဒဏ်ရာကြောင့် (၄)လခန့် အနားယူရဖွယ်ရှိနေပြီး ဘာစီလိုနာအသင်းအနေဖြင့် တိုက်စစ်ပိုင်းအခက်အခဲကို ရင်ဆိုင်ရဖွယ်ရှိနေကြောင်း စပိန်အားကစားသတင်းစာ Marca က ဖော်ပြခဲ့သည်။
အသက် (၃၀)နှစ်အရွယ်ရှိ ဘရေ့ဝိတ်သည် ပြီးခဲ့သည့် သြဂုတ် (၂၉)ရက်နေ့က ယှဉ်ပြိုင်ခဲ့သော ဂီတာဖေးအသင်းအား (၂-၁)ဂိုးဖြင့်အနိုင်ရသည့် လာလီဂါပွဲစဉ်တွင် ၎င်း၏ဒူး၌ ပြဿနာတစ်စုံတစ်ရာရှိကြောင်း ဆေးအဖွဲ့ထံ ပြောကြားခဲ့ပြီး ပွဲချိန် (၇၉)မိနစ်တွင် နီကိုဂွန်ဇာလက်ဇ်နှင့် လူစားလဲခဲ့ရသည်။
ယင်းပွဲအပြီးတွင် ဘရေ့ဝိတ်အနေဖြင့် ဒိန်းမတ်လက်ရွေးစင်အသင်းနှင့် အတူ ၂၀၂၂ ကမ္ဘာ့ဖလား ခြေစစ်ပွဲစဉ်များအတွက် သွားရောက်ပူးပေါင်းခဲ့သော်လည်း ဒဏ်ရာနှင့်ကြံ့ခိုင်မှုပြဿနာကြောင့် ပါဝင်ကစားနိုင်ခဲ့ခြင်း မရှိပေ။
ဘရေ့ဝိတ်အနေဖြင့် နိုင်ငံတကာပွဲစဉ်များအပြီး ဘာစီလိုနာအသင်းသို့ ပြန်လည်ရောက်ရှိလာပြီးနောက် တစ်ဦးတည်းသီးခြားလေ့ကျင့်မှုများပြုလုပ်လျက်ရှိနေပြီး ပြီးခဲ့သည့်တနင်္ဂနွေနေ့က ဆေးစစ်မှုတွင် ဒူးအရွတ်ဒဏ်ရာကို ခံစားနေရကြောင်း တွေ့ရှိခဲ့ခြင်းဖြစ်သည်။
ဘရေ့ဝိတ်အနေဖြင့် ဘာစီလိုနာအသင်း၏လေ့ကျင့်ခန်းအစီအစဉ်များတွင် ပူးပေါင်းခဲ့သော်လည်း ဒူးခေါင်းအလွန်အမင်းနာကျင်မှုကြောင့် ပြီးဆုံးအောင်လေ့ကျင့်နိုင်ခြင်းမရှိသဖြင့် ဆေးစစ်ဆေးမှုကို ပြုလုပ်ခဲ့ခြင်းဖြစ်သည်။
စပိန်အားကစားဂျာနယ်လစ် ဂျရတ်ရိုမဲရိုး၏ ပြောကြားချက်အရ ဘရေ့ဝိတ်သည် ၎င်း၏ဒူးအရွတ်တွင် နာကျင်မှုပြဿနာရှိခဲ့ခြင်းဖြစ်ပြီး ဒဏ်ရာအခြေအနေအရ အနည်းဆုံး (၃)လမှ (၄)လအထိအနားယူရဖွယ်ရှိကြောင်း သိရသည်။
ဘာစီလိုနာအသင်းအနေဖြင့် ဘရေ့ဝိတ်၏ ဒဏ်ရာနှင့်ပတ်သက်ပြီး ခွဲစိတ်မှုပြုလုပ်ရန်သင့်၊ မသင့်ကို မဆုံးဖြတ်ရသေးဘဲ ကစားသမား၏အခြေအနေကိုစောင့်ကြည့်နေကြောင်း Marca က ဖော်ပြခဲ့သည်။
ဘရေ့ဝိတ်၏ ယခုဒဏ်ရာသတင်းမှာ ဘာစီလိုနာအသင်းနှင့် နည်းပြ ရော်နယ်လ်ကိုးမန်းတို့အတွက် စိတ်ပျက်စရာဖြစ်ခဲ့ပြီး လာလီဂါနှင့် ချန်ပီယံလိဂ်ပွဲကျပ်ကာလများအတွက် အသင်း၏တိုက်စစ်ပိုင်းမှာ အခက်အခဲများနှင့်ရင်ဆိုင်ရဖွယ်ရှိနေသည်။
ဘာစီလိုနာအသင်း၏တိုက်စစ်ပိုင်းတွင် ပြီးခဲ့သည့်နွေရာသီအပြောင်းအရွှေ့ကာလအတွင်းက အသင်းခေါင်းဆောင် မက်ဆီနှင့် ဂရီးဇ်မန်းတို့မှာ အသင်းမှထွက်ခွာသွားခဲ့သလို အသစ်ခေါ်ယူထားသည့် အဂွဲရိုး၊ လူငယ်ကစားသမား အန်ဆူဖာတီနှင့် တောင်ပံကစားသမား ဒမ်ဘီလီတို့မှာ ဒဏ်ရာပြဿနာများ၊ ကြံ့ခိုင်မှု မပြည့်ဝမှုများနှင့် ရင်ဆိုင်နေရခြင်း ဖြစ်သည်။
ထို့ကြောင့် လက်ရှိဘာစီလိုနာအသင်း၏တိုက်စစ်ပိုင်းတွင် ဒီပိုင်း၊ လုခ်ဒီယွန်း၊ ကော်တင်ဟိုနှင့် ယူဆက်ဖ်ဒီမီယာတို့သာ ရှိတော့ပြီး နည်းပြ ကိုးမန်းအတွက် ခေါင်းခဲစရာဖြစ်လာမည်ဖြစ်ကြောင်း စပိန်မီဒီယာများက ဖော်ပြခဲ့ကြသည်။
ဘရေ့ဝိတ်သည် ယခုရာသီတွင် ဘာစီလိုနာအသင်း၏တိုက်စစ်ပိုင်းတွင် ခြေစွမ်းပြနေသူဖြစ်ပြီး အသင်းအတွက် လာလီဂါပွဲစဉ် (၃)ပွဲ ပါဝင်ကစားထားရာတွင် သွင်းဂိုး (၂)ဂိုးနှင့် ဂိုးဖန်တီးမှု (၁)ကြိမ် ရရှိထားသူဖြစ်သည်။
