ယခုရာသီသစ်တွင် မန်ယူအသင်းနည်းပြ ဆိုးလ်ရှားက ပရီးမီးယားလိဂ် ပွဲစဉ်နှစ်ပွဲဆက် ပွဲထွက်ဂိုးသမားအဖြစ် ဒီဟေးယားကို အသုံးပြုခဲ့ပြီး လူတန်အသင်းနှင့် လိဂ်ဖလားပွဲတွင်မူ ဟန်ဒါဆန်ကို ကစားစေကာ စက်တင်ဘာ ၃၀ ရက်(ယနေ့) ယှဉ်ပြိုင်ကစားမည့် ဘရိုက်တန်အသင်းနှင့် လိဂ်ဖလားပွဲတွင်လည်း ၎င်းကိုပင် ပွဲထုတ်ကစားရန်မှာ သေချာနေသည့်အနေအထားရှိသည်။
မန်ယူအသင်း၏နံပါတ်တစ်ဂိုးသမားနေရာကို ဟန်ဒါဆန်က ဒီဟေးယားထံမှ လွှဲပြောင်းရယူရန် နီးစပ်လာပြီဟု အသင်းဖော်များက ယုံကြည်နေကြောင်း Daily Mail သတင်းစာက ဖော်ပြခဲ့သည်။
ဟန်ဒါဆန်သည် ရှက်ဖီးယူနိုက်တက်အသင်းတွင် နှစ်ရာသီကြာ အငှားကစားခဲ့ကာ အောင်မြင်မှုရခဲ့ပြီး အသင်းသို့ပြန်ရောက်လာပြီးကတည်းက မန်ယူအသင်း၏နံပါတ်တစ်ဂိုးသမားနေရာအတွက် ပြိုင်ဆိုင်မှုများ ပြင်းထန်လာမည်ဟု သုံးသပ်မှုများရှိခဲ့သည်။
ယခုရာသီသစ်တွင် မန်ယူအသင်းနည်းပြ ဆိုးလ်ရှားက ပရီးမီးယားလိဂ် ပွဲစဉ်နှစ်ပွဲဆက် ပွဲထွက်ဂိုးသမားအဖြစ် ဒီဟေးယားကို အသုံးပြုခဲ့ပြီး လူတန်အသင်းနှင့် လိဂ်ဖလားပွဲတွင်မူ ဟန်ဒါဆန်ကို ကစားစေကာ စက်တင်ဘာ ၃၀ ရက်(ယနေ့) ယှဉ်ပြိုင်ကစားမည့် ဘရိုက်တန်အသင်းနှင့် လိဂ်ဖလားပွဲတွင်လည်း ၎င်းကိုပင် ပွဲထုတ်ကစားရန်မှာ သေချာနေသည့်အနေအထားရှိသည်။ မန်ယူအသင်းနှင့် နီးစပ်သည့် သတင်းရင်းမြစ်များက အသင်း၏နံပါတ်တစ်ဂိုးသမားရွေးချယ်မှုသည်အလွန်ခက်ခဲလာသည်ဟု အသင်းဖော် မန်ယူ ကစားသမားများက ယူဆနေပြီး ဟန်ဒါဆန်အနေဖြင့် ဒီဟေးယားကို ပိုမိုကြီးမားသည့် ဖိအားပေးနေပြီဟု သုံးသပ်လျက်ရှိကြသည်။
ယခုကဲ့သို့ ဗြိတိန်မီဒီယာအချို့က မန်ယူအသင်း၏နံပါတ်တစ်ဂိုးသမား နေရာလုပွဲ ပိုမိုပြင်းထန်လာသည်ဟု သုံးသပ်ရေးသားနေချိန်တွင် ဟန်ဒါဆန်က စက်တင်ဘာလ ၂၈ ရက်ကပြုလုပ်ခဲ့သော အသင်း လေ့ကျင့်ခန်းအစီအစဉ်တွင် ခေါင်းတိုက်တင်းနစ်ကစားရာ၌ ဒီဟေးယားနှင့်တွဲကာ အနိုင်ရရှိခဲ့သည်ဟု သူ၏ Instagram တွင် ပုံနှင့်တကွ တင်ရှိခဲ့သည်။
ဟန်ဒါဆန်က ယခုရာသီတွင် မန်ယူအသင်း၏အရန်ခုံ၌ထိုင်ပြီး ကျေနပ်နေမည်မဟုတ်ကြောင်း စက်တင်ဘာလအစောပိုင်းက တရားဝင်ပြောကြားထားသည်။ “အရန်ခုံမှာထိုင်ပြီး ဘောလုံးမကစားတာဟာ အဆင်ပြေမယ် မထင်ပါဘူး။ ဒါဟာ အသင်းမှာရှိတဲ့ တခြားသူတွေကို ကူညီရာမရောက်ဘူးလို့လည်း ကျွန်တော် ယူဆပါတယ်။ လေ့ကျင့်ရေးမှာ အထူးသဖြင့် ဒါးဗစ်(ဒီဟေးယား)နဲ့ တခြားဂိုးသမားတွေဆီက သင်ယူစရာတွေ အမြောက်အမြားရခဲ့ပါတယ်။ ဒါပေမဲ့ ဘယ်သူကမှ ပွဲကစားချိန်မှာ အရန်ကစားသမားအဖြစ် ရှိနေချင်မယ်မထင်ပါဘူး”ဟု ဟန်ဒါဆန်က ပြောကြားခဲ့ခြင်းဖြစ်သည်။
မန်ယူ နည်းပြ ဆိုးလ်ရှားအနေဖြင့် လိဂ်ဖလားပြိုင် ပွဲတွင် ဟန်ဒါဆန်ကို အခွင့်အရေးပေးထားပြီး ဖြစ်သော်လည်း ယင်းထက်ပိုမိုသည့်ပွဲထွက်ခွင့်ပေးရန်မှာ သေချာသလောက်ရှိနေသည်။ အချို့သတင်းများက ဟန်ဒါဆန်သည် လာမည့်ချန်ပီယံလိဂ်အုပ်စုပွဲစဉ် ခြောက်ပွဲစလုံး တွင် ပွဲထွက်ကစားခွင့်ရဖွယ်ရှိသည်ဟု ဖော်ပြနေသော်လည်း ဆိုးလ်ရှားမှာမူ ချန်ပီယံလိဂ် ပွဲထွက်ခွင့်အတွက် အာမခံချက်ပေးထားခြင်း မရှိကြောင်း သိရသည်။
