ချယ်လ်ဆီးအသင်းသည် ဂျူဗင်တပ်စ်တိုက်စစ်ကစားသမား ဒီဘားလား၏ အခြေအနေကို စောင့်ကြည့်နေပြီး ခေါ်ယူသွားရန် စီစဉ်နေကြောင်း အီတလီမီဒီယာများက ဖော်ပြခဲ့သည်။
အာဂျင်တီးနားတိုက်စစ်ကစားသမား ဒီဘားလားသည် နည်းပြသစ် ပီယာလိုလက်ထက်တွင် ကြံ့ခိုင်မှုပြဿနာများနှင့် ရင်ဆိုင်နေရပြီး ယခုရာသီတွင် အသင်းအတွက် တစ်ပွဲမျှ ပါဝင်ကစားရခြင်းမရှိသေးပေ။
Tutto Mercato Web ဝက်ဘ်ဆိုက်၏ ဖော်ပြမှုအရ ချယ်လ်ဆီးအသင်းသည် ဂျူဗင်တပ်စ်အသင်းနှင့် ဒီဘားလားတို့၏ အခြေအနေကို စောင့်ကြည့်နေပြီး လာမည့်ဇန်နဝါရီအပြောင်းအရွှေ့ကာလတွင် ကမ်းလှမ်းသွားရန် စီစဉ်နေကြောင်း သိရသည်။
အသက် (၂၆)နှစ်အရွယ်ရှိ ဒီဘားလားသည် ဂျူဗင်တပ်စ်အသင်းနှင့် ၂၀၂၂ ခုနှစ်အထိ စာချုပ်သက်တမ်းရှိနေသူဖြစ်ပြီး စာချုပ်သစ်အတွက် ဆွေးနွေးမှုမှာ နှောင့်နှေးနေကြောင်း သိရသည်။
ထို့ပြင် ဂျူဗင်တပ်စ်အသင်း၏ တိုက်စစ်ပိုင်းတွင် မိုရာတာ ရောက်ရှိလာသည့်အတွက် ဒီဘားလားအနေဖြင့် ပုံမှန်ပွဲထွက်ခွင့်ရရန် ရုန်းကန်ရနိုင်ပြီး အသင်းမှထွက်ခွာဖွယ်ရှိသည်ဟု အီတလီမီဒီယာများက သုံးသပ်နေကြသည်။
ဒီဘားလား၏ လက်ရှိစျေးကွက်တန်ကြေးမှာ ယူရိုသန်း (၈၀)သာ ရှိပြီး ချယ်လ်ဆီးအသင်းအနေဖြင့် ယင်းပမာဏကို ပေးချေရန် အသင့်ရှိနေကြောင်း သိရသည်။
