စပါးအသင်းတိုက်စစ်မှူး ဟာရီကိန်းက မန်စီးတီးကွင်းလယ်လူ ဒီဘရိုင်းနားနှင့်တွဲဖက်ကစားလိုကြောင်း ပြောကြားခဲ့သည်။
အသက် (၂၇)နှစ်အရွယ်ရှိ အင်္ဂလန်တိုက်စစ်မှူး ဟာရီကိန်းသည် ယခုရာသီကုန်တွင် စပါးအသင်းမှထွက်ခွာခွင့်တောင်းထားသူဖြစ်ပြီး မန်စီးတီးအသင်းသို့ ပြောင်းရွှေ့ရန် ဆန္ဒရှိနေကြောင်း ဗြိတိန်မီဒီယာများက ဖော်ပြနေကြသည်။
ဟာရီကိန်းသည် မေလ (၂၁)ရက်က Sky Sports တွင် ဘောလုံးသုံးသပ်သူအဖြစ် လုပ်ကိုင်နေသည့် မန်ယူနောက်ခံလူ ဂယ်ရီနဗီးလ်နှင့် အင်တာဗျူးပြုလုပ်ခဲ့သည်။
ယင်းအင်တာဗျူးတွင် ဂယ်ရီနဗီးလ်က မည်သည့်ကစားသမားနှင့် တွဲဖက်ကစားလိုသလဲဟု ဟာရီကိန်းကို မေးမြန်းခဲ့သည်။
အဆိုပါမေးခွန်းကို ဟာရီကိန်းက “ဒီဘရိုင်းနားနဲ့ တွဲဖက်ကစားလိုပါတယ်။ ဒီဘရိုင်းနားက ထူးခြားတဲ့ကစားသမားတစ်ဦးဖြစ်ပြီး မန်စီးတီးအသင်းမှာ သူ ဖန်တီးပေးမှုတွေက တိုက်စစ်မှူးတွေ အကြိုက်တွေ့တဲ့ ဖန်တီးမှုတွေချည်းပါပဲ။ သူဟာ အရမ်းတော်တဲ့ကစားသမားဖြစ်ပြီး ကျွန်တော် တွေ့ဖူးသမျှ ဘောလုံးပေးပို့သူတွေထဲမှာတော့ သူက အကောင်းဆုံးပါ”ဟု ပြောကြားခဲ့သည်။
ယခုရာသီကုန်တွင် စပါးအသင်းမှထွက်ခွာခွင့်တောင်းထားသည့် ဟာရီကိန်းကို ခေါ်ယူရန် မန်စီးတီး၊ မန်ချက်စတာယူနိုက်တက်အပါအဝင် ဥရောပထိပ်တန်းအသင်းများစွာက စိတ်ဝင်စားနေကြောင်း သိရသည်။
ဟာရီကိန်းသည် ယခုရာသီတွင် စပါးအသင်းအတွက် ပြိုင်ပွဲစုံ (၄၈)ပွဲတွင် (၃၂)ဂိုး သွင်းယူထားသည်။
