ဝက်စ်ဟမ်းအသင်း၏ ဥက္ကဋ္ဌဖြစ်သူ ဒေးဗစ်ဆူလီဗန်က ဖီအိုရင်တီးနားအသင်းကို အနိုင်ရဗိုလ်စွဲခဲ့သည့် ကွန်းဖရန့်လိဂ်ဗိုလ်လုပွဲစဉ်သည် ဝက်စ်ဟမ်းအသင်းခေါင်းဆောင် ဒက်ကလန်ရိုက်စ်၏ အသင်းအတွက် နောက်ဆုံးပွဲဖြစ်လာနိုင်ကြောင်းနှင့် မိမိတို့သည် ဒက်ကလန်ရိုက်စ်အား အသင်းမှ ထွက်ခွာလိုပါက ထွက်ခွာခွင့်ပြုမည်ဟု ကတိပေးထားပြီးဖြစ်ကြောင်း အတည်ပြုပြောကြားခဲ့သည်။
အသက် (၂၄) နှစ်အရွယ်ရှိ အင်္ဂလန်လက်ရွေးစင်ကွင်းလယ်လူ ဒက်ကလန်ရိုက်စ်သည် ဥရောပထိပ်တန်းက လပ်အသင်းကြီးများ၏ စိတ်ဝင်စားခြင်းကို ခံနေရသလို ပြည်တွင်းထိပ်တန်းကလပ်အသင်းများဖြစ်သည့် မန်စီးတီး၊ အာဆင်နယ်၊ ချယ်လ်ဆီး၊ မန်ယူနိုက်တက်စသည့် အသင်းများ၏ စိတ်ဝင်စားခြင်းကိုလည်း ခံနေရသည့် ကစားသမားတစ်ဦးဖြစ်သည်။
ဒေးဗစ်ဆူလီဗန်က Talksport နှင့် တွေ့ဆုံရာတွင် “ကျွန်တော့်အထင်တော့ သူ့အပြောင်းအရွှေ့က ဖြစ်လာလိမ့်မယ်လို့ ထင်ပါတယ်။ သူက ဝက်စ်ဟမ်းအသင်းကို ချစ်ပါတယ်။ ဒါပေမဲ့ သူ့အနာဂတ်အတွက်လည်း သူစဉ်းစားပါလိမ့်မယ်။ ကျွန်တော်တို့က သူ့ကို အသင်းက ထွက်ချင်ရင် ထွက်ခွင့်ပေးမယ်လို့လည်း ကတိပေးထားပါတယ်”ဟု ပြောကြားခဲ့သည်။
ဖီအိုရင်တီးနားအသင်းကို အနိုင်ရရှိခဲ့သည့် ပွဲစဉ်အပြီးတွင် ဒက်ကလန်ရိုက်စ်သည် ဝက်စ်ဟမ်းအသင်းသမိုင်းတွင် ဆုဖလားကိုင်မြှောက်ဖူးသည့် တတိယမြောက်အသင်းခေါင်းဆောင်လည်း ဖြစ်လာခဲ့သည်။
ဝက်စ်ဟမ်း အသင်းသမိုင်းတွင် ဒက်ကလန်ရိုက်စ်မတိုင်မီ အသင်းအတွက် ဆုဖလားကိုင်မြှောက်ခဲ့ဖူးသည့် အသင်းခေါင်းဆောင်မှာ (၂) ဦးသာရှိခဲ့ပြီး ဘော်ဘီမိုး (၁၉၆၅) နှင့် ဘီလီဘွန်းစ် (၁၉၇၅၊ ၁၉၈၀) တို့ဖြစ်သည်။
ဒက်ကလန်ရိုက်စ်သည် ကစားသမားဘဝတစ်လျှောက်တွင် ဝက်စ်ဟမ်းအသင်းအတွက် စုစုပေါင်း (၂၄၅)ပွဲကစားကာ၊ (၁၅)ဂိုးသွင်းယူပေးခဲ့သူဖြစ်ပြီး ၂၀၁၆-၁၇ ရာသီက ဝက်စ်ဟမ်းအသင်းအတွက် ပထမဆုံးအကြိမ် ပွဲထွက်ခဲ့သူလည်းဖြစ်သည်။
