ဇန်နဝါရီအပြောင်းအရွှေ့ကာလအတွင်း ကစားသမားသစ်ခေါ်ယူဖို့ အာဆင်နယ်အသင်းပျက်ကွက်ခဲ့မှုအပေါ် သူ့ရဲ့စိတ်ပျက်ရမှုကို အာတီတာက ထုတ်ဖော်ပြောကြားခဲ့ပါတယ်။ ဆာကာ၊ ဂျီးဆပ်စ်တို့လို တိုက်စစ်မှူးတွေ ဒဏ်ရာပြဿနာကြုံတွေ့နေရပေမယ့် ကစားသမားသစ်ခေါ်ယူခဲ့ခြင်း မရှိလို့ ဂန်းနားတွေအတွက် တိတ်ဆိတ်တဲ့ ဇန်နဝါရီအပြောင်းအရွှေ့ဈေးကွက်တစ်ခု ဖြစ်လာခဲ့ပါတယ်။ အစောပိုင်းမှာ အာတီတာက ကလပ်အသင်းအနေဖြင့် တိုက်စစ်ပိုင်းအတွက် အင်အားဖြည့်တင်းမှုတစ်ခု ပြုလုပ်စေချင်တယ်လို့ အတိအလင်းပြောကြားခဲ့ပေမယ့် အသင်းတာဝန်ရှိသူတွေကတော့ နည်းပြရဲ့ဆန္ဒအတိုင်း မလုပ်ဆောင်နိုင်ခဲ့ပါဘူး။
သတင်းတွေအရ မြောက်လန်ဒန်ကလပ်က အိုလီဝက်ကင်စ်အတွက် ပေါင်သန်း ၄၀ တန်ကမ်းလှမ်းမှုတစ်ခု ပြုလုပ်ခဲ့ပေမယ့် အက်စတွန်ဗီလာက အယ်လ်နာဆာဆီ ဂျွန်ဒူရမ်ကို ရောင်းချကာ ငွေကြေးအများအပြား ရရှိလာပြီးနောက် အာဆင်နယ်ရဲ့ကမ်းလှမ်းမှုကို ပယ်ချသွားခဲ့တယ်လို့ သိရပါတယ်။ အလားတူ ဂန်းနားတွေက ဘိုင်ယန်မြူးနစ်တိုက်စစ်မှူးမာသီတဲလ်ကို ခေါ်ယူနိုင်ရေးပြိုင်ပွဲမှာ ပါဝင်ခဲ့ပေမယ့် နောက်ဆုံးမှာတော့ ကစားသမားကိုယ်တိုင်က ခါးသီးပြိုင်ဘက်တော့တင်ဟမ်ဆီ အပြီးသတ်ဝယ်ယူခွင့်ပါဝင်တဲ့ အငှားအပြောင်းအရွှေ့ပုံစံနဲ့ ရောက်ရှိသွားခဲ့ပါတယ်။
သတင်းထောက်တွေနဲ့တွေ့ဆုံချိန် အာတီတာက “ အသင်းအတွက် အကျိုးသက်ရောက်နိုင်စွမ်းရှိတဲ့ ကစားသမားတွေနဲ့အတူ အသင်းလူစာရင်းပိုင်းကို တိုးတက်အောင်လုပ်ဆောင်သွားနိုင်ဖို့ အခွင့်အလမ်းတွေ ရှာဖွေချင်တဲ့အတွက်
ကစားသမားအပြောင်းအရွှေ့တံခါးကို အမြဲတမ်းဖွင့်လှစ်ထားမယ်ဆိုတဲ့ ပြတ်သားတဲ့ရည်ရွယ်ချက်တစ်ခု ကျွန်တော်တို့ဆီမှာ ရှိပါတယ်။ ဒီရည်ရွယ်ချက်အတိုင်း မဖြစ်မြောက်လာလို့ စိတ်ပျက်မိပေမယ့် ကစားသမားအချို့ခေါ်ယူဖို့လိုအပ်နေတယ်ဆိုတာကိုလည်း ကျွန်တော်တို့ ကောင်းကောင်းသိရှိထားပြီး အဲ့ဒီအတိုင်းပဲ လုပ်ဆောင်သွားရပါမယ်။ လုပ်ဆောင်နိုင်မယ်လို့လည်း ထင်ပါတယ်။
ဒါက အလောင်းအစားတစ်ခုမဟုတ်ဘဲ တကယ့်လက်တွေ့အရှိတရားဖြစ်ပါတယ်။ ကျွန်တော်တို့အတွက် တကယ့်လက်တွေ့အရှိတရားကိုပဲ ရင်ဆိုင်သွားရမယ်လို့ ထင်ပါတယ်။ ဒါကြောင့် ကျွန်တော်တို့က အသင်းကို တိုးတက်ပြောင်းလဲလာအောင် လုပ်ဆောင်ပြီး အသင်းအတွက် ရေရှည်အကျိုးရှိစေဖို့ အကယ်ဒမီထွက်ကစားသမားတွေကို ပိုသုံးစွဲသွားရပါမယ်။
ဒါက အမြဲတမ်းတည်ရှိနေတဲ့အလုပ်တစ်ခုဖြစ်ပြီး အမြဲတမ်းတိုးတက်နေဖို့လိုအပ်နေတဲ့ အရာတစ်ခုလည်း ဖြစ်ပါတယ်။ ကျွန်တော်တို့အသင်း တိုက်စစ်ပိုင်းအတွက် လိုက်လျောညီထွေမှုရှိဖို့ အလွန်လိုအပ်ပြီး အခုအချိန်မှာတော့ ကျွန်တော်တို့မှာရှိနေတဲ့သူတွေနဲ့ပဲ ဒီအလုပ်တွေကို လုပ်ဆောင်သွားရပါမယ်။ကစားသမားတွေကိုယ်တိုင်လည်း အသင်းနဲ့လိုက်လျောညီထွေမှုရှိရှိ ပါဝင်အားဖြည့်သွားနိုင်မယ်ဆိုတာ သေချာပါတယ်”လို့ ပြောပါတယ်။
အာဆင်နယ်က ကာရာဘောင်ဖလားဆီမီးဖိုင်နယ်ပထမအကျော့မှာ နှစ်ဂိုးပြတ်အနိုင်ယူသွားတဲ့ နယူးကာဆယ်အသင်းနဲ့ ဒီညမှာ ရင်ဆိုင်သွားရဖို့ ရှိနေပြီး လိုအပ်တဲ့ရလဒ်မျိုးကို ဖန်တီးကာ ဗိုလ်လုပွဲအဆင့်ဆီ တက်ရောက်နိုင်ဖို့ ရည်မှန်းထားပါလိမ့်မယ်။
