ဘာစီလိုနာအသင်း၏ တောင်ပံကစားသမား ကော်တင်ဟိုသည် ရီးယဲလ်မက်ဒရစ်အသင်းနှင့်ပွဲစဉ်တွင် ရရှိခဲ့သည့် တံကောက်ကြောဒဏ်ရာကြောင့် ဂျူဗင်တပ်စ်အသင်းနှင့်ကစားရမည့် ချန်ပီယံလိဂ်အုပ်စုဒုတိယပွဲစဉ်အား လွဲချော်မည်ဖြစ်ကြောင်း သိရသည်။
ကော်တင်ဟိုသည် အဆိုပါ El Clásico ပွဲစဉ်တွင် ပွဲချိန်အတွင်း ဒဏ်ရာရရှိခဲ့သော်လည်း ပွဲပြီးဆုံးသည်အထိ ပါဝင်ကစားသွားခဲ့သည်။
ဘာစီလိုနာအသင်း၏ထုတ်ပြန်ချက်တွင် တနင်္ဂနွေနေ့နံနက်ပိုင်း စစ်ဆေးချက်အရ ကော်တင်ဟို၏ ဘယ်ခြေထောက်တွင် တံကောက်ကြောဒဏ်ရာ ရရှိခဲ့ခြင်းဖြစ်ကြောင်း ပါရှိခဲ့သော်လည်း အနားယူရမည့်အချိန်ကာလကို မထုတ်ပြန်ခဲ့ပေ။
သို့သော် AS သတင်းစာကမူ ကော်တင်ဟိုသည် (၃)ပတ်ခန့် အနားယူရမည်ဖြစ်ပြီး ဂျူဗင်တပ်စ်နှင့်ပွဲအပါအဝင် ဘာစီလိုနာအသင်း၏ ပွဲစဉ်(၄)ပွဲခန့်ကို လွဲချော်ရဖွယ်ရှိကြောင်း ဖော်ပြခဲ့သည်။
