တန်းဆင်းဇုန်အန္တရာယ်ရှိနေသည့် ပရီးမီးယားလိဂ်ကလပ် အဲဗာတန်အသင်းသည် ၂၀၂၁-၂၀၂၂ ရာသီတွင် ထပ်မံအရှုံးပေါ်ခဲ့ကြောင်း ထုတ်ပြန်ခဲ့ပြီး ငါးရာသီဆက်တိုက် အရှုံးပေါ်ခဲ့သောကြောင့် ရမှတ်လျှော့ပြစ်ဒဏ် ချမှတ်ခံရဖွယ်ရှိနေကြောင်း သိရသည်။
အဲဗာတန်အသင်းသည် ၂၀၂၁-၂၀၂၂ ရာသီအတွက် ဘဏ္ဍာရေးရှင်းတမ်းကို ထုတ်ပြန်ရာ ပေါင် ၄၄ ဒသမ ၇ သန်း အရှုံးပေါ်ခဲ့ကြောင်း သိရသည်။ အဲဗာတန်အသင်းအနေဖြင့် ၂၀၂၀-၂၁ ရာသီ တွင် အရှုံးပေါ်ခဲ့သည့် ပေါင် ၁၂၀ ဒသမ ၉ သန်းထက် သုံးဆနီးပါး လျော့ကျသွားသော်လည်း ပြီးခဲ့သည့်ရာသီအပါအဝင် နောက်ဆုံးငါးရာသီဆက်တိုက် အရှုံးပေါ်ခဲ့ခြင်းဖြစ်သည်။ ငါးနှစ်ကာလအတွင်း အဲဗာတန်အသင်း၏ အရှုံးပမာဏမှာ ပေါင်သန်း ၄၃၀ ကျော်အထိ ရှိနေရာ ပရီးမီးယားလိဂ်ပြိုင်ပွဲ၏ ဘဏ္ဍာရေး စည်းမျဉ်းနှင့် ငြိစွန်းနေသည်။
ပရီးမီးယားလိဂ်ပြိုင်ပွဲက ခွင့်ပြုထားသည့်ပမာဏမှာ သုံးရာသီအတွင်း ပေါင် ၁၀၅ သန်းထက် ကျော်လွန်ခြင်းမရှိရသောကြောင့် အဲဗာတန်အသင်းအနေဖြင့် ရမှတ်လျှော့ပြစ်ဒဏ်ချမှတ်ခံရဖွယ်ရှိကြောင်း ဗြိတိန်သတင်းဌာနများက ခန့်မှန်းဖော်ပြနေခြင်းဖြစ်သည်။ ထို့ပြင် အဲဗာတန်အသင်းအနေဖြင့် ၂၀၂၁-၂၀၂၂ ရာသီပြီးဆုံးချိန်တွင် အမြတ်အစွန်းရရှိမှုနှင့် ရေရှည်ရပ်တည်မှုစည်းမျဉ်း ချိုးဖောက်မှုကြောင့် လွတ်လပ်သည့်ကော်မရှင်ဖွဲ့စည်း၍ စုံစမ်းစစ်ဆေးရန် ပရီးမီးယားလိဂ်ပြိုင်ပွဲက မတ် ၂၄ ရက်တွင် ထုတ်ပြန်ထားသည်။
ပရီးမီးယားလိဂ်က ကြားနာမှုကို သီးသန့်ပြုလုပ်ခွင့်ပေးထားသလို အချက်အလက်များကိုလည်း ထုတ်ပြန်ခြင်းမရှိဘဲ လျှို့ဝှက်ထားမည်ဖြစ်ကြောင်း ကြေညာထားသည်။ သို့သော် ပရီးမီးယားလိဂ်ပြိုင်ဘက် အနည်းဆုံးခြောက်သင်းက စုံစမ်းစစ်ဆေးမှုကို ပွင့် လင်းမြင်သာမှုရှိစွာပြုလုပ်ရန် တာဝန်ရှိသူများထံ စာရေးသားပေးပို့၍ တောင်းဆိုထားကြောင်း သိရသည်။ ပရီးမီးယားလိဂ်ပြိုင်ပွဲကလည်း စုံစမ်းစစ်ဆေးမှုကို ယခုရာသီမပြီးဆုံးမီ ဆုံးဖြတ်ချက်ချဖွယ်ရှိကြောင်း တုံ့ပြန်အသိပေးထားသောကြောင့် ရမှတ်လျှော့ပြစ်ဒဏ်ကို ယခုရာသီမှာပင် ကျခံရဖွယ်ရှိနေခြင်း ဖြစ်သည်။
အဲဗာတန်အသင်းသည် ယခုတစ်ပတ် ပွဲစဉ်မတိုင်မီ ၂၈ ပွဲကစားထားပြီး ခြောက်ပွဲသာ အနိုင်ရကာ ရှစ်ပွဲသရေ၊ ၁၄ ပွဲရှုံး၊ ရမှတ် ၂၆ မှတ်ဖြင့် အဆင့် ၁၅ နေရာ ရပ်တည်နေသော်လည်း တန်းဆင်းဇုန်နှင့် နှစ်မှတ်သာ ကွာဟနေသည်။ သို့ဖြစ်ရာ ရမှတ်လျှော့ပြစ် ဒဏ်ချမှတ်ခံရပါက တန်းဆင်းဇုန်အန္တရာယ်အတွက် စိုးရိမ်စရာဖြစ်နေသည်။ အဲဗာတန်အသင်းအနေဖြင့် ပရီးမီးယားလိဂ်အမည်ဖြင့် ကျင်းပသည့် သက်တမ်းတစ်လျှောက် တစ်ကြိမ်မျှ တန်းဆင်းဖူးခြင်းမရှိသလို ၁၉၅၄- ၅၅ ရာသီမှစတင်ကာ အဆင့်မြင့်ဆုံးလိဂ်ပြိုင်ပွဲ၌ ၆၉ ရာသီဆက်တိုက် ပါဝင်ကစားခွင့်ရထားသည်။
