ဝက်စ်ဟမ်းအသင်းနောက်ခံလူ ကတ်ဇူးမားက အိမ်တွင်မွေးထားသည့်ကြောင်ကို ရိုက်နှက်ကန်ကျောက်၍ နှိပ်စက်နေသည့် ဗီဒီယိုရိုက်ခဲ့သော ၎င်း၏ညီဖြစ်သူအား ကလပ်အသင်းက ပွဲကစားခွင့် ဆိုင်းငံ့ထားကြောင်း သိရသည်။
ပြင်သစ်နောက်ခံလူ ဇူးမား (၂၇ နှစ်) သည် အိမ်တွင်မွေးထားသည့် ကြောင်နှစ်ကောင်အနက် တစ်ကောင်ကို ဘောလုံးကဲ့သို့ ကန်ကျောက်ခြင်း၊ မျက်နှာကိုရိုက်ခြင်းပြုလုပ်နေသည့် ဗီဒီယိုဖိုင်မှာ ယခုရက်သတ္တပတ်အစောပိုင်းတွင် လူမှုမီဒီယာများ၌ ပျံ့နှံ့သွား သောကြောင့် ရဲတပ်ဖွဲ့၏ စုံစမ်းစစ်ဆေးမှု ခံနေရသည်။
ယင်းဗီဒီယိုကို ၎င်း၏ညီဖြစ်သူ ယိုအန်ဇူးမား (၂၃ နှစ်) က ရိုက်ကူး၍ Snapchat တွင်တင်ရာမှ လူမှုကွန်ရက်များ၌ ပျံ့နှံ့သွားခြင်းဖြစ်သည်။ ယိုအန်သည် အင်္ဂလန် နိုင်ငံရှိ ပဥ္စမတန်းကလပ် Dagenham & Redbridge အသင်းတွင် ကစားနေသူဖြစ်ပြီး၎င်းအနေဖြင့် ယင်းဖြစ်ရပ်တွင် ပါဝင်ပတ်သက်နေသောကြောင့် ကလပ်အသင်းက ပွဲကစားခွင့် ဆိုင်းငံ့ကြောင်း ကြေညာခဲ့ခြင်းဖြစ်သည်။
“ယိုအန်အနေနဲ့ RSPCA (တိရစ္ဆာန်များ ညှဉ်းပန်းနှိပ်စက်မှုတားဆီးရေးအဖွဲ့) ရဲ့ စုံစမ်းစစ်ဆေးမှုမှာ ပူးပေါင်းကူညီဖို့ အကြောင်းကြားခံထားရပါတယ်။ သူ့အနေနဲ့ စုံစမ်းမှုမှာ အပြည့်အဝ ပူးပေါင်းပါဝင်သွားမှာပါ။ အသင်းအနေနဲ့ တိရစ္ဆာန်တွေအပေါ် ရက်စက်ကြမ်းကြုတ်မှုမှန်သမျှကို ရှုတ်ချကြောင်း ထပ်လောင်းပြောကြားလိုပါတယ်။ ဒါကြောင့် RSPCA ရဲ့ စုံစမ်းစစ်ဆေးမှုတွေ မပြီးမချင်း ယိုအန်ကို ပါဝင်ကစားခွင့်မပြုဖို့ ဆုံးဖြတ်ထားပါတယ်” ဟု ၎င်း၏ကလပ်က ထုတ်ပြန်ခဲ့သည်။
ယိုအန်၏အစ်ကိုဖြစ်သူ ဇူးမားကိုလည်း ဝက်စ်ဟမ်းအသင်းက တစ်ပွဲပယ်ပြစ်ဒဏ်နှင့် ဒဏ်ကြေးပေါင်နှစ်သိန်းခွဲ ချမှတ်ထားသလို Adidas ကုမ္ပဏီက ဝတ်စုံစပွန်ဆာစာချုပ် ဖျက်သိမ်းခဲ့သည်။