ပြင်သစ်နည်းပြ ဒေးရွှမ့်က ပိုလန်အားအနိုင်ရသည့်ပွဲတွင် ဆွဲကြိုးဝတ်ဆင်ခဲ့သည့် အသင်းနောက်ခံလူ ခွန်ဒဲ၏လုပ်ရပ်အတွက် မပျော်မရွှင်ဖြစ်မိကြောင်း ပြောကြားခဲ့သည်။
ဒီဇင်ဘာ (၄)ရက်က ကစားခဲ့သည့် ၂၀၂၂ ကမ္ဘာ့ဖလား ရှုံးထွက် (၁၆) သင်းအဆင့်ပွဲစဉ် ပြင်သစ် (၃-၁)ပိုလန်ပွဲတွင် ပြင်သစ်နောက်ခံလူ ခွန်ဒဲသည် ဆွဲကြိုးဝတ်ဆင်ကစားခဲ့ခြင်းဖြစ်သည်။
နိုင်ငံတကာဘောလုံးဘုတ် အဖွဲ့ (IFAB)၏ စည်းမျဉ်း နံပါတ် (၄)အရ ကစားသမားများအနေဖြင့် အန္တရာယ်ဖြစ်စေမည့် အရာဝတ္တုများ မဝတ်ဆင်ရ၊ လက်ဝတ်ရတနာဝတ်ဆင်မှုကို ပိတ်ပင်သည်ဟု ပါရှိသည်။
သို့သော် ပြင်သစ်-ပိုလန်ပွဲတွင် ခွန်ဒဲဆွဲကြိုးဝတ်ဆင်ခြင်းကို မည်သူမျှမသိခဲ့ဘဲ မိနစ် (၄၀)တွင်မှ ဒိုင်လူကြီးက သိရှိခဲ့ကာ ၎င်းကို ဆွဲကြိုးချွတ်ခိုင်းခဲ့သည်။
ယင်းဖြစ်ရပ်နှင့်ပတ်သက်ပြီး ဒေးရွှမ့်က “သူ ဆွဲကြိုးဝတ်ထားမှန်း ကျွန်တော် မသိခဲ့ပါဘူး။ သူက လေ့ကျင့်ရေးအစီအစဉ်မှာ ဆွဲကြိုးဝတ်လေ့ရှိလို့ သူနည်းနည်းအယူသီးတယ်ဆိုတာတော့ ကျွန်တော် သိပါတယ်။ ပိုလန်နဲ့ပွဲအပြီးမှာ မင်းအဝါကတ်မထိတာ ကံကောင်းတယ်လို့ ခွန်ဒဲကို ပြောခဲ့ပါတယ်။ ဒါမျိုး နောက်တစ်ခါမဖြစ်စေရပါဘူး” ဟု ပြောကြားခဲ့သည်။