နာမည်ကျော် ရုပ်သံကုမ္ပဏီတစ်ခုဖြစ်သည့် DAZN သည် လာမည့်ရာသီ၌ ဆော်ဒီပရိုလိဂ်ပြိုင်ပွဲ၏ ဗြိတိန်ရုပ်သံထုတ်လွှင့်ခွင့်ကို ရယူနိုင်ခဲ့ကြောင်း သိရသည်။
ဆော်ဒီပရိုလိဂ်ပြိုင်ပွဲမှာ ယခုနွေရာသီတွင် ဥရောပမှ ထိပ်တန်းကစားသမားများစွာကို ခေါ်ယူနိုင်ခဲ့သည့်အတွက် ပရိသတ်စိတ်ဝင်စားသည့် လိဂ်ပြိုင်ပွဲတစ်ခု ဖြစ်လာခြင်းကြောင့် DAZN က နိုင်ငံအလိုက် ရုပ်သံထုတ်လွှင့်ခွင့်များကို ရယူနေခြင်းဖြစ်သည်။
DAZN သည် ဆော်ဒီပရိုလိဂ်ပြိုင်ပွဲကို ဂျာမနီနှင့် သြစတြီး ယားနိုင်ငံတို့၌ ထုတ်လွှင့်ပြသခွင့်လည်း ရယူထားနိုင်ခဲ့ပြီး ယခု ဗြိတိန်တွင် ပြသခွင့်ထပ်မံရရှိ ခဲ့ခြင်းဖြစ်ကြောင်း သိရသည်။ Sky Sports သည် ပြီးခဲ့သည့်ရာသီတွင် အယ်လ်နာဆာအသင်းသို့ စီရော်နယ်လ်ဒို ပြောင်းရွှေ့ခဲ့ပြီးနောက် ဆော်ဒီပရိုလိဂ်၏ ရုပ်သံထုတ်လွှင့်ခွင့်ရယူခဲ့ သော်လည်း ယခု DAZN က တစ်ရာသီလုံးပြသခွင့် ပထမဆုံးရရှိခြင်းအဖြစ် မှတ်တမ်းဝင်မည်ဖြစ်ကြောင်း သိရသည်။
DAZN သည် ဆော်ဒီပရိုလိဂ်ပြိုင်ပွဲကို အမေရိကန်နိုင်ငံတွင် ထုတ်လွှင့်ပြသခွင့်ရရန်လည်း ဆက်လက်ဆွေးနွေးနေကြောင်း သိရသည်။ ဆော်ဒီပရိုလိဂ်ပြိုင်ပွဲ၏ ၂၀၂၃-၂၄ ရာသီ ကို ယခုတစ်ပတ်သောကြာနေ့တွင် စတင်မည်ဖြစ်ပြီး ဥရောပလိဂ်ပြိုင်ပွဲအများစုနည်းတူ မေလတွင် အဆုံးသတ်မည်ဖြစ်သည်။
အဖွင့်ပွဲစဉ်၌ ဂျရတ်ကိုင်တွယ်နေသည့် အယ်လ်အက်တီဖာအသင်းနှင့် စီရော်နယ်လ်ဒိုကစားနေသည့် အယ်လ်နာဆာတို့ ဆုံတွေ့သည့်ပွဲလည်း ရှိနေသည်။
