ဆီးဂိမ်းစ် အမျိုးသားဘောလုံးပြိုင်ပွဲကို ယူ-၂၂ ပြိုင်ပွဲအဖြစ် ဆက်လက်ကျင်းပမည်ဖြစ်ပြီး အသက်ကျော်ကစားသမားအရေအတွက်ကို ပြန်လည်အတည်ပြုမည်

ကမ္ဘောဒီးယားနိုင်ငံက အိမ်ရှင်အဖြစ် လက်ခံကျင်းပမည့် (၃၂)ကြိမ်မြောက် ဆီးဂိမ်းစ်ပြိုင်ပွဲ၏ အမျိုးသားဘောလုံးပြိုင်ပွဲကို ယူ-၂၂ ပြိုင်ပွဲအဖြစ် ဆက်လက်ကျင်းပမည်ဖြစ်ကြောင်း သိရသည်။

ဆီးဂိမ်းစ် အမျိုးသားဘောလုံးပြိုင်ပွဲကို ယခင်က လက်ရွေးစင်အဆင့်ပြိုင်ပွဲအဖြစ် ကျင်းပခဲ့သော်လည်း ၂၀၀၁ ခုနှစ်မှစတင်ကာ သက်တမ်းအလိုက်ပြိုင်ပွဲအဖြစ် ပြောင်းလဲခဲ့ခြင်းဖြစ်သည်။ ၂၀၀၁ ခုနှစ် ၂၀၁၅ ခုနှစ်အထိ ယူ-၂၃ ပြိုင်ပွဲ၊ ၂၀၁၇ ခုနှစ်မှစတင်ကာ ယူ- ၂၂ ပြိုင်ပွဲအဖြစ် ပြောင်းလဲကျင်းပခဲ့ခြင်းဖြစ်သည်။ ထို့ပြင် ၂၀၁၉ ဖိလစ်ပိုင် ဆီးဂိမ်းစ်ပြိုင်ပွဲမှစတင်ကာ အသက်ကျော်ကစားသမားများ ထည့်သွင်းအသုံးပြုခွင့်ပေးခဲ့ပြီး ၂၀၁၉ ဖိလစ် ပိုင်ဆီးဂိမ်းစ် ပြိုင်ပွဲတွင် (၂)ဦး၊ ပြီးခဲ့သည့် ဗီယက်နမ်ဆီးဂိမ်းစ်ပြိုင်ပွဲတွင် (၃)ဦး အသုံးပြုခွင့်ပေးခဲ့သည်။ 

လာမည့်ဆီးဂိမ်းစ်ပြိုင်ပွဲ တွင် အသက်ကျော်ကစားသမားများ ထည့်သွင်းအသုံးပြု ခွင့်ပေးမည်ဖြစ်သော်လည်း အရေအတွက်ကိုမူ ထပ်မံအတည်ပြုမည်ဖြစ်သည်။ အသက်ကျော်ကစားသမားအဖြစ် အနည်းဆုံး နှစ်ဦးအသုံးပြုခွင့်ရှိပြီး ပြီးခဲ့သည့် ဆီးဂိမ်းစ်ပြိုင်ပွဲအတိုင်း (၃)ဦးလည်း ခွင့်ပြုပေးဖွယ်ရှိ ကြောင်း သိရသည်။ 

ကမ္ဘောဒီးယား အိုလံပစ်ကော်မတီသည် အိမ်ရှင်အဖြစ် ပထမဆုံးလက်ခံကျင်းပမည့် ၂၀၂၃ ဆီး ဂိမ်းစ်ပြိုင်ပွဲ ဘောလုံးအားကစားနည်းတွင် အမျိုးသား၊ အမျိုးသမီးပြိုင်ပွဲနှစ်ခုစလုံး ထည့်သွင်းကျင်းပမည်ဖြစ်ပြီး အမျိုးသမီးဘောလုံးပြိုင်ပွဲကိုမူ အသက်ကန့်သတ်ချက် မထားဘဲ လက်ရွေးစင်အဆင့်ပြိုင်ပွဲအဖြစ် ဆက်လက်ကျင်းပသွားမည်ဖြစ်သည်။ ကမ္ဘောဒီးယားအိုလံပစ်ကော် မတီသည် အိမ်ရှင်အဖြစ်လက်ခံကျင်းပမည့် ဆီးဂိမ်းစ်ပြိုင်ပွဲ တွင် အမျိုးသားအသင်းကို ဆုတံဆိပ်ရယူနိုင်ရန်၊ အမျိုး သမီးအသင်းကို ခြေစွမ်းအဆင့်မီစွာယှဉ်ပြိုင်နိုင်ရန် လေ့ကျင့်ပြင်ဆင်လျက်ရှိကြောင်း သိရသည်။

မြန်မာအသင်းမှာမူ အမျိုးသား၊ အမျိုးသမီးပြိုင်ပွဲ နှစ်ခုစလုံးတွင် ဝင်ရောက်ယှဉ်ပြိုင်မည်ဖြစ်သည်။ လာမည့် ဆီးဂိမ်းစ်ပြိုင်ပွဲယှဉ်ပြိုင်မည့် မြန်မာ ယူ-၂၂ အမျိုးသား အသင်းကို နည်းပြချုပ်အဖြစ် ဘူလ်ဂေးရီးယားနိုင်ငံသား ပိုပေါ့ဗ်က ဆက်လက်ကိုင်တွယ်သွားမည်ဖြစ်ပြီး လက်ရှိ အချိန်တွင် စခန်းဝင်လေ့ကျင့်ခြင်း မရှိသေးသော်လည်း ယခုနှစ်ကုန်ပိုင်းတွင် စတင်ပြင်ဆင်ဖွယ်ရှိနေသည်။ မြန်မာ ယူ-၂၂ အသင်းသည် လာမည့်နှစ်တွင် ဆီးဂိမ်းစ်ပြိုင်ပွဲ  အပါအဝင် အခြားနိုင်ငံတကာပြိုင်ပွဲများ ဝင်ရောက်ယှဉ် ပြိုင်ရမည်ဖြစ်ပြီး ယင်းပြိုင်ပွဲများအပေါ်မူတည်၍ လေ့ ကျင့်ပြင်ဆင်သွားမည်ဖြစ်သည်။ 

ပိုပေါ့ဗ်သည် ဆီးဂိမ်းစ် ပြိုင်ပွဲ (၃)ကြိမ်ဆက်တိုက် မြန်မာ ယူ-၂၂ အသင်းကို ကိုင်တွယ်ခွင့်ရခြင်းဖြစ်ပြီး သက်တမ်းအလိုက် ပြောင်းလဲပြီးနောက်ပိုင်း အကြိမ်အများဆုံး ကိုင်တွယ်ခွင့်ရသည့် နည်းပြအဖြစ် မှတ်တမ်းဝင်ခဲ့သည်။ ဆီးဂိမ်းစ် အမျိုးသားဘောလုံးပြိုင်ပွဲကို သက်တမ်းအလိုက်ပြောင်းလဲပြီးနောက် မြန်မာအသင်းများကို နည်းပြများအနေဖြင့် တစ်ကြိမ်လျှင် တစ်ဦးသာ ကိုင်တွယ်ခဲ့ပြီး ပိုပေါ့ဗ်မှာမူ ပထမဆုံးအဖြစ် (၃)ကြိမ်ဆက်တိုက် ကိုင်တွယ်ခွင့်ရခြင်းဖြစ်သည်။

ပိုပေါ့ဗ်သည် ၂၀၁၉ ဖိလစ်ပိုင်ဆီးဂိမ်းစ် ပြိုင်ပွဲ၊ ၂၀၂၁ ဗီယက်နမ်ဆီးဂိမ်းစ်ပြိုင်ပွဲတို့တွင် ကိုင်တွယ်ခွင့်ရခဲ့ပြီး ကြေးတံဆိပ်တစ်ခု ရရှိထားသည်။ ပိုပေါ့ဗ်သည် ဖိလစ်ပိုင်ဆီး ဂိမ်းစ်ပြိုင်ပွဲတွင် ကြေးဆုရရှိအောင် စွမ်းဆောင်နိုင်ခဲ့သော်လည်း ဗီယက်နမ်ဆီးဂိမ်းစ်ပြိုင်ပွဲတွင် ဆုနှင့်လွဲချော်ခဲ့သည်။