လိုက်ပ်ဇစ် ၂-၁ အက်သလက်တီကို
ပိုကောင်းတဲ့အသင်း အနိုင်ရခဲ့တဲ့ပွဲလို့ပဲ ဆိုရမှာဖြစ်ပြီး လိုက်ပ်ဇစ်အသင်းက ဆီမီးဖိုင်နယ်အဆင့်ကို အသင်းရဲ့သမိုင်းတစ်လျှောက် ပထမဆုံးအကြိမ်အဖြစ် တက်ရောက်နိုင်ခဲ့ပါတယ်။ လူငယ်နည်းပြ နာဂယ်စ်မန်းရဲ့ လိုက်ပ်ဇစ်အသင်းက အဓိကတိုက်စစ်မှူး တီမိုဗာနာ မရှိတော့ပေမယ့် နာမည်ကျော်တိုက်စစ်မှူးတွေ ပိုင်ဆိုင်ထားတဲ့ အက်သလက်တီကိုအသင်းထက် တိုက်စစ်ကစားပုံ ပိုကောင်းခဲ့ပါတယ်။
![](https://sportsmyan.com/wp-content/uploads/2020/08/Leipzig-vs-Atletico-2-1024x536.jpg)
အသင်းလိုက် အချိတ်အဆက်မိမိနဲ့ ကစားနိုင်ခဲ့သလို၊ မာမာကျောကျော မြန်မြန်ဆန်ဆန်ကစားနိုင်ခဲ့တဲ့ လိုက်ပ်ဇစ်ကို အက်သလက်တီကိုအသင်း ကစားကွက်မှာ မယှဉ်နိုင်ခဲ့ပါဘူး။ အက်သလက်တီကိုနည်းပြ ဆီမြွန်နီက ဒီယေဂိုကော်စတာ၊ လော်ရန်တေးအတွဲနဲ့ ပွဲထွက်ခဲ့ပြီး ယာအိုဖီးလစ်နဲ့ မိုရာတာတို့ကို ဒုတိယပိုင်းမှာမှ ထည့်သွင်းအသုံးပြုခဲ့တာပါ။
လိုက်ပ်ဇစ်အသင်းက ပွဲစတာနဲ့ ဖိအားပေးကစားနိုင်ခဲ့သလို၊ အူပါမယ်ကာနို ဦးဆောင်တဲ့ ခံစစ်ပိုင်းကလည်း အက်သလက်တီကိုတိုက်စစ် ကျော်ဖြတ်လို့မရလောက်အောင် ကောင်းမွန်ခဲ့ပါတယ်။ ပထမပိုင်းမှာ လိုက်ပ်ဇစ်အသင်း ဂိုးရရှိအောင် မစွမ်းဆောင်နိုင်ခဲ့ပေမယ့် ဒုတိယပိုင်း ပွဲချိန် မိနစ်(၅၀)မှာ အော်လ်မိုက ဆာဘစ်ဇာရဲ့ပေးပို့မှုကနေ ဦးဆောင်ဂိုးကို ခေါင်းတိုက်သွင်းယူခဲ့ပါတယ်။
![](https://sportsmyan.com/wp-content/uploads/2020/08/Leipzig-vs-Atletico-1024x536.jpg)
(၇၁)မိနစ်မှာတော့ ယာအိုဖီးလစ်က သူ့ကြောင့်ရတဲ့ ပယ်နယ်တီကို သူ ကိုယ်တိုင်ကန်သွင်းပြီး ချေပဂိုးရယူခဲ့ပါတယ်။ ဒါပေမဲ့ (၈၈)မိနစ်မှာ အဒမ်စ်ရဲ့ကန်ချက် ဆာဗစ်နဲ့ထိပြီး လမ်းကြောင်းပြောင်း ဂိုးဝင်သွားခဲ့တာကြောင့် လိုက်ပ်ဇစ်အသင်း အနိုင်ဂိုးရရှိခဲ့ပါတယ်။
အနိုင်ဂိုးသွင်းယူခဲ့တဲ့ အဒမ်စ်ကတော့ လိုက်ပ်ဇစ်ကစားသမားဘဝတစ်လျှောက် ပထမဆုံးဂိုးသွင်းယူနိုင်ခဲ့တာဖြစ်ပါတယ်။