ဆီနီဂေါအသင်းနှင့်ကစားခဲ့သည့် ၂၀၂၂ ကမ္ဘာ့ဖလား ခြေစစ်ပွဲတွင် ဆီနီဂေါပရိသတ်များသည် ဆာလာကို အဓိကပစ်မှတ်ထားကာ အီဂျစ်ကစားသမားများအား လူမျိုးရေးခွဲခြားမှုများနှင့် တိုက်ခိုက်မှုများပြုလုပ်ခဲ့ကြောင်း အီဂျစ်ဘောလုံးအဖွဲ့ချုပ် (EFA) က စွပ်စွဲခဲ့သည်။
မတ် (၂၉) ရက်က ကစားခဲ့သည့် ၂၀၂၂ ကမ္ဘာ့ဖလား ခြေစစ်ပွဲ အာဖရိကဇုန် တတိယအဆင့်(ဒုတိယအကျော့) ပွဲစဉ် ဆီနီဂေါ (၁-ဝ) အီဂျစ်ပွဲတွင် အိမ်ရှင် ဆီနီဂေါပရိသတ်များသည် ပြိုင်ဘက် အီဂျစ်ကစားသမားများကို အနှောင့်အယှက်ပေးခဲ့ခြင်းဖြစ်သည်။
ဆီနီဂေါပရိသတ်များသည် အီဂျစ်ကစားသမားများ စီးနင်းလာသည့် ဘတ်စ်ကားကို တိုက်ခိုက်မှုများပြုလုပ်ခဲ့သလို၊ သွေးပူလေ့ကျင့်ခန်း ပြုလုပ်ရာတွင် အီဂျစ်ကစားသမားများကို ကျောက်ခဲများ၊ ရေဘူးများဖြင့် ပစ်ပေါက်မှုများပြုလုပ်ခဲ့ကြောင်း သိရသည်။
ထို့ပြင် ဆီနီဂေါပရိသတ်များသည် ဆာလာကို အဓိကပစ်မှတ်ထားကာ လူမျိုးရေးခွဲခြားမှုများနှင့် တိုက်ခိုက်မှုများ ပြုလုပ်ခဲ့ကြကြောင်း သက်သေဓာတ်ပုံများနှင့်တကွ ၎င်းတို့၏ Instagram တွင် ရေးသားခဲ့သည်။
အီဂျစ်အသင်းသည် ဆီနီဂေါအသင်းကို အိမ်ကွင်းတွင် (၁-ဝ)ဂိုးဖြင့်အနိုင်ရပြီး အဝေးကွင်းတွင် (ဝ-၁)ဂိုးနှင့် ပြန်လည်အရေးနိမ့်ခဲ့သဖြင့် ပယ်နယ်တီအဆုံးအဖြတ်ခံယူခဲ့ရာတွင် (၁-၃) ဂိုးဖြင့် အရေးနိမ့်ခဲ့ခြင်းဖြစ်သည်။
ပယ်နယ်တီအဆုံးအဖြတ်ခံယူရာတွင်လည်း ဆီနီဂေါပရိသတ်များသည် ဆာလာအပါအဝင် အီဂျစ်ကစားသမားများ၏ မျက်နှာကို လေဆာများဖြင့်ထိုးကာ နှောင့်ယှက်ခဲ့ရာ အီဂျစ်အသင်းအနေဖြင့် ပယ်နယ်တီ (၄)လုံးကန်သွင်းရာတွင် (၁)လုံးသာ ဂိုးဝင်ခဲ့ပြီး ပထမဆုံးပယ်နယ်တီကန်သွင်းသည့် ဆာလာမှာလည်း ဂိုးဘားကျော်သွားခဲ့ရသည်။
ထို့ပြင် ဆီနီဂေါပရိသတ်များသည် ပွဲအပြီးတွင် အီဂျစ်ကစားသမားများကို အရာဝတ္ထုများနှင့် ပစ်ပေါက်ခဲ့ရာ ဆာလာမှာ အစောင့်အရှောက်များနှင့် ကွင်းမှထွက်ခွာခဲ့ရသည်။
ယခုဖြစ်ရပ်နှင့်ပတ်သက်ပြီး ကမ္ဘာ့ဘောလုံးအဖွဲ့ချုပ်(ဖီဖာ)မှ ပြောရေးဆိုခွင့်ရှိသူတစ်ဦးက ပွဲအစီရင်ခံစာကို လေ့လာဆန်းစစ်နေကြောင်း ဆိုခဲ့သည်။
