ဂျူဗင်တပ်စ်အသင်းသည် စီရော်နယ်လ်ဒို အသင်းပြောင်းရွှေ့မည်ကိုစိုးရိမ်သဖြင့် နည်းပြ ဆာရီအား ရာထူးမှထုတ်ပယ်ခဲ့ခြင်းဖြစ်ကြောင်း သတင်းများ ထွက်ပေါ်နေသည်။
ချန်ပီယံလိဂ်ရှုံးထွက် (၁၆) သင်းအဆင့်တွင် လိုင်ယွန်အသင်းကို အဝေးဂိုးစည်းမျဉ်းဖြင့် ရှုံးနိမ့်ကာ ထွက်ခွာခဲ့ရပြီး နောက်တစ်ရက်အကြာ၌ နည်းပြဆာရီအား ဂျူဗင်တပ်စ်အသင်း ရာထူးမှ ထုတ်ပယ်ခဲ့ခြင်းဖြစ်သည်။
![](https://sportsmyan.com/wp-content/uploads/2020/08/juventus-cristiano-ronaldo-and-sari-2-1024x536.jpg)
ဆာရီကို ရာထူးမှထုတ်ပယ်ခဲ့ပြီးနောက် ဂျူဗင်တပ်စ်အသင်းသည် ယူ-၂၃ အသင်းနည်းပြအဖြစ် ခန့်အပ်ထားသည့် အီတလီဂန္ထဝင်ကွင်းလယ်လူ ပီယာလိုအား အစားထိုးခန့်အပ်ခဲ့သည်။
ဆာရီသည် လက်ရှိရာသီတွင် ဂျူဗင်တပ်စ်အသင်းကို (၉)ရာသီဆက် စီးရီးအေချန်ပီယံဖြစ်အောင် စွမ်းဆောင်ပေးခဲ့သော်လည်း ကိုပါအီတာလီယာချန်ပီယံဆုအား လက်လွှတ်ခဲ့ရသလို၊ ချန်ပီယံလိဂ်ပြိုင်ပွဲမှလည်း စောစီးစွာထွက်ခဲ့ရသဖြင့် ရာထူးမှထုတ်ပယ်ခံရခြင်းဖြစ်သည်။
![](https://sportsmyan.com/wp-content/uploads/2020/08/Andrea-Pirlo-juventus-5-1024x536.jpg)
ထို့ပြင် ဆာရီ၏နည်းဗျူဟာများသည်လည်း ဝေဖန်ခံခဲ့ရပြီး နောက်ပိုင်းပွဲစဉ်များတွင် အသင်း၏ အဓိကတိုက်စစ်မှူး စီရော်နယ်လ်ဒိုကိုယ်တိုင် ဆာရီ၏နည်းဗျူဟာများအပေါ် စိတ်ပျက်နေကာ ဆာရီကို နည်းပြအဖြစ် ဆက်လက်ခန့်အပ်ထားပါက အသင်းမှထွက်ခွာမည်ဟု ခြိမ်းခြောက်ခဲ့ကြောင်း သတင်းများထွက်ပေါ်ခဲ့သည်။
စီရော်နယ်လ်ဒိုသည် ဆာရီထုတ်ပယ်ခံရခြင်းနှင့်ပတ်သက်၍ တရားဝင်ပြောဆိုခြင်းမရှိသော်လည်း ၂၀၁၉-၂၀ ရာသီအပေါ် သုံးသပ်မှုများပြုလုပ်ခဲ့သည်။
![](https://sportsmyan.com/wp-content/uploads/2020/08/Juventus-Cristiano-Ronaldo-1024x536.jpg)
စီရော်နယ်လ်ဒိုက ”၂၀၁၉-၂၀ ရာသီက ကျွန်တော်တို့အတွက် ပြီးဆုံးခဲ့ပါပြီ။ ကျွန်တော်တို့ ပြန်ပြီးသုံးသပ်ရမယ့်အချိန်မျိုးပေါ့။ အနိမ့်အမြင့် အတက်အကျတွေကို ပြန်ပြီးသုံးသပ်ဆင်ခြင်ရမယ့်အချိန်မျိုးလည်း ဖြစ်တယ်။ ပြန်လည်သုံးသပ်ဆင်ခြင်တာဟာ တိုးတက်ဖို့အတွက်နည်းလမ်းတစ်ခုပါပဲ။ ဂျူဗင်တပ်စ်လိုအသင်းမျိုးက ကမ္ဘာ့အကောင်းဆုံးအသင်းတစ်သင်းဖြစ်အောင် အမြဲတမ်းအကောင်းဆုံးကြိုးစားနေရပါမယ်။ ခက်ခဲတဲ့ရာသီတစ်ခုမှာ စီးရီးအေချန်ပီယံဆုရယူနိုင်ခဲ့လို့ ကျွန်တော် ဂုဏ်ယူပါတယ်။ ကျွန်တော်ကိုယ်တိုင်လည်း ဒီရာသီမှာ (၃၇) ဂိုးအထိ သွင်းယူနိုင်ခဲ့ပြီး အနာဂတ်အတွက် ရည်မှန်းချက်အသစ်တွေလည်း မျှော်တွေးခွင့်ရလာပါပြီ။ ဒါပေမဲ့ ပရိသတ်တွေက ဒီထက်ပိုကောင်းတဲ့အရာတွေကို မျှော်လင့်တောင်းဆိုနေကြပြီး ကျွန်တော်တို့အနေနဲ့ အမြင့်ဆုံး မျှော်လင့်ချက်တွေကြား ရှင်သန်နိုင်ရပါမယ်”ဟု ပြောကြားခဲ့သည်။
စီရော်နယ်လ်ဒိုသည် PSG အသင်းသို့ ပြောင်းရွှေ့ရန် စိတ်ဝင်စားနေကြောင်း ပြင်သစ်မီဒီယာများက ဖော်ပြနေသည်။