လီဗာပူးလ်နည်းပြ ယာဂန်ကလော့ပ်က စီရော်နယ်လ်ဒိုနှင့် ဆာလာကို နှိုင်းယှဉ်ရန် မလိုကြောင်း ပြောကြားခဲ့သည်။
လီဗာပူးလ်အသင်းသည် ပရီးမီးယားလိဂ်ပွဲစဉ် (၉)အဖြစ် အောက်တိုဘာ (၂၄)ရက်(တနင်္ဂနွေနေ့)တွင် မန်ချက်စတာယူနိုက်တက်အသင်းကို အဝေးကွင်း၌ သွားရောက်ယှဉ်ပြိုင်ရမည်ဖြစ်သည်။
မန်ချက်စတာယူနိုက်တက်ပွဲအတွက် ပြုလုပ်ခဲ့သည့် ပွဲကြိုသတင်းစာရှင်းလင်းပွဲတွင် သတင်းထောက်တစ်ဦးက စီရော်နယ်လ်ဒိုနှင့် ဆာလာတို့ကို နှိုင်းယှဉ်ရန် မေးမြန်းခဲ့ရာ ကလော့ပ်က ယင်းကဲ့သို့ ပြောကြားခဲ့ခြင်းဖြစ်သည်။
ကလော့ပ်က “ကျွန်တော်တို့ ဘာကြောင့် နှိုင်းယှဉ်နေမှာလဲ။ သူတို့နှစ်ဦးစလုံးက ကမ္ဘာ့အဆင့်ကစားသမားတွေဆိုတာ အားလုံးလည်း သိပြီးသားပါ။ စီရော်နယ်လ်ဒိုရဲ့ ဘယ်ခြေက မဆိုးပေမဲ့ ဆာလာရဲ့ ဘယ်ခြေက ပိုကောင်းတယ်လို့ ကျွန်တော် ပြောနိုင်တယ်။ စီရော်နယ်လ်ဒိုက အမြင့်ဘောနဲ့ ညာခြေမှာ ဆာလာထက် ပိုကောင်းနိုင်တယ်။ မြန်နှုန်းကတော့ နှစ်ဦးစလုံး အတော်လေးမြန်ပြီး ဂိုးလိုချင်တဲ့ စိတ်လည်း အရမ်းကြီးမားကြတယ်။ ဒါပေမဲ့ အဲဒီအကြောင်းတွေကို ဘယ်တုန်းက ကျွန်တော် မတွေးခဲ့ပါဘူး။ နှိုင်းယှဉ်ရတာကို စိတ်မဝင်စားလို့ တောင်းပန်ပါတယ်”ဟု ပြောကြားခဲ့သည်။
ကလော့ပ်အနေဖြင့် ယခုပွဲကြိုသတင်းစာရှင်းလင်းပွဲတွင် ယင်းကဲ့သို့ ပြောကြားခဲ့သော်လည်း ယခုလအစောပိုင်းက လက်ရှိတွင် ဆာလာမှာ ကမ္ဘာ့အကောင်းဆုံးကစားသမားဖြစ်သည်ဟု ပြောကြားခဲ့ဖူးသည်။
ပရီးမီးယားလိဂ်ပွဲစဉ် (၈)အပြီးတွင် လီဗာပူးလ်တိုက်စစ်မှူး ဆာလာက (၇)ဂိုးဖြင့် ဂိုးသွင်းအများဆုံးစာရင်းတွင် လက်စတာတိုက်စစ်မှူး ဗာဒီနှင့် ပူးတွဲဦးဆောင်နေပြီး မန်ချက်စတာယူနိုက်တက်ဝါရင့်တိုက်စစ်မှူး စီရော်နယ်လ်ဒိုက (၃)ဂိုး သွင်းယူထားသည်။
