အာဆင်နယ်နည်းပြ အာတီတာက ရီးယဲလ်အသင်းမှ စပိန်ကွင်းလယ်လူ စီဘယ်ယော့စ်ကို တစ်ရာသီအငှားဖြင့် ထပ်မံခေါ်ယူနိုင်ခဲ့သည့်အတွက် ဝမ်းသာကြောင်း ပြောကြားခဲ့သည်။
အသက် (၂၄)နှစ်အရွယ်ရှိ စီဘယ်ယော့စ်သည် ပြီးခဲ့သည့် ၂၀၁၉-၂၀ ရာသီတွင် အာဆင်နယ်အသင်းထံသို့ အငှားလာရောက်ကစားခဲ့ပြီး ခြေစွမ်းပြနိုင်ခဲ့သူဖြစ်သည်။
ထို့ကြောင့် အာဆင်နယ်အသင်းသည် ၎င်းကို ခေါ်ယူရန် အကြိမ်ကြိမ်ကြိုးပမ်းခဲ့ပြီး ယခုအခါ တစ်ရာသီအငှားဖြင့် ထပ်မံခေါ်ယူနိုင်ခဲ့ခြင်းဖြစ်သည်။
အာတီတာက “ဒန်နီ(စီဘယ်ယော့စ်)ဟာ ပြီးခဲ့တဲ့ရာသီက အသင်းအတွက် အရေးကြီးတဲ့ အခန်းကဏ္ဍကနေ ပါဝင်ခဲ့ပြီး ခြေစွမ်းပြနိုင်ခဲ့ပါတယ်။ ဒန်နီရဲ့ စိတ်ဓာတ်ကို ကျွန်တော် သဘောကျပါတယ်။ သူက စွမ်းရည်မြင့်ကစားသမားတစ်ဦးပါ။ သူ့ကို ခေါ်ယူနိုင်ခဲ့လို့ ကျွန်တော်တို့ ဝမ်းသာပါတယ်”ဟု ပြောကြားခဲ့သည်။
စီဘယ်ယော့စ်သည် ပြီးခဲ့သည့်ရာသီက အာဆင်နယ်အသင်းအတွက် ပြိုင်ပွဲစုံ (၃၆)ပွဲတွင် (၂)ဂိုးသွင်းပေးခဲ့သည်။
အာဆင်နယ်အသင်းသည် ယခုနွေရာသီအပြောင်းအရွှေ့ကာလတွင် ချယ်လ်ဆီးအသင်းမှ ဘရာဇီးလ်တောင်ပံကစားသမား ဝီလီယံ၊ လိုင်လီအသင်းမှ ဘရာဇီးလ်နောက်ခံလူ ဂါဘရီရယ်လ်တို့ကို ခေါ်ယူထားသလို၊ ပြီးခဲ့သည့်ရာသီက အငှားလာရောက်ကစားခဲ့သည့် ဘရာဇီးလ်နောက်ခံလူ ပါဘလိုမာရီနှင့် ပေါ်တူဂီနောက်ခံလူ စီဒရစ်တို့ကိုလည်း အပြီးသတ်ခေါ်ယူထားသည်။
