မန်ယူအသင်းခေါင်းဆောင် နောက်ခံလူ မက်ဂွိုင်းရား၏လစာမှာ စာချုပ်အရ တိုးမြင့်လာသောကြောင့် ၎င်းအား ယခုနွေရာသီတွင် ရောင်းချနိုင်ရန် ပိုမိုခက်ခဲဖွယ်ရှိကြောင်း ဗြိတိန်အခြေစိုက် Daily Mail သတင်းဌာနက သုံးသပ်ဖော်ပြခဲ့သည်။
မန်ယူအသင်းသည် ပြီးခဲ့သည့်ရာသီကုန်တွင် အဆင့် ၃ နေရာ ရပ်တည်နိုင်ခဲ့သောကြောင့် လာမည့်ရာသီတွင် ချန်ပီယံလိဂ်ဝင်ခွင့် ပြန်လည်ရရှိထားသည်။ သို့ဖြစ်ရာ မက်ဂွိုင်းရားအပါအဝင် ကစားသမားများအနေဖြင့် စာချုပ်ပါစည်းမျဉ်းအရ လစာခံစားခွင့်မှာ ယခင်ရာသီထက် တိုးမြင့်လာမည်ဖြစ်သည်။
မန်ယူအသင်းအနေဖြင့် ပုံမှန်ပွဲထွက်ခွင့်ပျောက်ဆုံးနေသည့် မက်ဂွိုင်းရားကို ယခုနွေ ရာသီတွင် ရောင်းချရန် စီစဉ်ထားသော်လည်း တိုးမြင့်လာသည့် ၎င်း၏လစာနှုန်းထားအရ အခက်အခဲများ ရင်ဆိုင်ရဖွယ်ရှိနေခြင်းဖြစ်သည်။
မန်ယူအသင်းသည် ၂၀၁၉ ခုနှစ် နွေ ရာသီတွင် မက်ဂွိုင်းရားအား နောက်ခံလူများ အတွက် ကမ္ဘာ့စံချိန်တင်ပြောင်းရွှေ့ကြေး ပေါင်သန်း ၈၀ ဖြင့် ခေါ်ယူထားခြင်းဖြစ်ပြီး အစောပိုင်းရာသီများ၌ ပုံမှန်ကစားခွင့်ရသော်လည်း ပြီးခဲ့သည့်နှစ်တွင် အဲရစ်တန်ဟက် ရောက်ရှိလာပြီးနောက် ပွဲထွက်ကစားခွင့် ပျောက်ဆုံးခဲ့သည်။
၎င်းသည် ပြီးခဲ့သည့်ရာသီ ပရီးမီးယားလိဂ်ပြိုင်ပွဲ၌ ပွဲထွက်ကစားသမား အဖြစ် ရှစ်ပွဲနှင့် လူစားဝင်အဖြစ် ရှစ်ပွဲသာ ကစားခွင့်ရသည်အထိ အခြေအနေဆိုးရွားခဲ့သည်။ အဲရစ်တန်ဟက်သည် လီဆန်ဒရိုမာတီနက်ဇ်နှင့် ဗာရန်းအတွဲကို ဦးစားပေးအသုံးပြုခဲ့ပြီး ၎င်းတို့မကစားနိုင်ပါက လင်ဒီလော့ဖ်နှင့် လုခ်ရှောအတွဲကို အသုံးပြုခဲ့ခြင်းဖြစ်သည်။
