စပါးကွင်းလယ်ကစားသမား ဘစ်ဆူးမားက မိမိတို့အသင်းအနေဖြင့် ပရီးမီးယားလိဂ်ချန်ပီယံဖြစ်နိုင်ကြောင်း ပြောကြားခဲ့သည်။ စပါးအသင်းသည် ယခုရာသီတွင် ပွဲစဉ် (၁၀)အထိ ရလဒ်များ တောက်လျှောက်ကောင်းမွန်ခဲ့ပြီးမှ နောက်ဆုံးကစားခဲ့သည့်ပွဲစဉ် (၂)ပွဲတွင် ချယ်လ်ဆီးနှင့် ဝုလ်ဗ်အသင်းတို့ကို ဆက်တိုက်ရှုံးနိမ့်ခဲ့ရသည်။
သို့သော် စပါးအသင်းသည် ယခုရာသီ ပရီးမီးယားလိဂ်ပွဲစဉ် (၁၂)အပြီးတွင် ရမှတ် (၂၆) မှတ်ဖြင့် အဆင့် (၄)နေရာ၌ ရပ်တည်နေပြီး အမှတ်ပေးဇယားထိပ်ဆုံးမှ မန်စီးတီးအသင်း (၂၈ မှတ်)နှင့် (၂)မှတ်သာ ကွာဟသည်။
စပါးအသင်းသည် ပရီးမီးယားလိဂ်ချန်ပီယံဆုအတွက် ရေပန်းစားမှုတွင် မန်စီးတီး၊ အာဆင်နယ်နှင့် လီဗာပူးလ်တို့နောက် အဆင့် (၄)နေရာတွင် ရှိနေသော်လည်း စပါးကွင်းလယ်ကစားသမား ဘစ်ဆူးမားကမူ မိမိတို့အသင်း ချန်ပီယံဖြစ်နိုင်ကြောင်း ပြောကြားခဲ့ခြင်းဖြစ်သည်။
ဘစ်ဆူးမားက “ပရီးမီးယားလိဂ်ပြိုင်ပွဲမှာ မလွယ်ကူဘူးဆိုတာကို ကျွန်တော်တို့ သိပါတယ်။ အရမ်းခက်ခဲတဲ့ပွဲစဉ်တွေ ရှိလာပါလိမ့်မယ်။ ဒါပေမဲ့ ကျွန်တော်တို့အနေနဲ့ ကိုယ့်ကိုယ်ကို အာရုံစိုက်ပြီး အကောင်းဆုံးကြိုးစားမယ်ဆိုရင် ရည်မှန်းချက်တွေပြည့်မြောက်ဖို့ အခွင့်အရေးရလာမှာပါ။ ပရီးမီးယားလိဂ်ထိပ်ဆုံးမှာ မနေချင်သူ ဘယ်သူရှိမလဲ။ ဘုရားသခင်က ဆုံးဖြတ်ပေးမယ်ဆိုရင် ကျွန်တော်တို့ ပရီးမီးယားလိဂ်ချန်ပီယံ ဖြစ်နိုင်ပါတယ်”ဟု ပြောကြားခဲ့သည်။
