စပါးနည်းပြ မော်ရင်ဟိုက အသင်း၏ကစားပုံနှင့်ပတ်သက်ပြီး ပတ်သက်ပြီး ဝေဖန်နေသူများကို ဘောလုံးတွင် နိုင်ပွဲရရေးက အရေးအကြီးဆုံးဖြစ်ကြောင်း ပြန်လည်တုံ့ပြန်ခဲ့သည်။
စပါးအသင်းသည် လီဗာပူးလ်အသင်းကို (၁-၂)ဂိုးဖြင့် ရှုံးနိမ့်ခဲ့သည့် ပရီးမီးယားလိဂ်အဝေးကွင်းပွဲစဉ်တွင် ဘောလုံးပိုင်ဆိုင်မှု (၂၄)ရာခိုင်နှုန်းသာ ရှိခဲ့သော်လည်း လီဗာပူးလ်အသင်းထက် အပိုင်ဂိုးသွင်းခွင့် ပိုမိုရရှိခဲ့သည်။
သို့သော် အဆိုပါပွဲစဉ်တွင် ခံစစ်ပိတ်ကာ တန်ပြန်တိုက်စစ်ဖြင့် ကစားခဲ့သည့် စပါးအသင်း၏ ကစားပုံကို ဘောလုံးဝေဖန်သူများနှင့် ဗြိတိန်မီဒီယာများက ဖေဝန်ခဲ့ကြသည်။
ယင်းဝေဖန်မှုများနှင့်ပတ်သက်ပြီး လက်စတာအသင်းနှင့်ကစားမည့်ပွဲအတွက် ပြုလုပ်သည့် မီဒီယာတွေ့ဆုံမှုတွင် သတင်းထောက်များက မေးမြန်းခဲ့ရာ မော်ရင်ဟိုက “အဲဒါတွေကို ကျွန်တော် မသိပါဘူး။ ပွဲစဉ်တွေ ဆက်တိုက်ကစားနေရတော့ သတင်းစာတွေလည်း သိပ်မဖတ်ဘူး။ ကျွန်တော့်ကို လာပြောတဲ့ သတင်းတွေလောက်ပဲ ကျွန်တော် သိတာပါ။ ဒါပေမဲ့ ကျွန်တော်တို့အသင်း ဘယ်လိုကစားရမလဲဆိုတာကို ကျွန်တော် ကောင်းကောင်း သိပါတယ်။ ပြီးတော့ ဘောလုံးပွဲတွေမှာ နောက်ဆုံးရလဒ်က အရေးအပါဆုံးဆိုတာကို ကျွန်တော် သိပါတယ်။ ဒီတော့ ဘာဆက်ပြောရဦးမလဲ။ ပြီးပြီလေ”ဟု ပြောကြားခဲ့သည်။
စပါးအသင်းသည် ယခုရာသီ ပရီးမီးယားလိဂ်ပွဲစဉ် (၁၃)အပြီးတွင် ရမှတ် (၂၅)မှတ်ဖြင့် အဆင့် (၂)နေရာ၌ ရပ်တည်နေပြီး အဆင့်(၁)နေရာမှ လီဗာပူးလ်(၂၈ မှတ်)နှင့် (၃)မှတ်သာ ကွာဟသည်။
စပါးအသင်းသည် ပရီးမီးယားလိဂ်ပွဲစဉ် (၁၄)အဖြစ် ယနေ့(ဒီဇင်ဘာ ၁၉ ရက်)တွင် လက်စတာအသင်းကို အိမ်ကွင်း၌ လက်ခံကစားရမည်ဖြစ်သည်။
