စပါးအသင်း၏နည်းပြသစ် ပိုစတီကိုဂလူက အသင်းကို ဖျော်ဖြေမှုပေးနိုင်သည့် တိုက်စစ်အသင်းအဖြစ် တည်ဆောက်ပုံဖော်သွားမည်ဟု ပြောကြားခဲ့သည်။
ပိုစတီကိုဂလူသည် ဇွန်(၆)ရက်ကတည်းက စပါးအသင်း၏နည်းပြအဖြစ် ခန့်အပ်ခံခဲ့ရပြီး ဇူလိုင်(၁)တွင် အသင်းနှင့် စတင်လက်တွဲခဲ့သည်။ ယင်းနေ့၌ ပထမဆုံးအင်တာဗျူးအစီအစဉ်ပြုလုပ်ပြီး ရာသီသစ်အတွက် အစီအစဉ်များနှင့် ၎င်း၏စိတ်ကူးများကို မေးမြန်းခဲ့ရာ ပိုစတီကိုဂလူက ယင်းကဲ့သို့ ပြောကြားခဲ့ခြင်းဖြစ်သည်။
“ကျွန်တော် အနိုင်ယူရတာ ကြိုက်ပါတယ်။ ဒါက အဓိကအကြောင်းအရာလည်း ဖြစ်ပါတယ်။ ဘောလုံးဆိုတာကလည်း အောင်မြင်မှုတွေ ရယူဖို့ လုပ်ဆောင်ရတာပါ။ ဒါပေမဲ့ ဘောလုံးရဲ့ စိတ်လှုပ်ရှားစရာတွေအကြောင်း ပြောတဲ့အခါ လူတွေက နောက်ဆုံးရလဒ်ကိုပဲ ပြောတာမဟုတ်ပါဘူး။ ဘယ်လို ကစားခဲ့သလဲဆိုတာကိုလည်း ပြောကြပါတယ်။ ဒါဟာ ကျွန်တော့်အတွက် တကယ့်ကို အရေးကြီးပါတယ်။ ကျွန်တော်က ပွဲတစ်ပွဲမှာ ပရိသတ်တွေအတွက် အမှတ်ရစရာအခိုက်အတန့်တွေကိုလည်း ဖန်တီးပေးချင်တာကြောင့်ပါ။ ပရိသတ်တွေကို ဖျော်ဖြေပေးမှုပေးပြီး နိုင်ပွဲတွေရယူနိုင်တဲ့အသင်း ဖြစ်လာဖို့ ကျွန်တော် အလိုရှိပါတယ်” ဟု ပိုစတီကိုဂလူက ပြောကြားခဲ့သည်။ စပါးအသင်းသည် ဇူလိုင်(၁၈)တွင် ဝက်စ်ဟမ်းနှင့် ခြေစမ်းမည်ဖြစ်သည်။
