ချယ်လ်ဆီးအသင်းပိုင်ရှင် အေဘရာမိုဗစ်ချ်သည် မန်စီးတီးအသင်းနည်းပြ ဂွါဒီယိုလာအား နည်းပြအဖြစ်ခန့်အပ်ရန် (၆)ကြိမ်တိုင် ကြိုးပမ်းဖူးခဲ့ကြောင်း ဗြိတိန်သတင်းစာ The Athletic က ဖော်ပြခဲ့သည်။
ပြီးခဲ့သည့်စနေနေ့က ကစားခဲ့သော FA ဖလားဆီမီးဖိုင်နယ် ပွဲစဉ်ချယ်လ်ဆီး(၁-၀) မန်စီးတီးပွဲမတိုင်မီ The Athletic က ယင်းကဲ့သို့ဖော်ပြခဲ့ခြင်းဖြစ်ပြီး အေဘရာမိုဗစ်ချ်၏ ပထမဆုံးကြိုးပမ်းမှုမှာ လွန်ခဲ့သည့် (၁၁)နှစ်ဖြစ်သော၂၀၁၀ ခု နှစ်ကတည်းက စတင်ခဲ့ကြောင်းသိရှိရသည်။
ထိုစဉ်က ချယ်လ်ဆီးအသင်းသည် နည်းပြ အန်ဆယ်လော့တီကို ရာထူးမှထုတ်ပယ်ပြီး ဂွါဒီယိုလာနှင့်အစားထိုးရန် စီစဉ်ခဲ့ခြင်းဖြစ်သည်။
ထို့နောက် ရာသီကုန်တွင် အန်ဆယ်လော့တီနှင့် လမ်းခွဲပြီးနောက်တွင်လည်း ထပ်မံကြိုးပမ်းခဲ့သေးကြောင်း သိရသည်။
ထို့အတူ နည်းပြ ဘိုအက်ရှ်ကို ရာထူးမှထုတ်ပယ်ခဲ့သည့် ၂၀၁၂ ခုနှစ်ကလည်း ဂွါဒီယိုလာကိုခေါ်ယူရန် ကြိုးပမ်းခဲ့သေးကြောင်း သိရသည်။
