၀၂၀-၂၀၂၁ ရာသီ လာလီဂါပြိုင်ပွဲ ရာသီအဖွင့်ပွဲစဉ်ဖြစ်သည့် ဂရန်နာဒါ-ဘီလ်ဘာအိုပွဲကို သောကြာနေ့ (ယနေ့) အစား စနေနေ့သို့ ပြောင်းလဲလိုက်ပြီဖြစ်ကြောင်း သိရသည်။
ယင်းပွဲစဉ်ကို သောကြာနေ့ ဒေသစံတော်ချိန် ညနေ (၆) နာရီခွဲ (မြန်မာစံတော်ချိန် ည ၁၁ နာရီ) တွင် ယှဉ်ပြိုင်ကစားရန် စီစဉ်ထားသော်လည်း စနေနေ့ ည (၈)နာရီ (၄၅) မိနစ် (မြန်မာစံတော်ချိန် တနင်္ဂနွေနေ့ နံနက် ၁ နာရီ ၁၅ မိနစ်) သို့ ပြောင်းလဲခဲ့ခြင်းဖြစ်သည်။
လာလီဂါပြိုင်ပွဲကို စနေ၊ တနင်္ဂနွေမဟုတ်ဘဲ တနင်္လာ၊ သောကြာစသည့် ကြားရက်များတွင် ယှဉ်ပြိုင်ကစားရန် လာလီဂါနှင့် စပိန်ဘောလုံး အဖွဲ့ချုပ်(RFEF) တို့ သဘောတူညီမှုမရသဖြင့် ရွှေ့ဆိုင်းခဲ့ရခြင်းဖြစ်သည်။
ထို့ပြင် တနင်္လာနေ့တွင်ကစားမည့် အလာဗတ်စ်-ဘက်တစ်ပွဲကိုလည်း တနင်္ဂနွေသို့ ပြောင်းလဲခဲ့ရကြောင်း သိရသည်။
လာလီဂါနှင့် RFEF တို့အကြား ပွဲကျင်းပသည့်ရက်နှင့်ပတ်သက်၍ အငြင်းပွားနေသည်မှာ ကာလအတန်ကြာပြီဖြစ်ပြီး စပိန်အားကစားကောင်စီထံ အယူခံဝင်သွားမည်ဖြစ်ကြောင်း လာလီဂါက ကြေညာထားသည်။
ပြီးခဲ့သည့်ရာသီ လက်ကျန်ပွဲစဉ်များကို ကြားရက်များတွင်ပါ ကျင်းပရန် RFEF က ခွင့်ပြုခဲ့ခြင်းမှာ COVID-19 ရောဂါဖြစ်ပွားမှု ကြောင့် (၃)လကျော်ကြာ ရပ်နားခဲ့ရသဖြင့် ခြွင်းချက်အဖြစ် ခွင့်ပြုပေးခဲ့ခြင်းဖြစ်သည်။
