ခြေစွမ်း မတက်ဘဲ ဝိတ်တက်လာတဲ့ ဂန်းနားစတား ကို ကြည့်ပြီး စိတ်ပျက်လက်ပျက် ဖြစ်နေကြတဲ့ အာဆင်နယ် ပရိသတ်များ

အာဆင်နယ် အသင်း နဲ့ ပထမဆုံး ရာသီမှာ ၃၇ ပွဲ ကစားပြီး သွင်းဂိုး ၁ ဂိုးသာ သွင်းယူ နိုင်ခဲ့တဲ့ ဝီလီယံ ရဲ့ ရာသီသစ် ခြေစွမ်း အပေါ် အာဆင်နယ် ပရိသတ်တွေဟာ များများစားစား သိပ်မမျှော်လင့် ထားကြပါဘူး ။

ဒါပေမယ့် အခု အချိန်မှာ အာဆင်နယ် ပရိသတ်တွေဟာ ဝီလီယံ ရဲ့ ခန္ဓာကိုယ် ဖွဲ့စည်းပုံကို ကြည့်ပြီး အတော်လေး စိတ်ပျက် နေကြပါပြီ ။ အာဆင်နယ် ပရိသတ်တွေဟာ ဟိုင်ဘာနီယန် ရဲ့ ခြေစမ်းပွဲမှာ ဝီလီယံ တစ်ယောက် ကိုယ်အလေးချိန်တက်လာတာကို သတိထား မိသွား ခဲ့တာ ဖြစ်ပါတယ် ။

အာဆင်နယ် အသင်းဟာ ရာသီကြို ပထမဆုံး ခြေစမ်းပွဲ အဖြစ် စကော့တလန် ကလပ် ဟိုင်ဘာနီယန် အသင်း နဲ့ ကစားခဲ့ပြီး နှစ်ဂိုး တစ်ဂိုး နဲ့ အရေးနိမ့် ခဲ့ရပါတယ် ။ အာဆင်နယ် အသင်း ပွဲထွက် လူစာရင်းမှာ အူဘာမီယန်း ၊ နယ်လ်ဆင် ၊ နကီတီးယား ၊ ဝီလီယံ တို့ ပါဝင် ပေမယ့် ဟိုင်ဘာနီယန် ကို အသာစီးရအောင် မကစား နိုင်ခဲ့ပါဘူး ။

ဟိုင်ဘာနီယန် နဲ့ ပွဲမှာ အာဆင်နယ် ပရိသတ်တွေဟာ ဝီလီယံ တစ်ယောက် အရင်တုန်းကထက် ဗိုက်သိသိသာသာ ပူနေတာကို သတိထားမိသွားခဲ့ပြီး ဆိုရှယ် မီဒီယာ ထက်မှာ သူတို့ရဲ့ ခံစားချက်ကို ထုတ်ဖော် ရေးသား ခဲ့ကြပါတယ် ။

ပရိသတ် တစ်ယောက်ဆို ဝီလီယံ ပုံကို ကြည့်ပြီး ” ငါ သူ့ကို ကြည့်ပြီး မျက်လုံးထဲကနေ မျက်ရည် အစစ်တွေတောင် ကျလာပြီကွာ ။ ” လို့ ရေးသား ထားကာ အခြား ပရိသတ် တစ်ဦးကလည်း ” ဝီလီယံ ပုံက မကြာခင် ကစားသမား ဘဝက အနားယူတော့မယ့် ပုံပေါက်နေပြီ ။ တစ်ချိန်တုန်းက တောင်ပံမှာ သိပ်ကောင်းခဲ့တဲ့ ကစားသမားက အခု ဘာဖြစ်သွားတာလဲ မသိဘူး ။ ” လို့ ရေးသား ခဲ့ပါတယ် ။

ဒါ့အပြင် နောက်ထပ် ပရိသတ် တစ်ဦးကလည်း ” ဝီလီယံ က သူ့စားသောက်ဆိုင် ကို ကောင်းကောင်း ထောက်ပံ့ ပေးထားတယ် ဆိုတာ မြင်သာတဲ့ သက်သေ တစ်ခုပါပဲ ။ ” လို့ ဟာသနှော ရေးသား ခဲ့ပါတယ် ။

ဝီလီယံ ဟာ ပြီးခဲ့တဲ့ ရာသီမှာ ချဲလ်ဆီး အသင်းကနေ အာဆင်နယ် အသင်းကို အလွတ် ပြောင်းရွှေ့ကြေး နဲ့ ရောက်ရှိ လာသူ ဖြစ်ပြီး သူ့ရဲ့ပထမဆုံး ရာသီမှာ ပရိသတ်တွေ စိတ်ကြိုက် ခြေစွမ်း မပြနိုင်ခဲ့တဲ့ ကစားသမား ဖြစ်ပါတယ် ။

ဘရာဇီးသား ဝီလီယံ ဟာ အသက် ၃၂ နှစ် အရွယ် ရှိပြီး အာဆင်နယ် အသင်း နဲ့ စာချုပ် သက်တမ်း ၂ နှစ် ကျန်ရှိ နေပါသေးတယ် ။ ဝီလီယံ ဟာ အာဆင်နယ် အသင်းမှာ တစ်ပတ် လုပ်ခ ပေါင် ၂ သိန်းကျော် ရရှိနေသူ ဖြစ်တာကြောင့် လစာမြင့် ကစားသမား တစ်ဦးပါ ။

ဒေးဗစ်ဘက်ခမ်း ရဲ့ အင်တာမီယာမီ အသင်းဟာ ဒီနွေရာသီမှာ ဝီလီယံ ကို ခေါ်ယူဖို့ ကြိုးပမ်း ခဲ့ဖူးပြီးကစားသမားဘက်က တစ်ပတ်လုပ်ခ ပေါင် ၁၆၇၀၀၀ ၊ တစ်နှစ်လုပ်ခ ၈.၇ သန်း အထိ တောင်းဆိုခဲ့တာကြောင့် အပြောင်းအရွှေ့ မဖြစ်မြောက် လာခဲ့တာ ဖြစ်ပါတယ် ။