‘ ချဲလ်ဆီး ရဲ့ အပြောင်းအရွှေ့ လှုပ်ရှားမှုတွေကို ပြိုင်ဖက် အသင်းကြီးတွေက မနာလို ဖြစ်နေကြပါတယ် ‘ – ကီယာ ဂျိုရက်ချီယန်

ယခုနှစ် နွေရာသီ အပြောင်းအရွှေ့ ဈေးကွက် အတွင်း ချဲလ်ဆီး အသင်း ရဲ့ လှုပ်ရှားမှု ခြေလှမ်း တွေက အလွန် သွက်လက်လျက် ရှိနေကာ ၊ အပြောင်းအရွှေ့ ဈေးကွက် ပိတ်ဖို့ တလနီးပါး ကျန်ရှိသေးပေမယ့် ၊ ကစားသမားသစ် ၆ဦး ကို ခေါ်ယူပြီးစီးထားပြီး ဖြစ်ပါတယ် ။

တိုက်စစ် အတွက် ကစားသမားသစ် ၃ဦး အဖြစ် ချဲလ်ဆီး အသင်း ဟာ အေဂျက်ဇ် အသင်း မှ မော်ရိုကို တောင်ပံ ကစားသမား ဟာကင် ဇီယက်ချ် ကို ယူရိုသန်း ၄၀ ၊ ရက်ဒ်ဘူးလ် လစ်ပ်ဇစ် အသင်း မှ ဂျာမနီ တိုက်စစ်မှူး တီမို ဗာနာ ကို ယူရိုသန်း ၅၀ ၊ လေဗာကူဆင် အသင်း မှ ဂျာမန် ကွင်းလယ် တိုက်စစ် ကြယ်ပွင့် ကိုင်ဟာဗက်ဇ် ကို ယူရိုသန်း ၇၀ တို့နဲ့ အသီးသီး ခေါ်ယူထားနိုင်ခဲ့တာ ဖြစ်ပါတယ် ။

ခံစစ် အတွက် ကစားသမားသစ် ၃ဦး အဖြစ် ချဲလ်ဆီး အသင်း ဟာ လက်စတာ အသင်း မှ အင်္ဂလန် ဘယ်နောက်ခံလူ ဘန်ချေဝဲလ် ကို ပေါင်သန်း ၅၀ ၊ နိုက်စ် အသင်း ရဲ့ ပြင်သစ် လူငယ် ခံစစ်မှူး မာလန်းဆား ၊ ပီအက်စ်ဂျီ အသင်း ရဲ့ ဘရာဇီး ဝါရင့် ခံစစ်မှူး သီယာဂို ဆေးလ်ဗား ကို အလွတ် ပြောင်းရွှေ့ကြေး နဲ့ အသီးသီး ခေါ်ယူ အားဖြည့်နိုင်ခဲ့ပါတယ် ။

ဒါ့အပြင် ချဲလ်ဆီး နည်းပြ ဖရန့် လမ်းပတ် ဟာ ထိပ်တန်း ဂိုးသမားသစ် တဦး နဲ့ နောက်ခံလူ တဦး ထပ်မံ အလိုရှိနေပြီး ၊ ဒီအတွက် ရန်းနက်စ် အသင်း ရဲ့ အသက် ၂၈ နှစ် အရွယ် ဆီနီဂေါ ဂိုးသမား အက်ဒိုဝါ့ဒ် မန်ဒီ ကိုလည်း ယူရို ၂၅ သန်း နဲ့ ခေါ်ယူနိုင်ဖို့ လက်တကမ်း အကွာ ကို ရောက်နေပါပြီ

ဆက်လက်ပြီးလည်း အပြောင်းအရွှေ့ ဈေးကွက် မပိတ်သိမ်းမီ ဝက်စ်ဟမ်း အသင်း ရဲ့ အင်္ဂလန် ကြယ်ပွင့် ကွင်းလယ် ခံစစ် ကစားသမား ဒီကလန်ရိုက်စ် ကိုလည်း အရ ခေါ်ယူနိုင်ဖို့ ချဲလ်ဆီး တို့ အတတ်နိုင်ဆုံး ကြိုးစားသွားဖွယ် ရှိနေပါတယ် ။

ကမ္ဘာ့ ကပ်ရောဂါဆိုးကြီး ဖြစ်နေတဲ့ ကာလ အတွင်း တချို့ အသင်းကြီးတွေတောင် ငွေကြေး သုံးစွဲဖို့ လက်တွန့်နေချိန်မှာ ဒီလို ကြီးကျယ်တဲ့ အပြောင်းအရွှေ့ လှုပ်ရှားမှု များစွာ ကို ဆက်တိုက် ပြုလုပ်နေတဲ့ ချဲလ်ဆီး အသင်း ဟာ မကြာခင်မှာ စတင်တော့မယ့် ပရီးမီးယားလိဂ် ရာသီသစ် အတွက် အောင်မြင်မှု အတိုင်းအတာ တခု အထိ မျှော်မှန်းနေမှာ သေချာပါတယ် ။

ဒီနှစ် အပြောင်းအရွှေ့ ဈေးကွက် အတွင်း မှာမှ ချဲလ်ဆီး ကနေ လန်ဒန် မြို့ခံ ပြိုင်ဖက် အာဆင်နယ် အသင်း သို့ ပြောင်းရွှေ့သွားခဲ့တဲ့ ဘရာဇီး ဝါရင့် တောင်ပံ ကစားသမား ဝီလီယံ ရဲ့ စူပါ အေးဂျင့် ဖြစ်သူ ကီယာ ဂျိုရက်ချီယန် ကတော့ လက်ရှိ ချဲလ်ဆီး အသင်း ရဲ့ အပြောင်းအရွှေ့ လှုပ်ရှားမှု တွေကို တခြား ထိပ်သီး ပြိုင်ဖက် ကလပ် တွေက မနာလို ဖြစ်နေကြတယ် လို့ ဆိုလာပါတယ် ။

Talksport ရဲ့ အစီအစဉ် တခုမှာ ဂျိုရက်ချီယန် က ” ချဲလ်ဆီး အသင်း ဟာ ဒီ နွေတတွင်း မှာ ကစားသမားသစ် တွေကို ခေါ်ယူဖို့ စနစ်ကျကျ ငွေကြေး သုံးစွဲနိုင်ခဲ့ပါတယ် ။ သူတို့ဟာ ဖရန့် ကို နောက်ကွယ် ကနေ အပြည့်အဝ ပံ့ပိုးပေးထားကြပါတယ် ။ ဒါဟာ အဓိက သော့ချက်ပါပဲ ။ “

” လက်ရှိ ပရီးမီးယားလိဂ် ရဲ့ မန်နေဂျာ တော်တော်များများ ဟာ ဒီလို ကလပ် ဘုတ်အဖွဲ့ ရဲ့ ထောက်ခံမှု ကို လိုချင်နေမှာ သေချာပါတယ် ။ လောလောဆယ် မှာတော့ ဒီလို အင်အား ဖြည့်တင်းမှုတွေ အပြီး စွမ်းဆောင်ရည်ကောင်းတွေ ပြသဖို့ ဖရန့် နဲ့ ချဲလ်ဆီး အသင်း မှာ ဖိအားတွေ ရှိလာပါပြီ ။ ” လို့ ပြောကြားခဲ့ပါတယ် ။

ဆက်လက်ပြီး ဂျိုရက်ချီယန် က ချဲလ်ဆီး အသင်း ဟာ ဒီနှစ် အပြောင်းအရွှေ့ တချို့ မှာ ထင်ထားတာထက် နည်းပါးတဲ့ ပြောင်းရွှေ့ကြေး တွေနဲ့ ကစားသမားသစ် တွေကို ခေါ်ယူနိုင်ခဲ့တာ ဖြစ်တယ် လို့ ယုံကြည်နေပါတယ် ။

ဂျိုရက်ချီယန် က ” အပြောင်းအရွှေ့ ဈေးကွက် က ဆက်လက် ဖြစ်ပေါ်နေဦးမှာပါ ။ အရှေ့မှာ ကျွန်တော် ပြောခဲ့ဖူူးတဲ့ အတိုင်း ချဲလ်ဆီး အသင်း ဟာ ဝယ်စရာ ရှိတဲ့ ကစားသမား တွေကို ငွေကြေး ပစ်ပေးပြီး ခေါ်ယူခဲ့ပါတယ် ။ ဒါပေမယ့် ခန့်မှန်းရခက်နေတဲ့ လက်ရှိ အပြောင်းအရွှေ့ ဈေးကွက် အတွင်း မှာ သူတို့ဟာ တချို့ ကစားသမား တွေကို ထင်ထားတာထက် ၂၀ ၊ ၃၀ ရာခိုင်နှုန်းလောက် နည်းပါးတဲ့ လျှော့ဈေး နဲ့ ရခဲ့တာ ဖြစ်ပါတယ် ။ ” လို့ ပြောကြားခဲ့ပါတယ် ။