ဂျာမန်ကွင်းလယ်တိုက်စစ်ကစားသမား ဟာဗက်ဇ်က ချယ်လ်ဆီးအသင်းသို့ ပြောင်းရွှေ့ခွင့်ရခဲ့သည့်အတွက် ဂုဏ်ယူကြောင်း ပြောကြားခဲ့သည်။
ချယ်လ်ဆီးအသင်းသည် အသက် (၂၁)နှစ်အရွယ်ရှိ ဟာဗက်ဇ်ကို လေဗာကူဆင်အသင်းမှ ပေါင် (၇၁)သန်း(Adds-on အပါအဝင်)ဖြင့် ခေါ်ယူကာ (၅)နှစ်သက်တမ်းရှိ စာချုပ်တစ်ရပ် ချုပ်ဆိုခဲ့သည်။
ဟာဗက်ဇ်က ချယ်လ်ဆီးအသင်းသို့ ပြောင်းရွှေ့ခွင့်ရခဲ့သည့်အတွက် ဝမ်းသာကြောင်းနှင့် အသင်းဖော်သစ်များနှင့် တွေ့ဆုံရန် မစောင့်နိုင်တော့ကြောင်း ပြောကြားခဲ့သည်။
ဟာဗက်ဇ်က “ချယ်လ်ဆီးအသင်းသို့ ပြောင်းရွှေ့ခွင့်ရခဲ့တဲ့အတွက် ကျွန်တော် အရမ်းပျော်ပြီး ဂုဏ်ယူပါတယ်။ ချယ်လ်ဆီးလို ကြီးကျယ်ခမ်းနားတဲ့ အသင်းကြီးကို ပြောင်းရွှေ့ခွင့်ရတာဟာ ကျွန်တော့်ရဲ့အိပ်မက်တွေ အမှန်တကယ်ဖြစ်မြောက်လာတာပါပဲ။ နည်းပြအဖွဲ့ဝင်တွေ၊ အသင်းဖော်သစ်တွေနဲ့ တွေ့ဆုံဖို့တောင် မစောင့်နိုင်တော့ပါဘူး။ ကျွန်တော် အရမ်းပျော်နေပါတယ်”ဟု အသင်းဝက်ဘ်ဆိုက်သို့ ပြောကြားခဲ့သည်။
ဟာဗက်ဇ်သည် လေဗာကူဆင်အကယ်ဒမီထွက် ကစားသမားတစ်ဦးဖြစ်ပြီး လေဗာကူဆင်အသင်းတွင် (၄)ရာသီအတွင်း ပြိုင်ပွဲစုံ ပွဲ(၁၅၀)တွင် (၄၆)ဂိုး သွင်းယူခဲ့သည်။
ချယ်လ်ဆီးအသင်းသည် ယခုနွေရာသီအပြောင်းအရွှေ့ကာလတွင် ဇီယာ့ရှ်၊ တီမိုဗာနာ၊ သီယာဂိုဆေးလ်ဗား၊ ချီဝဲလ်၊ ဟာဗက်ဇ်တို့လို နာမည်ကျော် ကစားသမားများကို ခေါ်ယူထားပြီးဖြစ်သော်လည်း ကစားသမား(၂)ဦးခန့် ထပ်မံခေါ်ယူသွားရန် စီစဉ်နေကြောင်း သိရှိရသည်။
