ချယ်လ်ဆီးအသင်းနည်းပြသစ် သောမတ်စ်တူဟယ်လ်က ယခုရာသီတွင် ချန်ပီယံဖြစ်ရန် မျှော်လင့်ချက်မရှိတော့ဘဲ ချန်ပီယံ လိဂ်ဝင်ခွင့်ရရန်ပင် ခက်ခက်ခဲခဲကြိုးစားရမည်ဖြစ်ကြောင်း ဝန်ခံပြောကြားခဲ့သည်။
တူဟယ်လ်သည် ချယ်လ်ဆီးအသင်း နည်းပြအဖြစ် ခန့်အပ်ခံရပြီးနောက် တစ်ရက်အကြာ ဗုဒ္ဓဟူးနေ့မှာပင် ဝုလ်ဗ်အသင်းနှင့် ပရီးမီးယားလိဂ်ပွဲစဉ် ယှဉ်ပြိုင်ကစားခဲ့ရပြီး ဘောလုံးပိုင်ဆိုင်မှု (၇၉) ရာခိုင်နှုန်း၊ ဂိုးကန်သွင်းမှု (၁၄) ကြိမ်ဖြင့် ဖိအားပေးနိုင်ခဲ့သော်လည်း ဂိုးမရှိသရေကျခဲ့သည်။
ချယ်လ်ဆီး အသင်းသည် ပရီးမီးယားလိဂ် နောက်ဆုံး (၉) ပွဲတွင် (၂)ပွဲသာ အနိုင်ရထားပြီး ယခုပွဲ သရေရလဒ်ကြောင့် ဇယားထိပ်ဆုံးမှ ပွဲကျန်တစ်ပွဲကစားရန် ကျန်ရှိနေသေးသည့် မန်စီးတီးအသင်းနှင့် (၁၁) မှတ်၊ ချန်ပီယံလိဂ်ဝင်ခွင့် အဆင့် (၄) နေရာမှ လီဗာပူးလ်အသင်းနှင့် (၇)မှတ် ကွာဟနေသည်။
သို့ဖြစ်ရာ ဝုလ်ဗ်အသင်းနှင့် ပွဲအပြီး သတင်းစာရှင်းလင်းပွဲတွင် တူဟယ်လ်က ယခုကဲ့သို့ သုံးသပ်ပြောကြားခဲ့ခြင်း ဖြစ်သည်။
“ချန်ပီယံဆုအကြောင်းလား။ အဲဒါက အဝေးကြီးဖြစ်သွားပါပြီ။ တစ်ချိန်တည်းမှာပဲ ကျွန်တော်တို့အနေနဲ့ လက်တွေ့ကျဖို့ လိုပါတယ်။ ချယ်လ်ဆီးမန်နေဂျာအဖြစ် လက်မှတ်ရေးထိုးချိန်မှာ ခင်ဗျားအနေနဲ့ ချန်ပီယံဆုတွေ၊ ပရီးမီးယားလိဂ်၊ ချန်ပီယံလိဂ်နဲ့ တခြားဆုဖလားတွေအကြောင်း ရည်မှန်းချက်ထားရမယ်ဆိုတာ လုံးဝသေချာပါတယ်။ ဒါပေမဲ့ တစ်ချိန်တည်းမှာပဲ တခြားအသင်းတွေရဲ့ ပကတိအခြေအနေ၊ ကျွန်တော်တို့နဲ့ အဆင့် (၄) နေရာက အသင်းရဲ့ ရမှတ်ကွာခြားမှုကိုလည်း ဂရုပြုရပါမယ်။ အခုလို ရာသီအလယ်ကာလက ဇယားအပေါ်ပိုင်းကိုပြန်တက်ဖို့ အကောင်းဆုံးအချိန်ပါပဲ။ နောက်ပြီးတော့ ဝေးလွန်းတဲ့အနာဂတ်ကိုကြည့်ပြီး အာရုံစူးစိုက်မှု ပျက်သွားလို့လည်း မရပါဘူး။ နေ့စဉ် အသေးစိတ်လုပ်ရမယ့်ဟာတွေကနေပြီး ပွဲစဉ်တွေမှာ တိုးတက်မှုရလာဖို့ လုပ်ရမှာပါ။ အဲဒီလိုဆိုရင် ရမှတ်တွေလည်း ကောင်းလာမှာပါ” ဟု တူဟယ်လ်က ပြောကြားခဲ့သည်။
