အင်္ဂလန်ဘောလုံးအဖွဲ့ချုပ်(FA)သည် ယခုလအတွင်း ကျင်းပမည့် ကွန်မြူနတီဒိုင်းပွဲတွင် ပရိသတ်များကို ကွင်းအတွင်းဝင်ရောက်ကြည့်ရှုခွင့်ပေးရန် မူလက စဉ်းစားထားသော်လည်း ယင်းအစီအစဉ်အား ပြန်လည်ပယ်ဖျက်ခဲ့ကြောင်း သိရှိရသည်။
ယခုသြဂုတ်လ (၂၉)ရက်နေ့တွင် လန်ဒန်မြို့ရှိ ဝင်ဘလေကွင်း၌ လာမည့်ရာသီအကြို ကွန်မြူနတီဒိုင်းပွဲကို ကျင်းပသွားမည်ဖြစ်ပြီး ပရီးမီးယားလိဂ်ချန်ပီယံ လီဗာပူးလ်အသင်းနှင့် FA ဖလားချန်ပီယံ အာဆင်နယ်အသင်းတို့ ကစားကြမည်ဖြစ်သည်။ မူလက အင်္ဂလန်ဘောလုံးတာဝန်ရှိသူများသည် ယင်းပွဲတွင် ပရိသတ်များကို ပထမဆုံးဝင်ရောက်ခွင့်ပေးကာ စံပြအနေဖြင့် စမ်းသပ်ရန် စီစဉ်ခဲ့ခြင်းဖြစ်သည်။
လက်ရှိတွင် အင်္ဂလန်အနောက်မြောက်ပိုင်းဒေသရှိ နေရာအချို့တွင် ကိုရိုနာဗိုင်းရပ်စ် ပြန့်ပွားမှုအခြေအနေအရ Lockdown ပြုလုပ်ထားရပြီး ဗြိတိန်အချက်အလက်၊ ယဉ်ကျေးမှု၊ မီဒီယာနှင့် အားကစားဝန်ကြီးဌာနကလည်း အားကစားပြိုင်ပွဲများအတွက် ညွှန်ကြားချက်အသစ်များကို ထုတ်ပြန်ရန် စီစဉ်လျက်ရှိနေသည်။
သို့ဖြစ်ရာ ကွန်မြူနတီဒိုင်းပွဲတွင် ပရိသတ်များ ဝင်ရောက်ကြည့်ရှုရန် အစိုးရထံမှ ခွင့်ပြုချက်မရသေးဘဲ အကယ်၍ ခွင့်ပြုသည့်တိုင် FA တာဝန်ရှိသူများအနေဖြင့် ပြင်ဆင်ဆောင်ရွက်ချိန် အလွန်နည်းပါးမည်ဖြစ်ကြောင်း သိရှိရသည်။
ဘောလုံးပြိုင်ပွဲကဲ့သို့ပင် ခရစ်ကတ်၊ ကားပြိုင်ပွဲနှင့် စနူကာပြိုင်ပွဲအချို့တွင်လည်း ပရိသတ်များကို ဝင်ရောက်ကြည့်ရှုခွင့်ပေးရန် စီစဉ်ခဲ့သော်လည်း ယင်းအစီအစဉ်ကို ပြန်လည်ပယ်ဖျက်ခဲ့ရသည်။
