စပါးအသင်းသည် အသင်းနည်းပြ ကွန်တီ၏နေရာတွင် စပိန်လက်ရွေးစင်အသင်းနည်းပြဟောင်း လူးဝစ်အင်းနရစ်ကို အစားထိုးခန့်အပ်ရန် ပစ်မှတ်ထားနေကြောင်း The Times သတင်းစာက ဖော်ပြခဲ့သည်။
စပါးအသင်းသည် ယခုရာသီတွင် ချန်ပီယံလိဂ်တွင် ရှုံးထွက် (၁၆)သင်းအဆင့်မှထွက်ခွာခဲ့ရပြီး ပရီးမီးယားလိဂ်တွင်လည်း အဆင့် (၄)အတွင်း ဝင်ရန် ရုန်းကန်နေရသည်။
ထို့ပြင် ကွန်တီနှင့် စပါးအသင်းဘုတ်အဖွဲ့အကြား ပြဿနာများ ရှိနေပြီး ၎င်းအနေဖြင့် ယခုရာသီကုန်တွင် အသင်းလက်ခွဲဖွယ်ရှိနေကြောင်း သတင်းများထွက်ပေါ်နေသည်။ ထို့ကြောင့် စပါးအသင်းသည် ကွန်တီ၏နေရာကို ဆက်ခံရန်အတွက် နာမည်ကျော်နည်းပြများကို ချိတ်ဆက်နေပြီး ယခုအခါ စပိန်နည်းပြဟောင်း အင်းနရစ်ကို ပစ်မှတ်ထားလာခြင်းဖြစ်သည်။
အသက် (၅၂)နှစ်အရွယ်ရှိ အင်းနရစ်သည် ဘာစီလိုနာအသင်းနှင့် ဆုဖလားများ ရယူနိုင်ခဲ့သူဖြစ်ပြီး ၂၀၂၂ ကမ္ဘာ့ဖလားပြိုင်ပွဲအပြီးတွင် စပိန်လက်ရွေးစင်အသင်းနှင့် လမ်းခွဲပြီးနောက် အသင်းလက်မဲ့ဖြစ်နေသူဖြစ်သည်။
စပါးအသင်းသည် ၂၀၀၇-၀၈ ရာသီတွင် လိဂ်ဖလားရရှိပြီးနောက် ဖလားလက်မဲ့ဖြစ်နေခြင်းကို အဆုံးသတ်ရန်အတွက် ဆုဖလားများရယူဖူးသည့် အင်းနရစ်ကို နည်းပြအဖြစ် ခန့်အပ်ရန် ပစ်မှတ်ထားလာခြင်းဖြစ်ပြီး စပါးအသင်းတာဝန်ရှိသူများသည် အင်းနရစ်၏ နည်းစနစ်များကို သဘောကျနေကြောင်းလည်း သိရှိရသည်။